The New York Times باسىلىمىندا جۋرناليست دەيۆ فيلليپس پەن مەتيۋ كوۋلدىڭ ەكسكليۋزيۆتى ماقالاسى جارىق كوردى. ماقالادا اقش-تىڭ  SEAL Team 6 ارنايى جاساعىنىڭ كحدر اۋماعىندا قۇپيا وپەراتسيا وتكىزبەك بولعان ارەكەتى جايلى جازىلعان. بۇل تۋرالى Mezgil.kz اقپاراتتىق پورتالى جازدى. 

2019 جىلى اقش-تىڭ ارنايى جاساعى كحدر اۋماعىنا كىرىپ، تىڭدايتىن قۇرىلعى ورناتۋعا تىرىستى. وپەراتسيانى ترامپ اكىمشىلىگى ماقۇلداعان بولاتىن. ارنايى جاساق ساربازدارى تەڭىز ارقىلى سولتۇستىك كورەيانىڭ اۋماعىنا جەتىپ، تاستى جاعالاۋعا توقتايدى. بۇل اسا قۇپيا ميسسيا ەدى.

وپەراتسيا قارساڭىندا سولتۇستىك كورەيا مەن اقش تاراپى پحەنياننىڭ يادرولىق باعدارلاماسىنا قاتىستى كەلىسسوز جۇرگىزىپ جاتقان بولاتىن. كەلىسسوزدەر تىم كۇردەلى فورماتتا ءوتتى جانە كەز كەلگەن ساتتە جاعداي ۋشىعىپ، كيكىلجىڭ قاقتىعىس فورماتىنا اۋىسۋى ىقتيمال ەدى. سول ءۇشىن اقش تاراپى سولتۇستىك كورەيا اۋماعىنا تىڭدايتىن قۇرىلعى ورناتىپ، اقپارات جيناۋدى ويلاستىردى.

2019 جىلى ترامپ كيم چەن ىنعا يادرولىق باعدارلاما ماسەلەسىن رەتتەۋ بويىنشا ۇسىنىس جاسادى. سەبەبى، 2018 جىلى كحدر بىرنەشە مارتە زىمىران سىناعىن وتكىزىپ، يادرولىق وقتۇمسىقتى الىپ ۇشۋعا قابىلەتتى زىمىران شىعاراتىنىن ايتتى. اقش بۇل ارەكەت وڭتۇستىك كورەيا مەن جاپونيا ءۇشىن اسا قاۋىپتى دەپ سانادى جانە ماسەلەنى ديپلوماتيالىق جولمەن شەشۋگە تىرىستى.

دەگەنمەن، ەكى ەلدىڭ كەلىسسوز قارساڭىندا اقش-تىڭ بارلاۋ قىزمەتىنىڭ وكىلدەرى سولتۇستىك كورەيا باسشىلىعىن تىڭدايتىن قۇرىلعى قاجەت ەكەنىن ايتتى. قۇرىلعى سولتۇستىك كورەيا اۋماعىنا ورناتىلۋى ءتيىس ەدى.

ميسسيانى ورىنداۋعا SEAL Team 6 ارنايى جاساعى تاڭدالىپ الىندى. اتالعان جاساق اتىشۋلى لاڭكەس ۋساما بەن لادەندى جويعان وپەراتسياعا قاتىسقان بولاتىن. ميسسيانى ورىنداۋ وتە قيىن ەدى. سەبەبى كحدر اۋماعىندا اقش-تىڭ ارنايى تىڭشىلارى بولعان جوق جانە ارنايى جاساق ساربازدارى قاۋىپتى ايماققا جەڭىل قارۋدى اسىنىپ عانا كىرۋ شەشىمى قابىلداندى.

2005 جىلى SEAL جاساعىنىڭ ساربازدارى سولتۇستىك كورەيا اۋماعىنا ءبىر مارتە كىرگەن بولاتىن. بۋشتىڭ بۇيرىعى بويىنشا ارنايى جاساق وكىلدەرى سولتۇستىك كورەيا جاعالاۋىنا كىشى سۇڭگۋىر قايىقپەن جەتىپ، كحدر اۋماعىنا ءوتتى. اتالعان ميسسيا بارىسىندا ارنايى جاساق قانداي تاپسىرمانى ورىنداعانى اسكەري قۇپيا سانالادى، الايدا «ميسسيا ءساتتى ورىندالدى» دەيدى ساراپشىلار. اراعا 14 جىل سالىپ، ارنايى جاساق سول ميسسيانى قايتالاۋعا تىرىستى.

SEAL ساربازدارىن سولتۇستىك كورەيا جاعالاۋىنا سۇڭگۋىر قايىق اپارۋى ءتيىس ەدى. ارتىنشا ولار ۇلكەندىگى كيتپەن بىردەي كىشى سۇڭگۋىر قايىقتارعا وتىرىپ، كحدر جاعالاۋىنا جاقىن تۇستان ءتۇسىپ قالدى دا، ەكى ساعاتقا جۋىق ۋاقىت اكۆالانگتىڭ كومەگىمەن ءجۇزىپ، جاعالاۋعا جەتتى.

ميسسيا اسا قۇپيا بولعاندىقتان، دروندار قولدانىلمادى. ساربازدارعا اقپارات سپۋتنيكتىك ءتۇسىرىلىم ارقىلى بەرىلىپ وتىردى. وپەراتسيا تاڭ قىلاڭ بەرگەن ساتتە باستالدى، ال cاربازدار تۇندە كورەتىن كوزىلدىرىك كيگەن بولاتىن.

گيدروكوستيۋم كيگەن ساربازدار سولتۇستىك كورەيا جاعالاۋىنا جەتىپ، تىڭدايتىن قۇرىلعىنى ەل اۋماعىنا ءوتىپ، ورناتۋدى ويلاستىرعان ساتتە، كۇتپەگەن تۇستان بەلگىسىز قايىق كورىندى. ارنايى جاساق وكىلدەرى قايىققا وق جاۋدىرا كەتتى. قايىقتاعى ءۇش ادام دا ءولتىرىلدى. الايدا ولار ساربازدار ەمەس، جاعالاۋ ماڭىندا زاڭسىز بالىق اۋلاپ جۇرگەن كحدر-ءدىڭ بالىقشىلارى ەدى. بالىقشىلاردىڭ دەنەسىن سولتۇستىك كورەيا ساربازدارى تاۋىپ، ساراپتاما جۇرگىزبەۋى ءۇشىن، ارنايى جاساق وكىلدەرى ولاردىڭ دەنەلەرىن سۋعا باتىرىپ جىبەردى. ارنايى جاساق قۇرىلعىنى ورناتۋ يدەياسىنان باس تارتتى. سەبەبى اتىلعان وقتىڭ داۋسىن كحدر شەكاراشىلار ەستۋى مۇمكىن ەدى. سول ءۇشىن دە جىلدام ارادا كحدر جاعالاۋىنان ەۆاكۋاتسيالاندى.

ميسسياعا SEAL جاساعىنىڭ 8 ساربازى قاتىستى. كەيىن ولاردىڭ بارلىعى دەرلىك ماراپاتقا يە بولدى. ال وپەراتسياعا قاتىستى اقپاراتتار قۇپيالاندىرىلدى. بايدەن بيلىگى اتالعان وپەراتسياعا قاتىستى بىرنەشە تەكسەرۋ جۇمىستارىن وتكىزدى. تەكسەرىس ناتيجەلەرى دە قۇپيالاندىرىلعان بولاتىن.

Abai.kz