ورتا ازيادا تەڭدەسى جوق اسپالى كوپىر سەمەيدىڭ تورىنەن ورىن الىپ، ماقتانىشقا اينالعالى دا 25 جىل بولىپتى. وسى شيرەك عاسىر ۋاقىتتىڭ ەكىنشى جارتىسىندا ايتۋلى كوپىردىڭ كۇيى كۇيرەي باستاعان. جول تابانى ىدىرىپ ءتىپتى ىڭىرشاعى شىعىپ كەتتى. سوڭعى سەگىز جىلدا نەشە مارتە جوندەۋ جۇمىستارى دا جۇرگىزىلدى. جوندەگەن سايىن جۇدەي تۇسكەنى دە راس. ونىڭ سەبەبى ول جوندەۋ جۇمىستارىندا ءتيىستى تەحنولوگياسى قولدانىلمادى. تايىنشانىڭ تاناۋىن جۇدىرىقپەن تەسكەندەي تەمىرگە اسفالت جاپسىرىپ اۋرە بولدىق. اۋىر سالماققا شىداس بەرمەگەن اسفالت ءار جەردەن جيرىلىپ شودىرايىپ قالدى. كوپىردىڭ ءبىر باسىنان ەكىنشى باسىنا جەتكەنشە شوپىرلار شودىر مەن كەدىرلەردەن بىرەسە ىرعىپ، بىرەسە سىرعىپ اۋرە بولاتىن. كولىك تىزگىندەۋشىلەردىڭ ءبارى بىردەي سابىرلى دەيمىسىڭ، ءتىلى مەن زىلىنە ەرىك بەرەتىندەر قانشاما…

ياپىر-اي، ماقانىشىمىزعا اينالعان ءاپ-ادەمى كوپىرىمىزدىڭ بۇدان ارعى جاعدايى نە بولار ەكەن دەپ الاڭداپ كەلدىك. «بۇعان جەرگىلىكتى اسفالت جارامايدى، بانەدە-تۇگەن دەگەن» اڭگىمەلەر دە تارادى. ايتسا ايتقانداي، توسەگەن اسفالتتار سىرىلىپ تابان تەمىرلەر جالتىراپ اشىق قالدى. بۇل كورىنىستەر بىرەۋگە ازاپ، بىرەۋگە مازاق بولعانى دا شىندىق.
تاياۋدا، 1,5 اي بۇرىن اسپالى كوپىردىڭ ءبىر جاعى جوندەۋ جۇمىسىنا جابىلعان كەزدە ەل ىشىنەن «ءاي، قالاي بولادى ەكەن، جوندەگەندەرىن كورىپ ءجۇرمىز عوي» دەگەندەي، ناتيجەسىنە سەنەر-سەنبەسىن بىلمەگەن. بىراق، بۇرىنعىداي ەمەس بۇل جولى قارقىن مۇلدە بولەك بولدى. «ءىستىڭ بىتكەنىنەن ەمەس، باستاعانىنان ءبىل» دەگەندەي اسپالى كوپىردىڭ اتشاپتىرىم الاڭىنداعى ەسكى اسفالت تۇگەلدەي ءسۇرىلىپ تاستالدى. وبلىس باسشىسى بەرىك ءۋالي جۇمىس بارىسىن ءوزى باقىلاپ، قولدانىلاتىن ماتەريالداردى قولىمەن ۇستاپ كوردى. كوپشىلىك كوڭىلىندەگى كۇدىك سەيىلدى، تەك از ۋاقىت كەتپەلىسكە شىدامدىلىق تانىتۋ عانا قالعان. سولاي بولدى دا، ءبىر ايدىڭ ارجاق-بەرجاعىندا اسپالى كوپىرىمىز العاشقى اشىلۋ سالتاناتىنداعىداي تەپ-تەگىس، ءتۇپ-ءتۇزۋ بولىپ شىعا كەلدى! بۇل ءوزى تاڭقالارلى جاعداي، وسى ۋاقىتقا دەيىن ەشكىم تولىققاندى قول جەتكىزە الماعان جەتىستىك. نەگىزىندە، بۇل حالىق وبلىس اكىمىنە، وبلىس اكىمى تاپسىرىستى تياناقتى ورىنداعان مەردىگەرگە العىس ايتاتىن كۇن! بارىمىزدى باعالاپ، نارىمىزدى دارالاي بىلسەك نەسى ايىپ؟ «جول ازابىن جۇرگەن بەلەر» دەگەندەي باسقانى قويىپ سول كوپىرمەن سەلكىلدەپ وتپەگەن سەيمەيلىكتەر كەمدە كەم شىعار.

ءيا، اسپالى كوپىردىڭ ارقاسىن جاۋار قىلعان جالعىز سەمەيلىكتەر ەمەس، تارانزيتتىك جول بولعاندىقتان بۇل جولاقپەن وتپەيتىن كولىك جوق. جىلىنا جەتى ءجۇز مىڭداي تەحنيكا قاتىنايدى دەپ ەستىدىك. ونىڭ قانشا پايىزى اسا اۋىر ساماقتى ەكەنىن كىم ءبىلىپتى. سولاي دەگەنمەن، اينالىپ كەلگەندە بۇل الىپ نىساننىڭ جاۋاپكەرشىلىگى جەرگىلىكتى اكىمشىلىككە كەلىپ تۇسەدى. وسى ۋاقىتقا دەيىنگى كوپىرگە قاتىستى ايتىلعان سىن، كوتەرىلگەن شۋ، جوندەۋىنە دەگەن نارازىلىقتىڭ بارىنە ەندى نۇكتە قويلسا كەرەك. كوزگە كورىنىپ تۇرعان ناتيجە – اباي وبلىسى اكىمى بەرىك ءۋاليدىڭ ەل الدىندا بەرگەن ۋادەسىنىڭ ءىس جۇزىندە جۇزەگە اسىپ جاتقاندىعى. بۇل قاتارداعى جوندەۋ جۇمىستارىنىڭ ءبىرى ەمەس، تۇرپاتى بولەك كوپىردىڭ تەحنولوگياسى دا تىم كۇردەلى. سول كۇردەلى ماسەلەدەن ىرگەلى ناتيجە شىعارعان ازاماتتىڭ الداعى ىستەرىنە دە ساتتىلىك تىلەپ قويساق نەسى ايىپ. كوپىردىڭ «كوزىن اشقان» ىسكەرىك ءالى دە كوپ نارسەنىڭ شىرايىن كىرگىزەتىنىنە ءۇمىتىمىز مول.

قايرات زەكەنۇلى

Abai.kz