الگىندە رەسەيباسى ۆالدايعا بارىپ، كوپىرىپ كوپ سويلەدى. تاريحتى دا ايتتى، ساياساتتى دا سويلەدى، ولەڭدى دە وقىدى. قۇددى جىگىت سۇلتانىنا قاتىسىپ جاتقان بالاداي، بار ونەرىن كورسەتتى. ءبىر سوزبەن ايتقاندا – ءپۋتيننىڭ «Stand Up-ى» بولدى.

ءبالدۋ-ءبالدۋ ەسكى كاسەتاسىن ءجۇز بۇراپ، بۇرىن ايتقاندارىن ەزىپ-مىجىپ تاعى قايتالادى: ترامپتى ازداپ ماقتاپ، ونىڭ كومناداسىن سوكتى. باتىستى باستان-اياق جاماندادى. اراسىندا «ۋكرايناعا وبال» دەپ قوسىپ قويىپ، ءبىر ۋاقتا: «وبالدارى وزدەرىنە»، - دەدى. ونان سوڭ الەمگە يادرولىق بوپسا جاساپ سويلەدى. ورىستىڭ اسكەرى مەن قارۋىن ماقتادى. قىسقاسى – «بۇكىل الەم ءبىزدىڭ دۇشپانىمىز. ءبىز جاۋمەن جالعىز كۇرەسىپ، الەمدە ءتارتىپ ورناتىپ وتىرمىز»، - دەدى باس-اياعى.

«ۆالداي-اۋ، ۆالداي، ۆالداي-اۋ، ءپۋتيننىڭ ءسوزى قانداي-اۋ» دەپ اندەتىپ وتىرىپ قاراعاندا ۇققانىمىز 2 نارسە:

ءبىرىنشىسى: رەسەي ءالى سوعىسادى. كەلىسسوز جۋىق ارادا بولمايدى. رەسەيدىڭ ارەسەنالى ءالى تاۋسىلعان جوق. «ەكونوميكامىز ولۋگە اينالىپ، اقشامىز تاۋسىلىپ، حالقىمىز اش-جالاڭاش قالسا دا سوعىسامىز» دەپ وتىر ورىس پاتشاسى.

ەكىنشىسى: پۋتين ترامپتان قورقىپ قاپتى. كەشەگى «يستەريكالىق» مالىمدەمەلەر سونى اڭعارتتى. ءپۋتيننىڭ تابانى وتكەندە الياسكاعا تيگەن ساتتەن باستاپ، وندا يراننىڭ جەر استى يادرولىق بازالارىن تەسىپ وتكەن اقش-تىڭ جويقىن سوعىس ۇشاقتارى توبەسىنەن ۇشىپ وتكەن ساتتەن باستاپ ءپۋتيننىڭ بويىن قورقىنىش بيلەگەن سەكىلدى.

اتپەسە، «اقش ۋكرايناعا «تomahawk» دەيتىن سويقان قارۋدى بەرگەلى جاتىر ەكەن. اق ءۇي قارسى ەمەس ەكەن» دەگەن اڭگىمەگە پۋتين: «ۇلكەن دەرجاۆالاردىڭ اراسىندا كەلىسپەۋشىلىك بولاتىنى تابيعي نارسە. ۋكراينا امەريكاندىق جويقىن زىمىراندى وزدىگىنەن قولدانا المايدى، ءوندىرۋشى ەلدىڭ كومەگىمەن عانا سوققى جاساي الادى. ونداي جاعدايدا اقش-رەسەي قاتىناسى قۇردىمعا كەتەدى»، - دەپ ميپازداپ سويلەي مە؟ قورىقپاسا، فرانتسيا، فينليانديا، ۋكراينا، شۆەتسيا ت.ب. ەو ەلدەرىنىڭ باسشىلارىن سوككەنى سەكىلدى ترامپ تۋرالى دا قاتال سويلەر ەدى عوي. ويتپەدى. ونىڭ ورنىنا: «تomahawk» ەسكى بولسا دا، قۋاتتى قارۋ»، - دەپ سويلەدى. ترامپتىڭ «رەسەي – قاعاز جولبارىس» دەگەنىنە ءجاي عانا: «سول قاعاز جولبارىسپەن الىسىپ كورىڭدەر»، - دەدى. ترامپتىڭ ءوزى تۋرالى: «ونىمەن كەزدەسۋىمىزدىڭ ءوزى ۇلكەن جەتىستىك. ءبىز بوس اڭگىمەلەسكەن جوقپىز، سوعىستى رەتتەۋدىڭ جولدارىن تالقىلادىق»، - دەپ سويلەدى.

وسى ەكى جاعداي ءپۋتيننىڭ ترامپقا اشىق اگرەسسيا كورسەتە المايتىنىن، ونىمەن ساناساتىنىن، ساناسپاسا بولمايتىن حالدە ەكەنىن كورسەتىپ بەردى.

Abai.kz