قاسىم-جومارت توقاەۆ بۇۇ باس اسسامبلەياسى اياسىندا بىرقاتار ەكىجاقتى كەزدەسۋلەر وتكىزدى.

بۇۇ باس حاتشىسىمەن كەزدەسۋ

قاسىم-جومارت توقاەۆ بۇۇ باس حاتشىسى انتونيۋ گۋتەرريشپەن كەلىسسوز جۇرگىزىپ، ۇيىمنىڭ بەيبىتشىلىك پەن تۇراقتىلىقتى نىعايتۋ، ورنىقتى دامۋ ىسىندەگى ءرولىن قولدايتىنىن راستادى. كەزدەسۋ اياسىندا الماتىداعى بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىنىڭ قىزمەتى تۋرالى مەموراندۋمعا قول قويىلدى.

سۋرەت: اقوردا تەلەگرام ارناسىنان الىندى.

وسىلايشا، قاسىم-جومارت توقاەۆتىڭ بۇۇ باس اسسامبلەياسى اياسىنداعى كەلىسسوزدەرى قازاقستاننىڭ حالىقارالىق ىنتىماقتاستىعىن كەڭەيتۋگە، سپورت، ەكونوميكا، گۋمانيتارلىق بايلانىستار مەن جاھاندىق تۇراقتىلىقتى قامتاماسىز ەتۋ ىسىنە تىڭ سەرپىن بەردى.

قازاقستان پرەزيدەنتى قاسىم-جومارت توقاەۆ نيۋ-يوركتە وتكەن بۇۇ باس اسسامبلەياسىنىڭ 80-ءشى سەسسياسى اياسىندا حالىقارالىق ۇيىمدار مەن مەملەكەتتەردىڭ باسشىلارىمەن، سونداي-اق FIFA پرەزيدەنتىمەن ماڭىزدى كەلىسسوزدەر جۇرگىزدى.

سۋرەت: اقوردا تەلەگرام ارناسىنان الىندى.

FIFA-مەن ىنتىماقتاستىق

مەملەكەت باسشىسى حالىقارالىق فۋتبول فەدەراتسياسىنىڭ (FIFA) پرەزيدەنتى دجانني ينفانتينومەن كەزدەستى. پرەزيدەنت قازاقستاندا بالالار فۋتبولىن دامىتۋ مەن زاماناۋي ينفراقۇرىلىم قۇرۋعا باعىتتالعان FIFA Arena باعدارلاماسىنىڭ جۇزەگە اسىرىلىپ جاتقانىنا ريزاشىلىق ءبىلدىردى. ءوز كەزەگىندە دجانني ينفانتينو ەلىمىزدەگى فۋتبولعا نازار اۋدارعانى ءۇشىن العىس ايتىپ، ۇلتتىق فۋتبولدىڭ دەڭگەيىن كوتەرۋگە باعىتتالعان بىرلەسكەن جوبالاردى ىسكە اسىرۋعا دايىن ەكەنىن اتاپ ءوتتى.

سۋرەت: اقوردا تەلەگرام ارناسىنان الىندى.

ەۋروپالىق كەڭەسپەن بايلانىس

قاسىم-جومارت توقاەۆ ەۋروپالىق كەڭەس پرەزيدەنتى انتونيۋ كوستامەن دە كەلىسسوز جۇرگىزدى. اڭگىمە بارىسىندا قازاقستان مەن ەۋروپا وداعى اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق بايلانىستاردى كەڭەيتۋگە باعىتتالعان ساياسي ديالوگتىڭ قارقىندى دامىپ كەلە جاتقانى ايتىلدى. تاراپتار ءوزارا ءتيىمدى وڭىرارالىق ىنتىماقتاستىقتى نىعايتۋ جونىندە ۋاعدالاستىققا قول جەتكىزدى.

سۋرەت: اقوردا تەلەگرام ارناسىنان الىندى.

ۋكراينا پرەزيدەنتىمەن كەزدەسۋ

قازاقستان پرەزيدەنتى ۆلاديمير زەلەنسكيمەن جۇزدەسىپ، ەكىجاقتى ەكونوميكالىق جانە گۋمانيتارلىق ىنتىماقتاستىق ماسەلەلەرىن تالقىلادى. ۋكراينا باسشىسى ەلىندەگى جاعدايعا بايلانىستى كوزقاراسىن جەتكىزسە، قاسىم-جومارت توقاەۆ قاقتىعىستى توقتاتۋ ماقساتىندا ديپلوماتيالىق كۇش-جىگەردى جالعاستىرۋدىڭ ماڭىزدىلىعىنا نازار اۋداردى.

سۋرەت: اقوردا تەلەگرام ارناسىنان الىندى.

چەرنوگوريامەن ىنتىماقتاستىق

سونداي-اق مەملەكەت باسشىسى چەرنوگوريا پرەزيدەنتى ياكوۆ ميلاتوۆيچپەن كەزدەستى. قاسىم-جومارت توقاەۆ چەرنوگوريانى بالقان تۇبەگىندەگى ماڭىزدى سەرىكتەس دەپ اتاپ، ەكى ەل اراسىنداعى ديپلوماتيالىق قارىم-قاتىناستىڭ 20 جىلدىعى قارساڭىندا سىندارلى سەرىكتەستىكتىڭ ودان ءارى نىعاياتىنىنا سەنىم ءبىلدىردى. چەرنوگوريا پرەزيدەنتى قازاقستان ازاماتتارىنا ۆيزاسىز رەجيمنىڭ ەنگىزىلۋى مەن الماتى–پودگوريتسا باعىتىنداعى اۋە رەيسىنىڭ اشىلۋى ەكى حالىقتى جاقىنداتا تۇسكەنىن ايتتى.

Abai.kz