رەسەيدىڭ ربك باسىلىمىنىڭ مالىمەتىنشە، ۆلاديمير پۋتين اياتوللا ءالي حامەنەيدىڭ باس كەڭەسشىسى ءالي لاريدجانمەن يراننىڭ يادرولىق باعدارلاماسى جونىندە كەلىسسوزدەر جۇرگىزگەن. كەزدەسۋ تۋرالى الدىن الا رەسمي اقپارات ايتىلعان جوق.

– لاريدجاني تاياۋ شىعىستا شيەلەنىسىپ بارا جاتقان جاعداي مەن يراننىڭ يادرولىق باعدارلاماسى توڭىرەگىندەگى احۋالعا قاتىستى ويلاردى جەتكىزدى. پۋتين بولسا رەسەيدىڭ ايماقتاعى جاعدايدى تۇراقتاندىرۋ جانە يراننىڭ يادرولىق ماسەلەسىن ساياسي جولمەن رەتتەۋ جونىندەگى كوپشىلىككە بەلگىلى ۇستانىمىن قۋاتتادى، – دەدى رەسەي پرەزيدەنتىنىڭ ءباسپاسوز حاتشىسى دميتري پەسكوۆ.

ماسكەۋ اياتوللا رەجيمىمەن دوستىق قارىم-قاتىناس ۇستانعانىمەن، ماۋسىمدا يزرايل مەن اقش يرانعا قارسى اسكەري وپەراتسيا جاساعاندا رەسەي تەگەرانعا ناقتى ءارى كەسىمدى قولداۋ بىلدىرمەدى.

يزرايل بۇل وپەراتسيانى يراننىڭ يادرولىق باعدارلاماسىن جويۋ جانە تەگەراننىڭ ايماقتاعى قارۋلى توپتارىنىڭ بەلسەندىلىگىن باسۋ دەپ اتادى. ال اقش تەل-اۆيۆ وپەراتسياسىن قولداعان.

12 كۇنگە سوزىلعان اسكەري وپەراتسيادا تاراپتار ءبىر-ءبىرىن اتقىلاعان. كەيىننەن يزرايل دە، يران دا اتىستى توقتاتۋ تۋرالى كەلىسىمگە كەلگەن.

Abai.kz