دۇنيەجۇزىلىك پوشتا وداعىنىڭ 28-ءشى كونگرەسى اياسىندا، دۋباي قالاسىندا وتكەن سايلاۋ ناتيجەسىندە قازاقستان پوشتالىق وپەراتسيالار كەڭەسىنە مۇشە بولىپ سايلاندى.

داۋىس بەرۋ قورىتىندىسى بويىنشا ەلىمىز 110 داۋىس جيناپ، شىعىس ەۋروپا مەن سولتۇستىك ازيا وڭىرىنەن سايلانعان التى مەملەكەتتىڭ قاتارىنا ەندى. قازاقستانمەن بىرگە كەڭەسكە بولگاريا، پولشا، سەربيا، ۋكراينا جانە ازەربايجان كىردى.

پوشتالىق وپەراتسيالار كەڭەسى – دپو-نىڭ نەگىزگى قۇرىلىمدارىنىڭ ءبىرى. ول حالىقارالىق پوشتا ستاندارتتارىن ازىرلەۋ مەن ەنگىزۋگە، ەلەكتروندىق ساۋدانىڭ ترانسشەكارالىق اعىمدارىن دامىتۋعا، تسيفرلاندىرۋعا جانە جاھاندىق پوشتا لوگيستيكاسىنىڭ ساپاسىن ارتتىرۋعا جاۋاپتى.

قازاقستاننىڭ وسى كەڭەسكە سايلانۋى – ەلىمىزگە دەگەن الەمدىك قاۋىمداستىقتىڭ جوعارى سەنىمىن بىلدىرەدى. بۇل قادام ەلىمىزدىڭ جاھاندىق پوشتا كۇن ءتارتىبىن قالىپتاستىرۋداعى ءرولىن كۇشەيتىپ، جاڭا مۇمكىندىكتەرگە جول اشادى.

قازاقستان الداعى ۋاقىتتا وسى الاڭدى زاماناۋي تسيفرلىق شەشىمدەردى ىلگەرىلەتۋگە، ترانسۇلتتىق ەلەكتروندىق كوممەرتسيانى دامىتۋعا، پوشتا قىزمەتتەرىنىڭ تيىمدىلىگى مەن تۇراقتىلىعىن ارتتىرۋعا، سونداي-اق وڭىرلىك جانە حالىقارالىق ارىپتەستىكتى نىعايتۋعا بەلسەندى پايدالانۋدى كوزدەپ وتىر.

انىقتاما ءۇشىن: دۇنيەجۇزىلىك پوشتا وداعى (Universal Postal Union) – 1874 جىلى قۇرىلعان پوشتا سالاسىنداعى ەڭ كونە ءارى ءىرى حالىقارالىق ۇيىم. 1948 جىلدان بەرى بىرىككەن ۇلتتار ۇيىمىنىڭ مامانداندىرىلعان مەكەمەسى بولىپ تابىلادى. بۇگىندە وعان 192 مەملەكەت مۇشە، بۇل ۇيىمدى پوشتا الماسۋدىڭ عالامدىق ستاندارتتارى مەن قاعيدالارىن قالىپتاستىراتىن ماڭىزدى حالىقارالىق الاڭعا اينالدىرادى.

Abai.kz