الاتاۋ قالاسى – قازاقستاننىڭ جاڭا داۋىردەگى ەكونوميكالىق سەرپىلىسىنىڭ باستى سيمۆولىنا اينالىپ كەلە جاتقان ستراتەگيالىق ماڭىزى بار جوبا. مەملەكەت باسشىسى قاسىم-جومارت توقاەۆتىڭ الماتى وبلىسىنا جاساعان جۇمىس ساپارى ءدال وسى شاھاردىڭ دامۋ جوسپارىمەن تانىسۋدان باستالدى.

قازىرگى تاڭدا قالانىڭ اۋدانى 88 مىڭ گەكتاردى قۇراپ، بولاشاقتا 2050 جىلعا دەيىن كەزەڭ-كەزەڭىمەن دامىتىلاتىن ءتورت ارناۋلى اۋماققا ءبولىنىپ وتىر. قالانىڭ ماگيسترالدى ينفراقۇرىلىمىن ىلگەرىلەتۋ ءۇشىن ارنايى جول كارتاسى بەكىتىلىپ، نەگىزگى دامۋ ايماقتارى مەن تابىس كوزدەرى ايقىندالدى. بۇل باعىتتاعى جۇمىستاردىڭ جۇيەلى ءجۇرۋى ءۇشىن باسقارۋدىڭ جاڭا مودەلىن قالىپتاستىراتىن كونستيتۋتسيالىق زاڭ قابىلداندى.

قالانىڭ دامۋى بۇگىندە قارقىندى ءجۇرىپ جاتىر، اسىرەسە Gate City تۇرعىن ءۇي الابى جەدەل وركەندەۋ ۇستىندە. مۇندا جايلى مەكتەپتەر سالىنىپ، «مارەۆەن فۋد»، «كناۋف»، Fruit Art, Dolce Pharm جانە الماتى جەلدەتكىش زاۋىتى سىندى جۇيە قۇرايتىن ءىرى كاسىپورىندار تابىستى جۇمىس ىستەپ جاتىر. ينۆەستيتسيالىق الەۋەتتىڭ اۋقىمى وتە جوعارى: بۇگىنگى تاڭدا جالپى سوماسى 2 تريلليون تەڭگەدەن اساتىن 53 ينۆەستيتسيالىق جوبادان تۇراتىن پۋل جاساقتالدى. ولاردىڭ قاتارىندا PepsiCo كومپانياسىنىڭ ورتالىق ازياداعى ەڭ ءىرى كارتوپ وڭدەۋ زاۋىتى، Mars Petcare كومپانياسىنىڭ ءۇي جانۋارلارىنا ارنالعان ازىق شىعاراتىن ايماقتاعى العاشقى بىرەگەي زاۋىتى بار. سونداي-اق، KHAN TENGRI BIOPHARMA ءدارى-دارمەك پەن مەديتسينالىق قوندىرعىلار ءوندىرىسىن جولعا قويسا، «يستكومترانس» پەن G-Trans كومپانيالارى قۋاتتى لوگيستيكالىق كلاستەر قۇرۋدا. مەملەكەت باسشىسىنا تانىستىرىلعان Iconic Complex جوباسى دا قالانىڭ بولاشاقتاعى ساۋلەتتىك بەت-بەينەسىن ايقىندايتىن كوپفۋنكتسيونالدى وزىق نىسانداردىڭ ءبىرى رەتىندە Gate District اۋدانىندا بوي كوتەرمەك.

مەملەكەت باسشىسى «بۇگىن ءبىز الاتاۋ قالاسىن دامىتۋ بويىنشا وزەكتى ماسەلەلەردى تالقىلايمىز. بارشاڭىزعا ءمالىم، مەن وسىدان ەكى جىل بۇرىن بولاشاق قالاسى – الاتاۋ شاھارىن سالۋ تۋرالى شەشىم قابىلدادىم. بۇل جوبانىڭ تۇتاس ەلىمىز ءۇشىن ستراتەگيالىق ماڭىزى زور. ءبىز وسى قالاعا ينۆەستيتسيا تارتىپ، ونى بيزنەستىڭ جانە يننوۆاتسيانىڭ جاڭا ورتالىعى رەتىندە دامىتاتىن بولدىق» دەپ اتاپ ءوتتى. سونىمەن قاتار پرەزيدەنت «الاتاۋدى رەسمي تۇردە بىرەگەي قۇقىقتىق مارتەبەسى بار «قارقىندى داميتىن قالا» دەپ اتاۋعا بولادى» دەپ باسا ايتتى. ول سالىق جەڭىلدىكتەرى مەن كاسىپكەرلەر قۇقىعىنىڭ قورعالۋى بيزنەس ءۇشىن وڭتايلى جاعداي جاسايتىنىن ەسكەرتە كەلىپ، «الاتاۋ قالاسى قۇرىلىسىنىڭ نەگىزگى قاعيدالارى جاڭا كونستيتۋتسياعا ەنگىزىلدى» دەپ مالىمدەدى.

الەمدىك تاجىريبەدە دە وسىنداي ەرەكشە ستاتۋسقا يە قالالار بار. مىسالى، سينگاپۋر ليبەرالدى سالىقتىق جۇيەسىمەن، شەنچجەن ارناۋلى ەكونوميكالىق ايماق رەتىندەگى تەحنولوگيالىق ورلەۋىمەن، ال دۋباي ەركىن ەكونوميكالىق ايماقتارىمەن الەمدىك بيزنەس ورتالىقتارىنا اينالعان.وسىلايشا، الاتاۋ قالاسى ءوزىنىڭ بىرەگەي قۇقىقتىق مارتەبەسى مەن ينۆەستيتسيالىق تارتىمدىلىعى ارقىلى ەلىمىزدىڭ ەكونوميكالىق قۋاتىن نىعايتۋدىڭ جاڭا تىرەگىنە اينالۋدا.

ايانا قازتاي

Abai.kz