اۋىل شارۋاشىلىعى ءمينيسترى ايداربەك ساپاروۆ قازاقستانداعى تاجىكستان ەلشىسى حايرۋللو يبودزودا جانە تاجىك اگرارلىق بيزنەسىنىڭ وكىلدەرىمەن كەزدەسۋ وتكىزدى. 

كەلىسسوزدەردىڭ باستى تاقىرىبى - قازاقستاننان تاجىكستانعا استىق ەكسپورتىن ۇلعايتۋ ماسەلەسى بولدى. تاجىكستان ءداستۇرلى تۇردە قازاقستاندىق استىق ءونىمى ءۇشىن نەگىزگى نارىقتاردىڭ ءبىرى سانالادى. ەلگە جىل سايىن ورتا ەسەپپەن 1 ميلليون تونناعا جۋىق استىق جەتكىزىلەدى. 2024 جىلدىڭ قورىتىندىسى بويىنشا تاجىكستانعا ەكسپورتتالعان استىق كولەمى 1,3 ميلليون توننانى قۇرادى، بۇل 2023 جىلمەن سالىستىرعاندا 20%-عا كوپ.

2024 جىلى قىركۇيەك پەن 2025 جىلدىڭ ماۋسىم ارالىعىندا جاڭا ونىمنەن 1,2 ميلليون توننا استىق ەكسپورتتالدى، بۇل وتكەن جىلدىڭ وسى كەزەڭىمەن سالىستىرعاندا 1,5 ەسە كوپ (823 مىڭ توننا).

ايداربەك ساپاروۆ ەكسپورتتى ۇلعايتۋ ماسەلەسىندە جان-جاقتى قولداۋ كورسەتۋگە دايىن ەكەنىن راستاپ، قازاقستاننىڭ اگروونەركاسىپتىك كەشەن سالاسىنداعى تاجىكستانمەن ارىپتەستىكتى نىعايتۋعا مۇددەلى ەكەنىن اتاپ ءوتتى.

ەسكە سالا كەتەيىك، بۇعان دەيىن قازاقستان جاڭا ونىمنەن 5 ميلليون توننادان استام استىق ەكسپورتتاعانى حابارلانعان ەدى.

Abai.kz