اباي وبلىسىندا اباي قۇنانبايۇلىنىڭ 180 جىلدىق مەرەيتويى اياسىندا وتەتىن مادەني ءىس-شارالاردىڭ كەڭ اۋقىمدى باعدارلاماسى تانىستىرىلدى.

مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى جانجىگىت ومارحاننىڭ ايتۋىنشا، مەرەيتوي اياسىندا حالىقارالىق، رەسپۋبليكالىق جانە وڭىرلىك دەڭگەيدە 100-دەن استام اۋقىمدى مادەني ءىس-شارا وتكىزۋ جوسپارلانعان. سونىڭ ىشىندە ماڭىزدى شارالاردىڭ ءبىرى – 8 تامىز كۇنى اباي اتىنداعى تەاتردا وتەتىن «ادامزاتتىڭ ابايى» اتتى رەسپۋبليكالىق اقىندار ايتىسى. بۇل الامان ايتىسقا ەلىمىزدىڭ تۇكپىر-تۇكپىرىنەن كەلگەن تانىمال اقىندار قاتىسىپ، ءسوز سايىسىندا باق سىنايدى. ولاردىڭ قاتارىندا رۇستەم اقىلبەكوۆ (اباي وبلىسى), اسەم ەرەجەقىزى (اباي وبلىسى), مۇحتار نيازوۆ (قىزىلوردا), ايبەك جەڭىسقازين (اباي وبلىسى), اباي جولماعامبەتوۆ (ماڭعىستاۋ), شۇعايىپ سەزىمحانۇلى (الماتى), اسپانبەك شۇعاتاەۆ (پاۆلودار), ماقسات اقانوۆ (قاراعاندى), جانسايا مۋسينا (ورال), كوپبوسىن ءومىرجان عابدۇللاۇلى (ۇلىتاۋ وبلىسى), مەيىربەك سۇلتانحان (قىزىلوردا وبلىسى), قۋاندىق كەنجەبەكۇلى  (اباي وبلىسى) سىندى اقىندار بار. ايتىس جەڭىمپازىنا اۆتوكولىك سىيعا تارتىلادى.

«جوسپارلانعان مادەني شارالار اباي قۇنانبايۇلىنىڭ رۋحاني مۇراسىن كەڭىنەن ناسيحاتتاۋ، ۇلتتىق سانانى جاڭعىرتۋ، سونداي-اق ەل ىشىندەگى جانە حالىقارالىق دەڭگەيدەگى مادەني ىنتىماقتاستىقتى ارتتىرۋعا باعىتتالاتىن بولادى. مەرەيتوي اياسىنداعى مادەني جانە سپورتتىق جارىستاردىڭ جۇلدە قورىنا 9 اۆتوكولىك پەن 90 جىلقى تىگىلگەن», - دەدى جانجىگىت ومارحان.

جالپى 1–10 تامىز ارالىعىندا وبلىس ورتالىعىندا وتەتىن مەرەكەلىك ءىس-شارالارعا 30 مىڭنان استام ادام قاتىسادى دەپ جوسپارلانىپ وتىر.

ايرىقشا جوبالاردىڭ ءبىرى رەتىندە 1 تامىز كۇنى ىسكە قوسىلاتىن ABAY ACADEMIYASY ەنتسيكلوپەديالىق پورتالى ۇسىنىلدى. بۇل ونلاين پلاتفورمادا اقىننىڭ ادەبي، عىلىمي جانە مۋزىكالىق مۇراسى تولىقتاي تسيفرلاندىرىلىپ، الەمنىڭ كەز كەلگەن نۇكتەسىنەن قولجەتىمدى بولماق. سونىمەن قاتار، پورتال عىلىمي زەرتتەۋلەر جاريالاناتىن، پىكىر الماسۋعا ارنالعان ينتەراكتيۆتى الاڭ رەتىندە دە قىزمەت اتقارادى.

مەرەيتوي اياسىندا سونداي-اق «جەتى قازىنا» ۇلتتىق مادەنيەت، سپورت جانە تۋريزم فەستيۆالى وتەدى. اتالعان فەستيۆال اياسىندا «ەر جىگىت»، «سۇلۋ ايەل»، «ءىلىم-ءبىلىم: اباي وقۋلارى» رەسپۋبليكالىق بايقاۋلارى جانە توعىزقۇمالاقتان جارىستار وتكىزۋ جوسپارلانىپ وتىر. ايتا كەتەرلىگى، توعىزقۇمالاق جارىسىنىڭ جەڭىمپازىنا العاش رەت اۆتوكولىك، ال قالعان بايقاۋلاردا جىلقى سىيلىققا بەرىلەدى.

6 تامىز كۇنى اباي الاڭىندا «اباي ەلى – ونەر كەنىشى» اتتى اۋدانارالىق كوركەمونەرپازدار بايقاۋىنىڭ ۇزدىكتەرى ونەر كورسەتەتىن گالا-كونتسەرت وتەدى.
باسقا دا ءىس-شارالار تۋرالى تولىق اقپاراتتى اباي وبلىسى مادەنيەت، تىلدەردى دامىتۋ جانە ارحيۆ ءىسى باسقارماسىنىڭ رەسمي سايتىنان جانە الەۋمەتتىك جەلىدەگى پاراقشالارىنان الۋعا بولادى.

ايتا كەتەرلىگى، ۇلى ابايدىڭ مەرەيتويىنا وراي بەلگىلى اقىن اقبەرەن ەلگەزەكتىڭ باستاماسىمەن «اباي» باسپاسى بۇرىن-سوڭدى جارىق كورمەگەن 6 بىرەگەي كىتاپتى ءوز قارجىسىنا شىعارىپ، وقىرمانعا تارتۋ ەتپەك. بۇل — تەك ادەبي سىي عانا ەمەس، رۋحاني قازىنانىڭ قالىڭ جۇرتقا جول تارتۋى. تۇڭعىش رەت باسىلىپ وتىرعان بۇل ەڭبەكتەردىڭ قاتارىندا بازاربەك اتىعايدىڭ «ابايدىڭ اۋدارما مەكتەبى» اتتى تەرەڭ عىلىمي مونوگرافياسى مەن «شەيىت» كىتابى، سونداي-اق دانيال ىسقاقوۆتىڭ «شىعارمالار» جيناعى جانە بۇرىن ەش جەردە جاريالانباعان «جالىنعا مالعان جۇرەگىن» اتتى تۋىندىسى بار. سونىمەن قاتار، اسەت مەدەۋحانۇلىنىڭ «حاليوللا» اتتى تاعدىرلى عۇمىرنامالىق حيكاياتى مەن ايگىلى اقىن، جىراۋ تولەۋ كوبدىكۇلىنىڭ «سارىارقا» اتتى جىر جيناعى دا تۇڭعىش رەت وقىرمانعا جول تارتپاق.

بۇل مەرەيتويلىق شارالار — اباي مۇراسىن ۇلىقتاۋعا باعىتتالعان رۋحاني سەرپىلىس پەن ۇلتتىق بىرەگەيلىكتى دارىپتەۋدىڭ جارقىن كورىنىسى بولماق.

Abai.kz