سوعىس ءورتى تەك ۋكراينا اۋماعىمەن شەكتەلىپ وتىرعان جوق. تۇندە رەسەي جاپپاي دروندار مەن زىمىراندار ارقىلى ۋكراينانىڭ باتىسىن اتقىلادى.

الايدا سوعىس قۇرالدارىنىڭ ءبىر بولىگى پولشا اۋماعىنا ءوتىپ كەتكەن. پولشا اسكەرى دەرەۋ اۋەگە F-16 جانە F-35 ۇشاقتارىن كوتەرىپ، بىرنەشە دروندى اتىپ ءتۇسىردى. وسىنىڭ سالدارىنان پولشا اۋماعىندا دابىل جۇيەسى ىسكە قوسىلىپ، ءتورت اۋەجايدىڭ جۇمىسى ۋاقىتشا توقتادى.

بۇل وقيعا حالىقارالىق دەڭگەيدە ۇلكەن الاڭداۋشىلىق تۋدىردى. اقش كونگرەسسمەنى، رەسپۋبليكاشىل دجو ۋيلسون رەسەيدىڭ ناتو مۇشەسى پولشاعا قارسى ارەكەتىن «سوعىس اكتىسى» دەپ باعالاپ، ماسكەۋگە قارسى جاڭا سانكتسيالار ەنگىزۋ قاجەتتىگىن مالىمدەدى.

«ءبىز سوعىستىڭ باستالعانىنان بەرى رەسەي تاراپىنان ەۋروپا اۋە كەڭىستىگىنىڭ ەڭ اۋىر بۇزىلۋىنا كۋا بولدىق. بۇل كەزدەيسوق ەمەس، ادەيى جاسالعان ارەكەت دەگەنگە نەگىز بار. رەسەيدىڭ سوعىسى اياقتالىپ جاتقان جوق، كەرىسىنشە شيەلەنىسىپ بارادى. ءبىز ماسكەۋ ءۇشىن شىعىنداردى ارتتىرۋىمىز، ۋكراينانى قولداۋدى كۇشەيتۋىمىز جانە ەۋروپانىڭ قورعانىسىنا ينۆەستيتسيا سالۋىمىز كەرەك»، — دەدى ەۋروكوميسسيا باسشىسى كايا كاللاس.

ال پولشا پرەمەرى تۋسك اتالعان جاعداي بويىنشا ناتو جارعىسىنىڭ 4-بابىنا جۇگىنگىسى كەلەتىنىن ايتتى.

«4-باپ - تەرەڭىرەك ىنتىماقتاستىقتىڭ العىشارتتارى. بىزگە قۇرى سوزدەر جەتكىلىكسىز. ءبىز كونسۋلتاتسيالار كەزىندە الدەقايدا ۇلكەن قولداۋعا سەنەمىز. بۇل ءبىزدىڭ سوعىس ەمەس، بۇل تەك ۋكرايندىقتاردىڭ سوعىسى ەمەس، بۇل رەسەيدىڭ بۇكىل ەركىن الەمگە قارسى جاريالاعان سوعىسى»، - دەيدى پرەمەر-مينيستر تۋسك.

Abai.kz