بۇۇ-نىڭ كەزەكتى جينالىسىنداعى ەڭ تۇيتكىلدى ەكى ماسەلە – گازا سوعىسى مەن ءۇش جارىم جىلعا جالعاسقان رەسەي-ۋكراينا سوعىسى ەكەنى بەلگىلى.

نيۋ-يوركتە جۇرگەن زەلەنسكيدىڭ ەكى كەزدەسۋى ەل نازارىن اۋداردى.

ونىڭ العاشقىسى قازاقستان پرەزيدەنتى توقاەۆپەن كەزدەسۋى بولدى. ول كەزدەسۋ «بۇۇ-دا قولدانىلاتىن 4 ءتىلدىڭ ءبىرى» دەپ اسپەتتەلەتىن ورىس تىلىندە ەمەس، اعىلشىن تىلىندە ءوتتى. ەكەۋارا اڭگىمەدەن قازاقستاننىڭ بەيبىتشىلىك ورناعاننان كەيىن ۋكراينانى قالپىنا كەلتىرۋ ۇردىسىنە قاتىساتىنى ءمالىم بولدى.

ارتىنىن ۋكراينا پرەزيدەنتى زەلەنسكي تاعى دا كوپ جايلاردىڭ بەتىن اشتى. اتاپ ايتقاندا Fox news ارناسىنا بەرگەن سۇحباتىندا: «ءبىز تۇركيا، ساۋد ارابياسى، كاتار، اۆستريا، شۆەيتساريا سياقتى بەيتاراپ ەلدەردى دە ۇسىندىق. ەگەر قالاساڭدار، ءتىپتى قازاقستاندا كەزدەسەيىك دەدىك. ءبىز دايىنبىز»، - دەدى زەلەنسكي.

ونىڭ الدىندا رەسەي باسشىسى ۆلاديمير پۋتين زەلەنسكيدى ماسكەۋدە كەزدەسۋگە شاقىرسا، ودان باس تارتقان زەلەنسكي ءپۋتيندى كيەۆكە شاقىرعان.

وسىعان دەيىن قازاقستان پرەزيدەنتى قاسىم-جومارت توقاەۆ قازاقستان ارااعايىن بولۋعا ۇمتىلمايتىنىن، بىراق قاجەت كەزدە كومەكتەسۋگە دايىن ەكەنىن مالىمدەگەن. قاڭتاردا ول اقش پرەزيدەنتى دونالد ترامپپەن ۋكرايناداعى جاعدايدى تالقىلاپ، كەلىسسوزدى قولدايتىنىن ايتقان.

دەمەك، پۋتين-زەلەنسكي كەزدەسۋى قازاق ەلىندە ءوتۋى بەك مۇمكىن. مىڭ جەردەن قويانبۇلتاققا سالسا دا، پۋتينگە كەلىسىمگە كەلۋدەن باسقا جول قالماي بارادى. اقش پرەزيدەنتى ترامپ بۇۇ-نىڭ مىنبەرىنەن سويلەگەن سوزىندە دە، زەلەنسكيمەن كەزدەسكەننەن كەيىن دە قاتاڭ مالىمدەمەلەر جاسادى.

ورىس مۇنايىن ساتىپ الىپ، رەسەيدىڭ سوعىس ەكونوميكاسىنا دەم بەرىپ وتىرعان قىتاي مەن ءۇندىستاندى تاعى دا ايىپتادى. رەسەي مۇنايى مەن گازىنان ءالى كۇنگە باس تارتپاي وتىرعان ەۋروپالىق ارىپتەستەرىنە دە شۇيلىكتى. ورىستىڭ اسكەري ۇشاقتارى ناتو ەلدەرى اۋماعىنا باسا-كوكتەپ كىرسە، اتىپ تۇسىرۋگە پارمەن بەردى. ۋكرايناعا اسكەري كومەك بەرىپ جاتقان اسكەري ارىپتەستەرىنە قارۋ ساتۋ كولەمىن ۇلعايتاتىنىن، شەكتەۋ قويمايتىنىن باسا ايتتى. «ۋكراينا ءوز تەرروتورياسىن قايتارىپ الۋعا قاۋقارلى» دەۋ ارقىلى بۇرىنعى ءپۋتيندى كەلىسسوزگە تارتۋ ارقىلى سوعىستى توقتاتۋ ستراتەگياسىنان باس تارتىپ، ۋكرايناعا اسكەري كومەكتى كۇشەيتۋ ارقىلى كرەمل باسشىسىن كۇشپەن تىزەرلەتۋ تاكتيكاسىنا كوشەتىنىن انىق اڭعارتتى.

زەلەنسكيگە كەرەگى دە سول ەدى. قازاقستان جايلى جاقسى پىكىرلەرى دە سودان تۋىنداسا كەرەك.

Abai.kz