ترامپتىڭ تىراش ارەكەتتەرى تىعىرىققا تىرەلدى: پۋتين بارىنە «جوق» دەدى...

اپتا باسىندا اقش پرەزيدەنتى دونالد ترامپ رەسەي مەن ۋكراينا اراسىنداعى سوعىستى تەز ارادا بەيبىت جولمەن توقتاتا الاتىنىن ايتقان ەدى. الايدا بىرنەشە كۇننەن سوڭ ول رايىنان قايتىپ، كيەۆ رەسەي اۋماعىنا سوققى جاسامايىنشا سوعىستا جەڭىسكە جەتە المايتىنىن مالىمدەدى. The Wall Street Journal جازعانداي، بۇل ترامپتىڭ ديپلوماتيالىق باستاماسىنا قاتىستى باستاپقى ءوپتيميزمىنىڭ سونگەنىن كورسەتەدى.

ترامپتىڭ ۆلاديمير پۋتين مەن ۆلاديمير زەلەنسكيدى ءبىر ۇستەل باسىنا وتىرعىزۋ جوسپارى دا جۇزەگە اسپاي قالدى. ءتىپتى باتىس بىتىمگەرلەرىن ۋكرايناعا جىبەرۋ تۋرالى ۇسىنىسقا دا كرەمل ءۇزىلدى-كەسىلدى قارسى بولدى.

WSJ دەرەگىنشە، ساتسىزدىكتىڭ سەبەبى – تاراپتاردىڭ كوزقاراسىنداعى تۇبەگەيلى ايىرماشىلىقتار. ساراپشىلار ترامپتىڭ يمپروۆيزاتسياعا بەيىم ەكەنىن، جەكە قارىم-قاتىناسقا سەنەتىنىن ايتسا، پۋتين ءاردايىم قارسىلاسىن الداۋعا تىرىساتىنىن جانە تەك ءوز دەگەنىمەن جۇرەتىنىن اتاپ وتەدى. «ترامپ سوعىستى تەزىرەك توقتاتقىسى كەلەدى، ال پۋتين كەلىسسوزدى سوزىپ، ۇرىس الاڭىندا ارتىقشىلىق الۋعا ۇمىتتەنەدى»، – دەپ جازادى باسىلىم.

كەي ساراپشىلار ترامپتىڭ سوڭعى مالىمدەمەسىن ۋكرايناعا رەسەيگە سوققى جاساۋعا شاقىرۋدان گورى قىسىم تەتىگىن قايتا قالپىنا كەلتىرۋ امالى رەتىندە باعالاپ وتىر. اقش-تىڭ رەسەي مەن ناتو-داعى بۇرىنعى ەلشىسى الەكساندر ۆەرشبوۋ: «بۇل – ترامپتىڭ باستى السىزدىگىن تۇسىنگەنى. ەگەر اسكەري قولداۋ بولماسا، كەز كەلگەن ستراتەگيا بوس ءسوز بولىپ قالادى»، – دەيدى.

فيونا حيلل، ترامپ تۇسىندا اق ءۇيدىڭ رەسەي بويىنشا اعا ديرەكتورى بولعان، ونىڭ پۋتينمەن جانە ەۋروپا كوشباسشىلارىمەن كەزدەسۋلەرى ۇدەرىستى شاتاستىرىپ جىبەرگەنىن ايتادى. «قازىر ءبارى، سونىڭ ىشىندە پۋتين دە، ترامپتى باسقارۋعا تىرىسىپ جاتىر. رەسەيلىكتەر ديپلوماتيالىق تەرميندەردى ءوز ماعىناسىندا قولدانادى، ال ترامپ ونىڭ ءمانىن تولىق تۇسىنبەيدى. پۋتين ونى ادەيى يلاندىرعان بولۋى مۇمكىن»، – دەيدى ول.

اقش-تىڭ ۋكراينا بويىنشا بۇرىنعى ارنايى وكىلى كۋرت ۆولكەر دە پەسسيميستىك پىكىر ءبىلدىردى: «العا جىلجۋ جوق. ءبىز ەكى اپتا بۇرىن دا، جارتى جىل بۇرىن دا وسىنداي كۇيدە بولعانبىز. كەلىسىم بولمايدى. پۋتين ەشقاشان كەلىسپەيدى»، – دەدى ول.

سوعان قاراماستان، ترامپ پۋتين مەن زەلەنسكيدىڭ جەكە كەزدەسۋىن ۇيىمداستىرۋعا تىرىسۋدا. اق ءۇي كەلىسىمىن بەرسە دە، كرەملدىڭ بۇعان دايىن ەكەنىنە سەنىم از. ABC News جازعانداي، ءتىپتى ۇشجاقتى كەزدەسۋ وتكىزۋ – ءوزى ءبىر ديپلوماتيالىق جەتىستىك بولار ەدى. بىراق قيراعان ەل مەن مىڭداعان قۇرباندى ەسكەرسەك، جالعىز رەسمي ديالوگ جەتكىلىكسىز.

رەسەي رەسمي وكىلدەرى بۇل مۇمكىندىكتى سالقىن قابىلداپ وتىر. كيەۆ مۇنى ءپۋتيننىڭ ديالوگقا نيەتى جوقتىعىنىڭ ايقىن بەلگىسى رەتىندە كورەدى. ۋكراينا ۇكىمەتىنە جاقىن دەرەككوزدىڭ ايتۋىنشا، «پۋتين بارىنە «جوق» دەپ وتىر».

«ءبىز ۇنەمى «ءيا» دەپ، سىندارلى قادامدار جاسادىق. ترامپقا دا بەيبىتشىلىكتى قالايتىنىمىزدى كورسەتتىك. بىراق ءپۋتيندى كەلىسسوزگە كوندىرۋدىڭ جالعىز جولى – كۇش. اقش پەن باتىس قاتال قىسىم جاسامايىنشا، ەشقانداي كەزدەسۋ ناتيجە بەرمەيدى»، – دەيدى ول.

Abai.kz