Z-پاتريوت يگور سترەلكوۆ رەسەيدى «قاعاز جولبارىس» دەپ اتاعان اقش پرەزيدەنتى دونالد ترامپپەن سوزگە كەلمەي كەلىسىپ، العاش رەت «سۆو-نى» توقتاتۋعا شاقىردى. رەسەيلىك شوۆينيست جانە Z-پاتريوت يگور سترەلكوۆ ءوزىنىڭ ەڭ جىگەرى قۇم بولعان حاتتارىنىڭ ءبىرىن 26 قىركۇيەكتە Telegram جەلىسىندە جاريالاپ، ەندى جەڭىستى ارماندامايتىن العا تارتا وتىرىپ، ءبىرىنشى رەت ۋكرايناعا قارسى سوعىستى توقتاتۋعا ۇندەدى.

ول وسى حاتىندا اقش پرەزيدەنتى دونالد ترامپتىڭ رەسەيدى «قاعاز جولبارىس» دەگەن تۇجىرىمىمەن باسى ءبۇتىن كەلىسە وتىرىپ: «بارلىعى ءۇش كۇندە نەمەسە كەم دەگەندە ءۇش اپتادا كۇيرەدى دەپ كۇتكەن ەلمەن ءۇش جارىم جىل بويى كۇرەسۋ ەش وپا اپەرمەيتىن احۋال»، - دەپ جازعان سترەلكوۆ «سۆو» دەپ اتالاتىن ناۋقاننىڭ ساتسىزدىگى ءۇشىن، وراسان زور جانە ماعىناسىز شىعىندار ءۇشىن، ۇشقىشسىز ۇشۋ سالاسىندا ۋكراينا دەڭگەيىنە جەتە الماعانى ءۇشىن ەشكىمنىڭ جاۋاپقا تارتىلماعانىنا زىعىردانى قايناي وتىرىپ، ساتسىزدىككە جول بەرگەندەردىڭ ەشقايسىنىڭ رەسەي باسشىلىعى تاراپىنان جاۋاپكەرشىلىككە تارتىلمايتىنىنا اشۋلانا كارلى قاباق تانىتادى.

«ءبىز قازىردىڭ وزىندە دۇشپانىمىز تاراپىنان قارا تەڭىزدەگى شىعىس بازالارىمىزعا كۇيرەتە سوققى بەرۋگە جاعداي جاتىرمىز. ءۇش جارىم جىل بۇرىن تەڭىز بەن اۋەنى تولىعىمەن اشسا الاقانىندا، جۇمسا جۇدىرىعىندا ۇستاعان قارا تەڭىز فلوتى قايدا؟ ەگەر ءبىز ولارعا جاۋاپ بەرە الماساق نەمەسە ولاردىڭ الدىن الا الماساق، بۇل جەردە نە بولىپ جاتىر؟» - دەپ ساۋالدى توتەسىنەن قويعان سترەلكوۆ ۋكراينانى يت ەتىنەن جەك كورەتىن ادام رەتىندە تاۋانى تاسقا سوعىلىپ، العاش رەت رەسەي ءوزىنىڭ «سۆو-سىن» توقتاتۋ كەرەكتىگىن ايتتى.

«ەگەر ءبىز بۇل سوعىستا جەڭە الماساق، وندا شىنىمەن مۇمكىن ونى ءوز جايىنا قالدىرۋىمىز كەرەك شىعار؟»، - دەپ جازادى سترەلكوۆ ودان ارى. ول رەسەيدىڭ جاعدايىن «وتە اۋىر جانە تۇراقتى ناشارلاۋ ءۇردىسى ۇستىندە» دەپ ءوز باعالاۋىن جاساي كەلە، ۋكراينانى جەڭۋ پەرسپەكتيۆاسىنىڭ اۋىلى الىستا ەكەنىن اشىق مويىندايدى. سترەلكوۆتىڭ ايتۋىنشا، رەسەي وڭالۋى مۇمكىن ەمەس، اپاتقا بەت العان، ال باسشىلىق ونىڭ الدىن الىپ، جاعىمدى جاققا قاراي وزگەرتۋگە ەش قاۋقارسىز.

«جاعدايدىڭ مۇلدەم ۋشىعىپ، ۇلتتىق اپاتقا بەت العانى انىق. ەندى باسىمىزعا تۇسكەن ناقتى جاعدايعا كەلەتىن بولساق: مەن ونى تۇراقتى تۇردە كۇن ساناپ ناشارلاپ بارا جاتىر دەپ باعالايمىن. ورىنى تولماس شىعىنعا ۇرىنىپ جاتقانىمىز دا جاسىرىن. ۋكرايندار وزدەرىنە اسا قاجەتتى ۋاقىت پەن رەسۋرستار ءۇشىن باتىسپەن اۋقىمدى دا، بايسالدى تۇردە ساۋدالاسۋىن ساتىمەن جالعاستىرۋدا. ال ءبىزدىڭ باسشىلىق بۇعان قارسى قاۋقار قىلىپ ەشتەڭە ىستەي المايدى»، - دەپ كۇڭىرەنە جازادى سترەلكوۆ.

سترەلكوۆ ۋكراينانىڭ ەل-جۇرت قىركۇيەكتە كۇتكەن شابۋىلىن ەشقاشان باستالماي، كەرىسىنشە، كيەۆتىڭ كوكتەمگە دەيىن قاۋىپتى وپەراتسيالاردان باس تارتىپ، رەسەيدى كۇشىن سارقىپ، توزدىرۋعا بارىن سالۋى مۇمكىن ەكەنىن العا تارتا وتىرىپ، سوعىستىڭ ۇزاققا سوزىلۋى رەسەيدىڭ الەۋمەتتىك-ەكونوميكالىق جاعداي ودان سايىن ناشارلاتاتىنىنا قانى قارايادى. «ەگەر ۋكرايندىق قارسى شابۋىل قازان ايىنىڭ ەكىنشى ونكۇندىگىنە دەيىن جاسالماسا، وندا بۇل جىلى مۇلدەم بولماۋى دا مۇمكىن»، - دەيدى.

ايتا كەتەيىك، سترەلكوۆتى حالىقارالىق سوت اسكەري قىلمىس جاسادى دەپ ايىپتاپ، دونباسس ۇستىندە جولاۋشىلار ۇشاعىن اتىپ تۇسىرگەنى ءۇشىن ءومىر بويىنا باس بوستاندىعىنان ايىرعان ەدى. الايدا ول باسقا سەبەپپەن رەسەيدە تەمىر توردىڭ ار جاعىنان ءبىرا-اق شىقتى. كرەمل ونى ءپۋتيندى قاتتى سىناعانى جانە ونىڭ ماحاباتى الينا كاباەۆانى اۋىزعا العانى ءۇشىن قاتاڭ جازالاندى. ول بۇعان دەيىن كرەملدى ۋكراينانى جەڭە الماعانى ءۇشىن بىرنەشە رەت سىنعا العان بولاتىن.

Z-پاتريوت سترەلكوۆتىڭ مالىمدەمەلەرى رەسەيدەگى سوعىستى راديكالدى جاقتاۋشىلار اراسىندا دا ساتسىزدىك پەن ۇمىتسىزدىك تۋرالى تۇسىنىكتىڭ ارتىپ كەلە جاتقانىن كورسەتەدى.

كەرىمسال جۇباتقانوۆ

Abai.kz