استانا قالاسىنىڭ پوليتسياسى پەريزات قايراتتىڭ "تەرگەۋ يزولياتورى قىزمەتكەرلەرى تاراپىنان سوققىعا جىعىلدىم" دەگەن مالىمدەمەسىنە قاتىستى رەسمي تۇسىنىك بەردى. 

9 ماۋسىم كۇنى تەرگەۋدەگى پەريزات قايرات پروكۋراتۋرا ورگاندارىنا ارىز ءتۇسىرىپ، مەكەمە قىزمەتكەرى كامەرا ەسىگىن كۇشتەپ جاپقان كەزدە ونى ەسىك اراسىنا قىسىپ، دەنە جاراقاتىن كەلتىرگەنىن مالىمدەگەن.

اتالعان ارىز بويىنشا جيناقتالعان ماتەريالدار استانا قالاسى پوليتسيا دەپارتامەنتىنە جولدانىپ، قازىر سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.

"تەرگەۋ اياسىندا مەكەمەنىڭ بەينەباقىلاۋ كامەرالارىنداعى جازبالار زەردەلەنىپ، قىزمەتكەرلەر مەن كۋالاردان جاۋاپ الىندى. العاشقى تەرگەۋ ارەكەتتەرىنىڭ ناتيجەسى بويىنشا پ.قايرات مالىمدەگەندەي، كامەرا ەسىگىن جابۋ كەزىندە مەكەمە قىزمەتكەرلەرىنىڭ وعان دەنە جاراقاتىن كەلتىرۋى تۋرالى سوزدەرى راستالمايدى. بۇعان پ.قايرات ءوز ارىزىندا كورسەتكەن وقيعا ساتىندەگى بەينەباقىلاۋ جازباسى دالەل بولىپ وتىر", – دەلىنگەن رەسمي حابارلامادا.

قازىرگى ۋاقىتتا قاجەتتى تەرگەۋ ارەكەتتەرى جۇرگىزىلىپ، ءتيىستى ساراپتاما تاعايىندالدى.

ايتا كەتۋ كەرەك، بۇعان دەيىن پەريزات قايراتتىڭ سوتى ءىشىنارا جابىق وتەتىنىن جازعان بولاتىنبىز. ول يزولياتور قىزمەتكەرلەرى ونى سوققىعا جىققانىن ايتتى.