ورتالىق ازيانىڭ قويما نارىعى بولجامداردى ناقتى دەرەكتەرمەن سالىستىردى: CAWS 2026 قورىتىندىسى...

قانداي قويمالار سۇرانىسقا يە بولادى، جوبالاردىڭ ەكونوميكاسى قالاي وزگەرۋدە جانە ينۆەستيتسيا تارتۋ ءۇشىن نە قاجەت؟ بۇل ماسەلەلەر Central Asia Warehouse Summit 2026 ءسامميتىنىڭ كۇن ءتارتىبىن ادە تالقىلاندى. سامميت ورتالىق ازيا نارىعىنا قاتىسۋشىلار مەن حالىقارالىق ينۆەستورلاردى سالانىڭ بولاشاعىن زەرتتەۋلەر مەن پراكتيكالىق تاجىريبە نەگىزىندە تالقىلاۋ ءۇشىن بىرىكتىردى.

ءىس-شارا 15 قازاندا الماتى قالاسىنداعى The Ritz-Carlton قوناق ۇيىندە ءوتتى. IBC Global كونسالتينگ كومپانياسى جىل سايىن ۇيىمداستىراتىن سامميتكە 13 ەلدەن 350-دەن استام قاتىسۋشى جينالدى. ولاردىڭ قاتارىندا دەۆەلوپەرلەر مەن قويما يەلەرى، جالعا الۋشىلار، لوگيستيكالىق وپەراتورلار، بانكتەردىڭ، ينۆەستيتسيالىق قورلاردىڭ، حالىقارالىق قارجى ينستيتۋتتارىنىڭ جانە مەملەكەتتىك ورگانداردىڭ وكىلدەرى بولدى. بيىلعى ءسامميتتىڭ نەگىزگى تاقىرىبى – «قازاقستاننىڭ قويما نارىعى: 2026-2027. ەندى جالعا الۋشىلاردىڭ ۋاقىتى ما؟».

«قويما ينفراقۇرىلىمىن دامىتۋ ىشكى ساۋدا، ەكسپورتتىق جەتكىزۋلەر جانە قازاقستاننىڭ ترانزيتتىك الەۋەتىن ىسكە اسىرۋ ءۇشىن ماڭىزدى. ينۆەستيتسيا جۇمىلدىرۋ ءۇشىن جۇمىس ىستەۋدىڭ بولجامدى جاعدايلارى جانە ينفراقۇرىلىمدىق ءارى اكىمشىلىك ماسەلەلەردى جۇيەلى شەشۋ قاجەت»، – دەيدى Kazlogistics قازاقستان كولىكشىلەر وداعى پرەزيديۋمىنىڭ مۇشەسى ەرحات يسكاليەۆ.

«قازپوشتا» جالپى اۋدانى كەمىندە 50 مىڭ م² بولاتىن قويما جانە لوگيستيكالىق حابتاردى كەزەڭ-كەزەڭىمەن قۇرۋ جوسپارىن تانىستىردى. نىساندار حالىقارالىق جونەلتىلىمدەردى وڭدەۋ، تاۋارلاردى تاراتۋ جانە فۋلفيلمەنت قىزمەتتەرىن ۇيىمداستىرۋ ءۇشىن ەلىمىزدىڭ بىرنەشە وڭىرىندە ورنالاستىرىلادى. «قازپوشتا» اق ينفراقۇرىلىمدى باسقارۋ ديرەكتسياسى فيليالىنىڭ باسشىسى سالتانات تولەكوۆانىڭ ايتۋىنشا، كومپانيا حالىق پەن بيزنەسكە قىزمەت كورسەتۋ جەلىسىن دە دامىتىپ كەلەدى.

ءسامميتتىڭ ماڭىزدى وقيعالارىنىڭ ءبىرى IBC Global كومپانياسى ازىرلەگەن ورتالىق ازيا قويما نارىعىنىڭ احۋالىن باعالايتىن، ايماقتىڭ ءتورت ەلىندەگى 100-دەن استام كومپانيانىڭ باعالاۋىنا نەگىزدەلگەن جاڭا كورسەتكىش – «ورتالىق ازيا قويما نارىعىنىڭ تىنىسى» زەرتتەۋىن تانىستىرۋ بولدى.

2026 جىلدىڭ III توقسانىنىڭ قورىتىندىسى بويىنشا كورسەتكىش 100 بالدىڭ 48,1 بالىن قۇرادى. بەيتاراپ دەڭگەي – 50 بالل. ساۋالناماعا قاتىسقانداردىڭ 52%-ى ءبىر جىلدان كەيىن سۇرانىس پەن ۇسىنىس تەڭەسەدى دەپ كۇتەدى. سونىمەن قاتار دەۆەلوپەرلەردىڭ 81%-ى جاڭا جوبالاردى ىسكە قوسۋدى جوسپارلاپ وتىر. دەگەنمەن، جالعا الۋشىلار تاراپىنان سۇرانىستىڭ السىزدىگى ءالى دە نەگىزگى شەكتەۋشى فاكتور بولىپ قالۋدا.

جاڭا قويما نىساندارىنىڭ بيزنەستىڭ قاجەتتىلىگىنە سايكەستىگى پىكىرالماسۋدىڭ باستى تاقىرىپتارىنىڭ بىرىنە اينالدى. دەۆەلوپەرلەر ورنالاسۋ ورنىنىڭ، ينجەنەرلىك جابدىقتالۋدىڭ جانە قۇرىلىس ساپاسىنىڭ سۇرانىسقا ىقپالىن، سونداي-اق، ماركەتپلەيستەر مەن ساۋدا جەلىلەرىنىڭ تالاپتارىن تالقىلادى.

شاعىن جانە ورتا بيزنەسكە ارنالعان Light Industrial فورماتىنداعى ەكى كەشەن تانىستىرىلدى. جيىنتىق ينۆەستيتسيا كولەمى 60 ملن اقش دوللارىنا دەيىن جەتەتىن بۇل جوبالار – استاناداعى CRED Group كومپانياسىنىڭ Business Park AQJOL جوباسى جانە بىشكەك ماڭىنداعى MEGA UNITS by DSKA كەشەنى. بۇل فورمات ءوندىرىس، قويما جانە كەڭسە قىزمەتتەرىن ءبىر جەردە ۇيىمداستىرۋعا مۇمكىندىك بەرەتىن، ورتاق ينفراقۇرىلىم مەن قىزمەت كورسەتۋ جۇيەسى بار اۆتونومدى بلوكتاردى قامتيدى.

قازاقستاندا ءىرى جالعا الۋشىلارعا ارنالعان اۋقىمدى قويما كەشەندەرى سالىنىپ جاتىر. سولاردىڭ ءبىرى – حالىقارالىق دەۆەلوپەر Griffin Partners ەۋرازيالىق دامۋ بانكىنىڭ قولداۋىمەن جۇزەگە اسىرىپ جاتقان «Griffin لوگوپارك الماتى» جوباسى. كەشەننىڭ جالپى اۋدانى 125 مىڭ م²-دەن اسادى.

IBC Global كومپانياسى قازاقستانداعى ا كلاستى قويمالاردىڭ ءىرى مەنشىك يەلەرى رەيتينگىنىڭ ناتيجەلەرىن دە جاريالادى. ىرىكتەۋگە قاتىسقان 30 كومپانيانىڭ ىشىنەن Continental Logistics, Focus Logistics, Imagine Apple Logistics, Mercury Solutions جانە «ەۋرازيالىق لوگيستيكالىق پارك» جەڭىمپاز اتاندى. ولاردىڭ جيىنتىق قويما پورتفەلى شامامەن 400 مىڭ م² قۇرايدى.

«ەۋرازيالىق لوگيستيكالىق پارك» «جىل جاڭالىعى» نوميناتسياسى بويىنشا ماراپاتتالدى. ال Sky Logistics Corporation BREEAM ستاندارتى بويىنشا سەرتيفيكاتتالعان كەشەنى ءۇشىن جاڭا ەكولوگيالىق نوميناتسيادا جەڭىسكە جەتتى.

باعدارلامانىڭ پراكتيكالىق ءبولىمى قويما قۇرىلىسىنىڭ ەكونوميكاسىنا ارنالدى. Standart جوبالاۋ بيۋروسىنىڭ، «تەحنوستيل» كومپانيالار توبىنىڭ، جيھاز جانە ۇيگە ارنالعان تاۋارلار گيپەرماركەتتەر جەلىسى Hoff پەن سورە جۇيەلەرىن ءوندىرۋشى AVETO كومپانياسىنىڭ وكىلدەرى قۇرىلىستىڭ قۇنىنا، ەنەرگيا تيىمدىلىگىنە جانە تەحنولوگيالىق جابدىقتالۋعا اسەر ەتەتىن شەشىمدەردى قاراستىردى. قاتىسۋشىلار باستاپقى ينۆەستيتسيالاردى عانا ەمەس، نىساندى بولاشاقتا پايدالانۋ شىعىندارىن دا بىرگە باعالاۋ قاجەتتىگىن اتاپ ءوتتى.

كادرلار نارىعىنداعى جاعدايدى ءسامميتتىڭ اناليتيكالىق جانە اقپاراتتىق سەرىكتەسى hh.kz تانىستىردى. 2026 جىلدىڭ ءبىرىنشى جارتى جىلدىعىنداعى شولۋعا سايكەس، «كولىك، لوگيستيكا، تاسىمالداۋ» سەگمەنتىندە ءبىر بوس جۇمىس ورنىنا 6,7 تۇيىندەمەدەن كەلەدى. سونىمەن بىرگە ۇسىنىلاتىن مەديانالىق جالاقى ءبىر جىلدا 16,4%-عا وسكەن. Ozon, Facility Management Central Asia جانە ALT University كومپانيالارىنىڭ وكىلدەرى ۇمىتكەرلەر سانىنىڭ جەتكىلىكتى بولۋى بىلىكتىلىك ماسەلەسىن تولىق شەشپەيتىنىن، سونداي-اق، پراكتيكالىق وقىتۋ مەن ەڭبەك جاعدايلارىنىڭ ماڭىزىن تالقىلادى.

قارجى سەسسياسىندا بانكتەردىڭ، دامۋ ينستيتۋتتارىنىڭ جانە ينۆەستورلاردىڭ وكىلدەرى جوبالارعا قويىلاتىن تالاپتاردى، قارىز قارجىسىنىڭ قۇنىن جانە ۆاليۋتالىق تاۋەكەلدەردى قاراستىردى. ەقدب مەن ەۋرازيالىق دامۋ بانكىنىڭ وكىلدەرى قاتىسقان تالقىلاۋلاردا قارجىلاندىرۋ شارتتارى، ينۆەستيتسيالىق قورلاردىڭ دامۋ مۇمكىندىگى جانە دايىن قويما نىساندارىمەن جاسالاتىن مامىلەلەر ماسەلەلەرى كوتەرىلدى.

سامميت IBC Global كومپانياسىنىڭ ورتالىق ازياداعى قويما نارىعىن دامىتۋ بولجامىن تانىستىرۋمەن اياقتالدى.

«ورتالىق ازيانىڭ قويما نارىعى قالىپتاسۋ مۇمكىندىگىن عانا تالقىلايتىن كەزەڭنەن ءوتتى. بۇگىندە نارىققا قاتىسۋشىلار تەك دامۋ تۋرالى ەمەس، ونى شەكتەيتىن فاكتورلار تۋرالى دا اشىق ايتادى. نارىقتىڭ كەمەلدەنۋى ءدال وسىلاي كورىنەدى»، – دەپ اتاپ ءوتتى IBC Global كومپانياسىنىڭ باسقارۋشى سەرىكتەسى ستانيسلاۆ احمەدزيانوۆ.

CAWS 2026 سەرىكتەستەرىنىڭ قاتارىندا Business Park AQJOL, Standart جوبالاۋ بيۋروسى، Griffin Partners, «تەحنوستيل» كومپانيالار توبى، MEGA UNITS by DSKA, «دوردوي» قاۋىمداستىعى، «ا-ستال ازيا»، Facility Management Central Asia جانە AVETO كومپانيالارى بولدى. ءسامميتتىڭ اناليتيكالىق جانە اقپاراتتىق سەرىكتەسى – hh.kz.

سامميت «اتامەكەن» ۇلتتىق كاسىپكەرلەر پالاتاسىنىڭ، Almaty Invest ۇيىمىنىڭ، قازاقستان لوگيستەر كلۋبىنىڭ جانە «مەتريكون» اقپاراتتىق تسيفرلىق پلاتفورماسىنىڭ قولداۋىمەن ءوتتى.

Abai.kz