قازاقستاندا اتوم ەلەكتر ستانتسياسىنىڭ قۇرىلىسى شامامەن 14 ميلليارد دوللاردى قۇرايدى. بۇل تۋرالى قر اتوم ەنەرگياسى اگەنتتىگىنىڭ باسشىسى الماسادام ساتقاليەۆ حابارلادى.

«قۇنى تەن نەگىزىندە ايقىندالاتىن بولادى. قازىر كونكۋرستىق راسىمدەرگە قاتىسۋ شەڭبەرىندە ۆەندورلار ۇسىنعان ينديكاتيۆتىك پارامەترلەر بار. بىراق ءبىز ولاردى جاريالاي المايمىز، ويتكەنى ولار قۇپيالىلىق تۋرالى كەلىسىمدەرمەن قورعالعان»، - دەدى الماساد ساتقاليەۆ.

ەستەرىڭىزگە سالا كەتەيىك: 2024 جىلى 6 قازاندا قازاقستاندا العاشقى اتوم ەلەكتر ستانتسياسىن سالۋ بويىنشا رەفەرەندۋم ءوتتى. رەفەرەندۋمعا شىعارىلعان ماسەلەنى وڭ شەشۋگە داۋىس بەرگەن ازاماتتاردىڭ سانى 5 ميلليون 561 مىڭ 937 ادامدى نەمەسە 71,12% قۇرادى.

مەملەكەت باسشىسى رەفەرەندۋمنان سوڭ باق وكىلدەرىنە بەرگەن سۇحباتىندا: «بۇگىن تاريحي كۇن. حالقىمىز اەس قۇرىلىسى بويىنشا داۋىس بەرەدى، ماڭىزدى ماسەلە. بۇگىن حالقىمىز قانداي شەشىم قابىلداسا، مەملەكەتىمىزدىڭ تۇپكىلىكتى بايلامى سونداي بولادى»، - دەگەن ەدى.

سونىمەن، قازاقستان العاشقى اتوم ەلەكتر ستانتسياسىن سالۋدى جوسپارلاپ وتىر. ۇمىتكەر ەلدەر قاتارىندا — رەسەي، قىتاي، فرانتسيا جانە وڭتۇستىك كورەيا بولعان. بۇل مەملەكەتتەرمەن كەلىسسوزدەر جۇرگىزىلىپ، ارقايسىسى ءوز تەحنولوگياسىن ۇسىنعان.

جۋىردا قازاقستانداعى العاشقى اەس-ءتى رەسەيلىك «روساتوم» سالاتىنى بەلگىلى بولدى. قۇزىرلى ۆەدومستۆونىڭ حابارلاۋىنشا، تاريحي جانە ستراتەگيالىق سەرىكتەس رەتىندە باستى ۇمىتكەر دەپ  رەسەيلىك «روساتوم» تاڭدالعان. الايدا، قازىرگى گەوساياسي جاعدايعا بايلانىستى قازاقستان ءبىر ەلگە عانا تاۋەلدى بولعىسى كەلمەيدى. سوندىقتان، اەس قۇرىلىسى كونسورتسيۋمدىق باسقارۋدا بولادى.

ايتا كەتەيىك: قازىرگە دەيىن قازاقستان بيلىگى قوس بىردەي اەس-ءتى سالۋ بويىنشا شەشىم قابىلدادى. ال وسىنىڭ الدىندا يادرولىق ينجينيرينگ سالاسىنداعى جەتەكشى الەمدىك تاۋەلسىز كومپانيالاردىڭ ءبىرى Assystem قازاقستان رەسپۋبليكاسىنىڭ اتوم-ەنەرگەتيكالىق باعدارلاماسىن ىسكە اسىرۋدا قولداۋ كورسەتۋ ماقساتىندا «قازاقستاندىق اتوم ەلەكتر ستانتسيالارى» جشس (قاەس) تەحنيكالىق كەڭەسشىسى رولىنە يە بولدى.

Assystem اەس جوباسىن ىسكە اسىرۋ ءۇشىن ينجينيرينگ، جوبانى باسقارۋ جانە قۇرىلىس جۇمىستارىن كەشەندى ۇسىنۋدا جانە قاداعالاۋدا قاەس تەحنيكالىق كەڭەسشىسى قىزمەتىن اتقاراتىنى ايتىلدى.

قازاقستاندا سالىناتىن العاشقى اتوم ەلەكتر ستانتسياسىن (اەس) رەسەيلىك «روساتوم» مەملەكەتتىك كورپوراتسياسى باسقاراتىن كونسورتسيۋم ىسكە اسىراتىن بولدى. بۇل جونىندە رەسمي اقپاراتتى قازاقستان رەسپۋبليكاسىنىڭ اتوم ەنەرگەتيكاسى اگەنتتىگى تاراتتى.

اگەنتتىكتىڭ مالىمەتىنشە: «اەس سالۋ بويىنشا «روساتوم» كومپانياسىنىڭ ۇسىنىسى قاۋىپسىزدىك، تەحنولوگيالىق شەشىمدەر جانە قارجىلاندىرۋ شارتتارى تۇرعىسىنان ەڭ ءتيىمدى دەپ تانىلدى»، – دەلىنگەن حابارلامادا.

قىتايدىڭ CNNC كومپانياسى قازاقستاندا تاعى ءبىر اتوم ەلەكترستانتسياسىن سالۋ جونىندەگى كونسورتسيۋمنىڭ كوشباسشىسى بولىپ تانىلدى.

«قىتايمەن اتوم ونەركاسىبىندەگى ىنتىماقتاستىق تۋرالى جەكە كەلىسىمگە قول قويۋ جوسپارلانۋدا. ال ءبىز تاعى ءبىر اتوم ەلەكتر ستانتسياسىن سالۋ ءۇشىن قىتاي تەحنولوگيالارىن قازاقستاندا كورگىمىز كەلەدى»، - دەدى ساتقاليەۆ.

ايىم الماسقىزى

Abai.kz