بيىلعى جىلدىڭ سوڭىنا دەيىن جەتىسۋ وبلىسىندا تابيعي گازبەن قامتىلعان ادام سانى 518 مىڭعا جەتەدى.

بۇل رەتتە اقسۋ اۋدانىنىڭ 31 اۋىلىنا گاز تارتۋ جۇمىستارى بيىل باستالادى. اقسۋ، سارقان جانە الاكول اۋداندارىنداعى 84 ەلدى مەكەندى گازداندىرۋ جوبالارى اياقتالعاننان كەيىن ءوڭىردى گازداندىرۋ دەڭگەيى 93,8%-عا جەتەدى. بۇل تۋرالى اقسۋ اۋدانىنىڭ تۇرعىندارىمەن كەزدەسۋى بارىسىندا وبلىس اكىمى بەيبىت يساباەۆ ايتتى.

ءوڭىر باسشىسىنىڭ سوزىنە سۇيەنسەك، وبلىس قۇرىلعانعا دەيىن تەك 5 ەلدى مەكەن نەمەسە حالىقتىڭ 27%-ى عانا گاز تۇتىنعان بولاتىن. بۇگىندە كەربۇلاق اۋدانىنان پانفيلوۆ اۋدانىن قوسا العاندا، تالدىقورعان قالاسىنا دەيىنگى 110 ەلدى مەكەن تابيعي گازعا قوسىلعان، جىل سوڭىنا دەيىن تاعى 16 اۋىلدا جۇمىستار اياقتالادى. سونىڭ ناتيجەسىندە بۇل كورسەتكىش 74%-عا جەتەدى.

- وتكەن جىلى «تالدىقورعان-ءۇشارال» ماگيسترالدى گاز قۇبىرىنىڭ قۇرىلىسى اياقتالىپ، اقسۋ، سارقان، الاكول اۋداندارىنىڭ ەلدى مەكەندەرىن تابيعي گازبەن قامتۋ ءۇشىن جوبالاۋ-سمەتالىق قۇجاتتامالارى ازىرلەندى. بيىل وسى جۇمىستاردى باستاۋعا ينفراقۇرىلىمدى دامىتۋ قورى ارقىلى قارجى قاراستىرىلدى. سونىڭ ىشىندە اقسۋ اۋدانىنىڭ 31 اۋىلىندا گاز تارتۋ جۇمىستارىن بيىل باستايمىز، كەلەسى جىلى اياقتالادى - دەدى بەيبىت يساباەۆ.

سول سياقتى كەزدەسۋ كەزىندە ءوڭىر باسشىسى اۋىز سۋمەن قامتۋ ماسەلەسىنە دە توقتالدى. بيىل وبلىستا 11 ەلدى مەكەندە جۇمىستار جۇرگىزىلۋدە، جىل سوڭىنا دەيىن 8 ەلدى مەكەندە اياقتالادى، 3 ەلدى مەكەندەگى جۇمىستار كەلەسى جىلعا وتپەلى. سونىڭ ىشىندە اقسۋ اۋدانىندا ورتالىق اۋىز سۋمەن قامتۋ كورسەتكىشى - 99,7%. بيىل بايتەرەك، التىنارىق، قوپا، اقتوعان اۋىلدارىنداعى سۋ قۇبىرىن اعىمداعى جوندەۋ جۇمىستارى جۇرگىزىلىپ جاتىر.

بۇل رەتتە بەيبىت يساباەۆ جانسۇگىروۆ اۋىلىننىڭ تۇرعىندارى ءۇشىن 3 ۇڭعىمادان سۋ الىنىپ وتىرعاندىقتان، مەكەمەنىڭ ەلەكتر ەنەرگياسىن تۇتىنۋ شىعىندارىن ازايتۋ ماقساتىندا جانە تۇرعىنداردى ۇزدىكسىز اۋىز سۋمەن قامتاماسىز ەتۋ ءۇشىن كەلەسى جىلى وبلىستىق بيۋدجەتتەن ءتيىستى قاراجات قاراستىرىلىپ، كۇن پانەلدەرىن ورناتۋ جۇمىستارى جۇرگىزىلەتىنىن جەتكىزدى.

اتاپ وتسەك، قازىرگى تاڭدا وبلىستاعى ەلدى مەكەندەردىڭ 93% تازا اۋىز سۋمەن قامتىلعان.

Abai.kz