سۋ رەسۋرستارى جانە يرريگاتسيا مينيسترلىگى سۋارۋ ماۋسىمىنىڭ قورىتىندىسى بويىنشا قىزمەتتىك تەكسەرىس جۇرگىزەدى.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۆەگەتاتسيا كەزەڭى ماسەلەسى بويىنشا اپپارات كەڭەسىن وتكىزدى. ۆەدومستۆو باسشىسى سۋارۋ ماۋسىمىنىڭ قورىتىندىسى بويىنشا قىزمەتتىك تەكسەرىس جۇرگىزۋدى تاپسىردى.

«ۆەگەتاتسيا كەزەڭى اياقتالۋعا جاقىن. بيىل ول كۇردەلى جاعدايدا ءوتىپ جاتىر. اپتاپ ىستىق پەن جاۋىن-شاشىننىڭ بولماۋى سۋدى كوبىرەك تۇتىنۋعا الىپ كەلدى. كەيبىر وڭىرلەردە ءتيىستى باقىلاۋ جۇرگىزىلمەي، ىلعالدى كوپ قاجەت ەتەتىن داقىلداردىڭ جوسپاردان تىس ەگىلۋ فاكتىلەرى تىركەلدى. بۇل جاعداي ەلىمىزدىڭ وڭتۇستىگىندەگى سۋ شارۋاشىلىعى احۋالىنا ايتارلىقتاي اسەر ەتتى. سوندىقتان مۇنداي ولقىلىقتاردىڭ قايتالانباۋى ءۇشىن ۆەگەتاتسيا كەزەڭى قورىتىندىسى بويىنشا قىزمەتتىك تەكسەرىس جۇرگىزۋدى تاپسىرامىن»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

قازىرگى تاڭدا الماتى مەن جەتىسۋ وبلىستارىندا ۆەگەتاتسيا كەزەڭى تۇراقتى ءوتىپ جاتىر. الماتى وبلىسىندا سۋ الۋ كولەمى 1,2 ملرد تەكشە مەتردى قۇراپ، 136 مىڭ گەكتار ەگىس القابى سۋارىلدى. ال جەتىسۋ وبلىسىندا سۋ الۋ كولەمى 1 ملرد تەكشە مەتردى قۇراپ، 132 مىڭ گەكتار جەر سۋارىلدى.

ۆەگەتاتسيا كەزەڭىنىڭ سوڭىنا دەيىن بۇل ەكى وبلىستا قوسىمشا شامامەن 150 مىڭ تەكشە مەتر سۋ الۋ جوسپارلانعان. بۇل شارۋالاردىڭ قاجەتىن تولىق قامتاماسىز ەتەدى. قازىرگى ۋاقىتتا الماتى جانە جەتىسۋ وبلىستارىندا قانت قىزىلشاسى، سويا، جۇگەرى، كوپجىلدىق شوپتەر مەن باقشالاردى سۋارۋ جالعاسىپ جاتىر. بۇل وڭىرلەردە سۋارۋ جۇمىستارى قىركۇيەك ايىنىڭ سوڭىنا دەيىن اياقتالادى دەپ كۇتىلىپ وتىر.

جامبىل وبلىسىندا ۆەگەتاتسيا كەزەڭى جوسپارعا سايكەس ءوتىپ جاتىر. «قازسۋشار» رمك-نىڭ جەرگىلىكتى فيليالى 78 925 گەكتار جەردى سۋارۋ ءۇشىن 3 902 كەلىسىمشارت جاساسقان، ونىڭ 70 000 گەكتارى سۋارىلعان. قالعان 8 925 گەكتار قانت قىزىلشاسى، جۇگەرى، كوكونىستەر مەن جوڭىشقا ەگىلگەن جەرلەردى سۋارۋ قاجەت.

شۋ، تالاس وزەندەرىنەن جانە تاسوتكەل سۋ قويماسىنان الىنعان سۋ كولەمى - 897 ملن تەكشە مەتر. وبلىستا كانالدار ارقىلى كەزەكپەن سۋ بەرۋ ۇيىمداستىرىلعان. ول ەگىس القاپتارىن قىركۇيەكتىڭ ورتاسىنا دەيىن سۋمەن قامتاماسىز ەتۋگە مۇمكىندىك بەرەدى.

قىزىلوردا وبلىسىندا سۋ الۋ كولەمى – 3,476 ملرد تەكشە مەتر. ايماقتا كۇرىشتىڭ ماساقتانۋ كەزەڭى كەستەگە ساي ءوتىپ جاتىر. ەگىستىكتەردى قوسىمشا سۋمەن قامتاماسىز ەتۋ ءۇشىن وبلىستاعى «قازسۋشار» فيليالى مەن شارۋا قوجالىقتارى 357 سورعى ستانتسياسىن پايدالانۋدا.

تۇركىستان وبلىسىندا سۋ الۋ كولەمى – 3,27 ملرد تەكشە مەتر. بۇگىندە شاردارا اۋدانىندا نەگىزگى داقىلداردى سۋارۋ جۇمىستارى اياقتالۋعا جاقىن، سۋعا دەگەن سۇرانىس ازايعان، ءونىم جوعالتۋ قاۋپى جوق. ماقتاارال جانە جەتىساي اۋداندارىندا 109,7 مىڭ گەكتار جەر سۋارىلعان. اۋىل شارۋاشىلىعى داقىلدارىن سۋارۋ جۇمىستارى 10 قىركۇيەككە دەيىن تولىق اياقتالادى دەپ كۇتىلىپ وتىر.

قوسىمشا شارالار رەتىندە قىزىلوردا جانە تۇركىستان وبلىستارىندا كانالدار ارقىلى كەزەكپەن سۋ بەرۋ كەستەسى بەكىتىلدى، 169 تىك درەناج جۇيەسى قوسىلدى، سۋ شارۋاشىلىعى جاعدايىنا تۇراقتى مونيتورينگ جۇرگىزىلىپ، كوللەكتورلى-درەناجدىق سۋ قايتا پايدالانىلىپ جاتىر. وسى شارالاردىڭ ناتيجەسىندە ۆەگەتاتسيا كەزەڭى ءونىم شىعىنىنسىز اياقتالادى دەپ كۇتىلۋدە.

Abai.kz