شىمكەنت قالاسىنا جۇمىس ساپارى اياسىندا قر پرەمەر-ءمينيسترىنىڭ ورىنباسارى ەرمەك كوشەرباەۆ قالاداعى بىرقاتار الەۋمەتتىك مەكەمەنىڭ قىزمەتىمەن تانىستى.

اتاپ ايتقاندا، ول 240 ورىنعا ەسەپتەلگەن №2 ارناۋلى الەۋمەتتىك قىزمەت كورسەتۋ ورتالىعىن ارالادى. مۇندا 18 جاستان اسقان پسيحونەۆرولوگيالىق سىرقاتى بار ازاماتتارعا ستاتسيونارلىق قىزمەت كورسەتىلەدى. بۇگىندە عيماراتقا كۇردەلى جوندەۋ جۇرگىزۋگە جانە ينجەنەرلىك جەلىلەردى جاڭارتۋعا قاجەتتىلىك تۋىنداپ وتىر. بۇل ماسەلە ءتيىستى مەملەكەتتىك ورگاندار مەن ساراپشىلاردىڭ قاتىسۋىمەن جۇمىس تارتىبىندە قارالادى.

سونىمەن قاتار بەلسەندى ۇزاق ءومىر ءسۇرۋ ورتالىعىنا ەرەكشە نازار اۋدارىلدى. اتالعان ورتالىق اعا بۋىن وكىلدەرى اراسىندا ۇلكەن سۇرانىسقا يە. مۇندا زەينەتكەرلەرگە مەديتسينالىق جانە پسيحولوگيالىق كەڭەستەر، سپورتتىق جانە شىعارماشىلىق ۇيىرمەلەر، كومپيۋتەرلىك ساۋاتتىلىق پەن شەت تىلدەرىن ۇيرەتۋ سياقتى كەڭ اۋقىمدى قىزمەتتەر كورسەتىلەدى. بۇگىندە ورتالىقتىڭ مۇمكىندىكتەرىن 130-عا جۋىق ادام پايدالانىپ ءجۇر.

ساپار بارىسىندا ەرمەك كوشەرباەۆ زەينەتكەرلەرمەن تىلدەسىپ، ولاردىڭ وي-پىكىرلەرىن تىڭدادى. شىمكەنت قالاسىنىڭ تۇرعىنى ايناگۇل مىرزاەۆا ورتالىققا كەلگەننەن كەيىنگى ءوز اسەرىمەن ءبولىستى.

«بۇرىن كوپ ۋاقىتتى ۇيدە جالعىز وتكىزەتىنمىن. مۇندا جاڭا دوستار تاپتىم، ءتۇرلى قىزىقتى ىستەرمەن اينالىسامىن. كوڭىل-كۇيىم كوتەرىلىپ، ومىرگە دەگەن قۇلشىنىسىم قايتا ورالدى. ءبىز بيلەيمىز، اڭگىمەلەسەمىز، مۇندا دەنساۋلىعىمىزعا دا مۇقيات قارايدى»، — دەدى ول.

سول كۇنى ورتالىقتا اۋەن ويناپ، زەينەتكەرلەر ۆالس بيلەپ، جاستىق جىگەر مەن ومىرگە دەگەن قۇلشىنىس ادامنىڭ جاسىمەن ولشەنبەيتىنىن كورسەتتى.

«قارت ادامداردىڭ دەنساۋلىعىن ساقتاۋ عانا ەمەس، ولاردى قوعامنىڭ بەلسەندى مۇشەسى رەتىندە سەزىنۋىنە جاعداي جاساۋ اسا ماڭىزدى. شىمكەنتتە ءبىز مەديتسينالىق قىزمەت، مادەني دامۋ جانە جىلى قارىم-قاتىناس ورتاسىن ۇيلەستىرگەن ۇلگىنى كورىپ وتىرمىز. مۇنداي ورتالىقتار – اعا بۋىن ءۇشىن ناعىز تىرەك. ەلىمىزدىڭ ءار وڭىرىندە وسىنداي مەكەمەلەر اشىلىپ، بىردە-ءبىر قاريا قامقورلىقسىز قالماۋى ءۇشىن جۇمىس ىستەيمىز»، — دەپ اتاپ ءوتتى ەرمەك كوشەرباەۆ.

بۇگىندە شىمكەنت قالاسىندا 99 مىڭنان استام زەينەتكەر تۇرادى. ولاردىڭ ىشىندە 1 482 تىل ارداگەرى مەن ۇلى وتان سوعىسىنىڭ 1 ارداگەرى بار. ولارعا قامقورلىق كورسەتۋ – تەك قوعامنىڭ عانا ەمەس، مەملەكەتتىڭ دە باستى مىندەتى. ۇكىمەت مۇنداي ورتالىقتاردىڭ دامۋىن جۇيەلى تۇردە قولداپ كەلەدى. سەبەبى ولار اعا بۋىن وكىلدەرىنە قۇرمەت پەن سەنىمدىلىك سەزىمىن بەرىپ، لايىقتى ءومىر سۇرۋىنە مۇمكىندىك جاسايدى.

Abai.kz