موناكو مەملەكەتى رەسمي تۇردە پالەستينا مەملەكەتىن مويىنداعانىن ەل كنيازى البەر II مالىمدەدى. بۇل تۋرالى انادولى جازدى.

بۇۇ قولداۋىمەن، فرانتسيا مەن ساۋد ارابياسىنىڭ باستاماسىمەن وتكەن پالەستين ماسەلەسىن شەشۋ جانە ەكى مەملەكەت ءپرينتسيپىن جۇزەگە اسىرۋعا ارنالعان جوعارى دەڭگەيلى حالىقارالىق كونفەرەنتسيادا سويلەگەن البەر II موناكونىڭ وزگەرمەيتىن ۇستانىمىن اتاپ كورسەتتى.

ول موناكو باسىنان بەرى ءيزرايلدىڭ تانىلعان شەكارالارىنداعى قاۋىپسىز ءومىر ءسۇرۋ قۇقىعىن، سونداي-اق پالەستين حالقىنا ەگەمەن ءارى دەموكراتيالىق مەملەكەت قۇرۋ قۇقىعىن تۇراقتى تۇردە قولداپ كەلە جاتقانىن ايتتى.

— بۇگىن ءبىز ءيزرايلدىڭ بار بولۋىن نىق قولدايتىنىمىزدى قايتا راستاعىمىز كەلەدى جانە سونىمەن بىرگە حالىقارالىق قۇقىق اياسىندا پالەستينانى مەملەكەت رەتىندە مويىندايمىز. مىنە، ءدال وسىنى مەن سىزدەردىڭ الدىندا جاريالاپ وتىرمىن، — دەدى كنياز.

البەر II تۇراقتى شەشىمگە، ياعني نەگىزگى قۇقىقتاردى قۇرمەتتەۋگە نەگىزدەلگەن كەلىسىمگە جەتۋ بۇرىنعىدان دا وزەكتى ءارى قاجەتتى ەكەنىن اتاپ ءوتتى.

ول بەيبىتشىلىك تەك ءۇمىت بولىپ قالا بەرمەۋى ءتيىس ەكەنىنە سەنىم ءبىلدىردى.

كنياز ەكى مەملەكەت شەشىمىن ۇزاق مەرزىمدى تۇراقتىلىققا اپارار جول رەتىندە بەرىك قولداي بەرەتىنىن مالىمدەدى.

— بەيبىتشىلىك جارلىقپەن جۇزەگە اسپايدى — ول جالپى ەرىك-جىگەرگە نەگىزدەلەدى، — دەپ تۇيىندەدى البەر II.

موناكو كنيازدىگى جەرورتا تەڭىزى جاعالاۋىندا، باتىس ەۋروپادا ورنالاسقان جانە ۆاتيكاننان كەيىن الەمدەگى ەڭ كىشكەنتاي تاۋەلسىز مەملەكەتتەردىڭ ءبىرى بولىپ ەسەپتەلەدى.

وسىعان دەيىن نيۋ-يورك قالاسىندا قاسىم-جومارت توقاەۆ موناكو كنيازى ءىى البەرمەن كەزدەسۋ وتكىزگەنىن جازعانبىز.

وسى ۋاقىتقا دەيىن فرانتسيا، ۇلىبريتانيا، پورتۋگاليا، اۋستراليا جانە كانادا — جۋىردا پالەستينا مەملەكەتىن مويىنداپ، «ەكى حالىققا — ەكى مەملەكەت» شەشىمىن قولداعان باتىس ەلدەرىنىڭ قاتارىنا ەندى.

سونىمەن قاتار تۇركيا پرەزيدەنتى رەجەپ تايىپ ەردوعان بۇۇ باس اسسامبلەياسىنىڭ 80-سەسسياسىندا پالەستينا-يزرايل قاقتىعىسى ماسەلەسىن كوتەردى. ەردوعان الەمدى پالەستينانى مويىنداۋعا شاقىردى.

ايتا كەتەيىك، پالەستينا حالىقارالىق قاۋىمداستىقتى نيۋ-يورك دەكلاراتسياسىن قولداۋعا شاقىردى.

Abai.kz