30 ماۋسىم كۇنى الەمدىك باق-تا ليۆيا جاعالاۋىندا جارىلىس بولعان «Vilamoura» اتتى تانكەر تۋرالى اقپارات كەڭ تارادى. 1 ميلليون باررەل مۇناي تيەلگەن تانكەردەگى بۇل توتەنشە جاعداي مۇناي نارىعىنا اسەر ەتتى مە؟ بۇل وقيعا قازاقستاندىق مۇنايعا قاتىستى ما دەگەن ساۋال قوعامدا قىزۋ تالقىلانۋدا.

جارالىستىڭ سەبەبى:

«Vilamoura» تانكەرى گرەك كومپانياسى «TMS Tankers-كە» تيەسىلى. كومپانيانىڭ ايتۋىنشا، كەمەنىڭ ماشينا بولىمىنە سۋ كىرىپ كەتكەن، الايدا ەكيپاج مۇشەلەرىنەن زارداپ شەككەندەر جوق. مۇناي توگىلمەگەن. جارىلىستىڭ ناقتى سەبەبى ءالى انىقتالعان جوق.

قازاقستاندىق مۇناي كەمەدە بولدى ما؟

جارىلىستان كەيىن ءتۇرلى اقپاراتتار قۇرالدارى بۇل تانكەردىڭ بورتىندا قازاقستاندىق مۇناي بولعانىن جازدى. اسىرەسە، تانكەردىڭ بيىل ءساۋىر ايىندا رەسەيلىك ۋست-لۋگا پورتىنا توقتاپ، قازاقستاننان جەتكىزىلگەن مۇنايدى تيەپ العانى تۋرالى دەرەكتەر ايتىلدى. مامىر ايىندا تانكەر نوۆوروسسيسك ماڭىنداعى كاسپي قۇبىر كونسورتسيۋمىنىڭ (كقك) تەرمينالىندا دا بولعان.

وسى مالىمەتتەر قازاقستاندىق مۇناي ەكسپورتىنا قاۋىپ ءتوندى مە دەگەن الاڭداۋشىلىق تۋعىزدى. الايدا، قر ەنەرگەتيكا مينيسترلىگى بۇل جورامالدارعا رەسمي جاۋاپ بەرىپ، تانكەر جارىلعان ساتتە ونىڭ بورتىندا قازاقستان مۇنايى بولماعانىن مالىمدەدى.

مينيسترلىك مالىمەتىنشە، وقيعا كەزىندە «Vilamoura» تانكەرىنىڭ سوڭعى جۇگى ليۆيا پورتتارىنىڭ بىرىندە تيەلگەن.

«بۇل شەتىن وقيعا جەكە تانكەردە بولدى، ونىڭ سوڭعى جۇكتەمەسى ليۆيا پورتتارىنىڭ بىرىندە بولدى. وقيعا كەزىندە بورتتا قازاقستاندىق مۇنايدىڭ بولۋى تۋرالى اقپارات شىندىققا جاناسپايدى»، – دەلىنگەن مينيسترلىك تاراتقان حابارلامادا.

تەڭىزدەگى قاۋىپسىزدىككە جاۋاپتى «Vanguard Tech» كومپانياسى حابارلاعانداي، جىل باسىنان بەرى رەسەيلىك پورتتارعا قاتىناعان تانكەرلەردە وسىنداي كەمىندە 4 جارىلىس بولعان. بۇل — تەڭىز تاسىمالىنداعى تاۋەكەلدەردىڭ ارتىپ كەلە جاتقانىن كورسەتەدى.

«Vilamoura» وقيعاسى دا وسى ۇردىسكە سايكەس كەلىپ تۇر. جارىلىس گيبرالتارعا قاراي بەت العان جولدا، ليۆياداعى زەيتينا پورتىنان شىققاننان كەيىن بولعان.

بۇل وقيعا قازاقستاندىق مۇناي ەكسپورتىنا اسەر ەتكەن جوق. الايدا، تەڭىز جولىنداعى قاۋىپ-قاتەرلەردىڭ جيىلەپ بارا جاتقانى قازاقستان سەكىلدى ەكسپورتقا تاۋەلدى ەلدەر ءۇشىن ەسكەرەتىن ماڭىزدى فاكتور بولىپ قالا بەرەدى.

ايىم الماسقىزى

Abai.kz