قازاق تىلىندە سويلەۋدى تالاپ ەتكەن تۇركىستان تۇرعىنى FlyArystan-دى تاۋبەسىنە ءتۇسىردى... 17 تامىزدا تۇركىستان حالىقارالىق اۋەجايىندا FS7162 رەيسىنە جولاۋشىلار وتىرعىزۋ كەزىندە كۇتپەگەن جاعداي ورىن الدى. بۇل تۋرالى Erteńmedia تەلەگرام ارناسى جازدى.

ۇشاققا مىنگەلى تۇرعان ايەل جولاۋشى اۋەكومپانيا قىزمەتكەرىنەن قازاق تىلىندە جاۋاپ بەرۋدى تالاپ ەتكەن.

سوزدەن ءسوز شىعىپ، داۋ ۋشىعىپ، جولاۋشى اۋەجاي قىزمەتكەرىن يتەرىپ جىبەرگەنى حابارلاندى. ادەتتەگى پىكىرتالاس تەز ارادا ۇلكەن داۋعا اينالىپ، رەيستىڭ ۇشۋىنا ءۇش ساعاتقا جۋىق ۋاقىتقا بوگەت بولعان.

ايەل جولاۋشىنىڭ ايتۋىنشا، اۋەجاي قىزمەتكەرلەرى وزىنە مەملەكەتتىك تىلدە جاۋاپ بەرۋدەن باس تارتقان. وسى ءساتتى وزگە جولاۋشىلار ۆيدەوعا ءتۇسىرىپ، الەۋمەتتىك جەلىلەردە تاراتقان.

FlyArystan وكىلدەرى كۋاگەرلەردەن تۇسىرىلگەن ۆيدەونى ءوشىرۋدى تالاپ ەتكەننەن كەيىن، نارازىلىق ودان ءارى كۇشەيە تۇسكەن. الايدا اۋەكومپانيا وقيعانىڭ ءمان-جايىن باسقاشا ءتۇسىندىردى: «وقيعا ورنىنا ءتيىستى قىزمەتتەر شاقىرىلدى. FlyArystan-نىڭ جەردەگى قىزمەت وكىلى ماسەلەنىڭ ءمان-جايىن انىقتاۋ ءۇشىن ۇشاق بورتىنا وتىرعىزۋ اياقتالار ساتتە كەلگەن بولاتىن. ول جولاۋشىعا ءتارتىپ ەرەجەلەرىن تۇسىندىرمەك بولدى. الەمجەلىدە تاراپ جاتقان ۆيدەو تولىق وقيعانى كورسەتپەيدى، جاعدايدىڭ تەك ءبىر بولىگىن عانا قامتىعان. اۋەجاي قىزمەتكەرى تۇسكەن بەينەجازبانى ءوشىرۋ تۋرالى ءوتىنىش تەك جاعدايدى ۋشىقتىرماۋعا باعىتتالعان ەدى»، – دەلىنگەن كومپانيا مالىمدەمەسىندە.

جولاۋشىلاردىڭ ايتۋىنشا، رەيستىڭ ءۇش ساعاتقا جۋىق كەشىگۋىنە ءدال وسى جانجال سەبەپ بولعان. تاراعان ۆيدەودا ايەلدىڭ مەملەكەتتىك ءتىل ماسەلەسىمەن قاتار رەيستىڭ كەشىگۋىنە بايلانىستى دا اشۋلانعانى كورىنەدى.

كەيىن اۋەكومپانيا وكىلى جولاۋشىلاردان كەشىرىم سۇراپ، ۇشاق الماتىعا بەت العان.

Abai.kz