"رەسەيلىكتەر پرەزيدەنت ترامپپەن كەزدەسۋگە نيەت ءبىلدىردى جانە پرەزيدەنت پۋتينمەن دە، زەلەنسكيمەن دە كەزدەسۋگە اشىق" دەدى اق ءۇيدىڭ ءباسپاسوز حاتشىسى كارولاين ليۆيتت.

Fox News ءتىلشىسى پيتەر ءدۋسيدىڭ سوزىنشە، پۋتين كرەملدە بولعان اقش-تىڭ ارنايى ۋاكىلى ستيۆ ۋيتكوففقا ترامپپەن كەزدەسكىسى كەلەتىنىن ايتقان، ۋيتكوفف مۇنى اقش پرەزيدەنتىنە جەتكىزگەن.

ترامپتىڭ ءوزى اق ۇيدەگى بريفينگ كەزىندە "كەزدەسۋ جاقىندا ءوتۋى ابدەن مۇمكىن" دەدى. ول ۋكرايناداعى سوعىس قالاي اياقتالۋى مۇمكىن دەگەن سۇراققا ناقتى جاۋاپ بەرمەدى. ترامپتىڭ سوزىنشە، رەسەي مۇنايىن ساتىپ الاتىن ءۇندىستان مەن وزگە ەلدەرگە قارسى جاناما سانكتسيا سالىنۋى مۇمكىن. اراسىندا قىتاي دا بار.

"مەنىڭ ارنايى ۋاكىلىم ستيۆ ۋيتكوفف قازىر عانا رەسەي پرەزيدەنتى ۆلاديمير پۋتينمەن ءونىمدى كەزدەسۋ وتكىزىپ كەلدى. ەداۋىر ىلگەرىلەۋشىلىك بار. وسىدان كەيىن مەن ەۋروپاداعى كەيبىر ارىپتەستەرىمە حابار بەردىم. بارلىعى سوعىس اياقتالعانىن قالايدى جانە الداعى كۇندەرى مەن اپتالاردا سوعان كۇش سالامىز" دەپ جازدى ترامپ سارسەنبى كۇنى Truth Social جەلىسىندە.

دەرەككوزدەرگە سۇيەنگەن NYT تا مۇنداي كەزدەسۋ "كەلەسى اپتادا ءوتۋى مۇمكىن" دەپ جازدى.

ترامپ پەن ءپۋتيننىڭ كەزدەسۋ ورنى ازىرگە بەلگىسىز. ولار كاتار نەمەسە شۆەيتساريادا كەزدەسۋى مۇمكىن. CNN دەرەككوزدەرى ەكى باسشىنىڭ ءسامميتىن قىسقا ۋاقىت ارالىعىندا ۇيىمداستىرۋ سالۋ وڭاي ەمەس دەپ سانايدى.

AFP-ءدىڭ جازۋىنشا، پۋتين مەن ۋيتكوففتىڭ كەزدەسۋىنە ارنالعان اڭگىمەگە ترامپ پەن زەلەنسكيدەن بولەك ناتو باس حاتشىسى مارك ريۋتتە، گەرمانيا كانتسلەرى فريدريح مەرتس، ۇلىبريتانيا پرەمەر-ءمينيسترى كير ستارمەر جانە فينليانديا پرەزيدەنتى الەكساندر ستۋبب قاتىسقان.

NYT جازۋىنشا، پۋتينمەن كەزدەسۋدەن كەيىن ترامپ پۋتين جانە زەلەنسكي قاتىساتىن ۇشجاقتى كەزدەسۋدى دە وتكىزۋدى جوسپارلاپ وتىر. بۇل كەزدەسۋگە ەۋروپا ەلدەرىنىڭ باسشىلارى قاتىسپايدى دەدى باسىلىم دەرەككوزى. ناتو جانە ۋكراينا وكىلدەرى بۇل مالىمەتتى راستاۋدان باس تارتقان.

رەسەي پرەزيدەنتىنىڭ سىرتقى ساياسات جونىندەگى كومەكشىسى يۋري ۋشاكوۆ ماسكەۋ مەن ۆاشينگتون الداعى كۇندەرى "جوعارى دەڭگەيدەگى كەزدەسۋ وتكىزۋگە" كەلىسكەنىن مالىمدەدى. قازىر سامميتكە دايىندىق ءجۇرىپ جاتىر، ورنى تاڭدالعان دەدى ول.

پۋتين مەن ترامپتىڭ كەزدەسۋى مۇمكىن ەكەنى اقش پرەزيدەنتىنىڭ ارنايى ۋاكىلى ستيۆ ۋيتكوففتىڭ ماسكەۋگە ساپارىنان كەيىن ايتىلا باستادى. امەريكا اقپارات قۇرالدارى دەرەككوزدەرگە سۇيەنە وتىرىپ، كەزدەسۋ كەلەسى اپتادا ءوتۋى مۇمكىن ەكەنىن جازعان.

ۋشاكوۆتىڭ سوزىنشە، ءسامميتتى وتكىزۋدى امەريكا جاعى ۇسىنعان. ال امەريكا دەرەككوزدەرى بۇعان لەيىن پۋتين مەن ترامپتىڭ كەزدەسۋىن كرەملدىڭ ءوزى ۇسىنعانىن جازعان. اقش مەملەكەتتىك حاتشىسى ماركو رۋبيو بەيسەنبى كۇنى Fox News ارناسىنا سامميت الدىندا ۆاشينگتون مەن ماسكەۋ "پوزيتسيالارىن تولىق پىسىقتاپ الۋى كەرەك" دەدى.

ۋشاكوۆتىڭ سوزىنشە، ماسكەۋ ازىرگە ۇشجاقتى كەزدەسۋگە – پۋتين – ترامپ – زەلەنسكي كەزدەسۋىنە دايىندالىپ جاتپاعانىن ايتتى.

"بۇل نۇسقا ناقتى تالقىلانعان جوق. رەسەي جاعى بۇعان تۇسىنىكتەمە بەرمەدى" دەدى ديپلومات.

Abai.kz