مانەرلەپ سىرعاناۋدان الماتىدا وتكەن حالىقارالىق دەنيس تەن مەموريالى ءوز مارەسىنە جەتتى. تۋرنير ءتۇرلى ەلدىڭ مىقتى سپورتشىلارىن بىرىكتىرىپ، وليمپيادالىق ماۋسىمداعى العاشقى ماڭىزدى سايىستاردىڭ بىرىنە اينالدى. تولىعىراق Olympic.kz ماتەريالىندا.

ەرلەر اراسىندا وتكەن جەكەلەي سىرعاناۋدا باسەكەلەستىك دەڭگەيى جوعارى بولدى. كەيبىر سپورتشىلار ءۇشىن بۇل جارىس ماۋسىمداعى العاشقى باستاماسى ەدى. سوندىقتان دا وليمپيادا قارساڭىندا جانە سول كەزەڭدە ءبىزدىڭ ميحايل شايدوروۆپەن كىم قاي باعدارلامامەن جانە قانداي دايىندىقپەن سىنعا تۇسەتىنى قىزىق بولدى.

ميحايلدىڭ ءوزى دە العاش رەت جاڭا باعدارلاماسىن جانە كوستيۋمىن تانىستىردى. الەم چەمپيوناتىنىڭ كۇمىس جۇلدەگەرى قىسقا باعدارلامادا Sons of Legion, Phil Collins - In the Air Tonight جانە Kaleo, Jokull Juliusson - No Good كومپوزيتسيالارىمەن ونەر كورسەتەدى. ال ەركىن باعدارلاما ءۇشىن سپورتشى تانىمال «بەسىنشى ەلەمەنت» ءفيلمىنىڭ The Diva Dance ساۋندترەگىن تاڭداعان. باعدارلامادا ەريك سەررا جازعان تۇپنۇسقا اۋەنمەن قاتار، ديماشتىڭ ورىنداۋىنداعى اريا دا (Confessa نۇسقاسى) قامتىلعان.

"قىسقا باعدارلاماعا ارنالعان اۋەندەردى ءبىز كوماندامەن بىرلەسىپ تاڭدادىق. روك ستيلىندە سىرعاناۋدى ءوزىم ۇسىندىم، ال ناقتى اندەردى بىرگە ىزدەدىك. اقىرىندا ءتۇرلى ءداۋىردىڭ روك اۋەندەرىن بىرىكتىرەتىن نۇسقانى تاڭدادىق.

ال ەركىن باعدارلاماداعى اۋەندى مەن شامامەن بەس جىل بۇرىن تاڭداعان ەدىم. بىراق قاشان سىرعانايتىنىمدى بىلمەدىم. سەبەبى ول ءۇشىن لايىقتى دەڭگەيگە جەتۋىم كەرەك ەدى. الەم چەمپيوناتىنان كەيىن سول ءساتتىڭ كەلگەنىن ءتۇسىندىم", - دەگەن ەدى شايدوروۆ Olympic.kz-كە بەرگەن سۇحباتىندا.

الماتىداعى جارىستا ميحايلدىڭ باستى قارسىلاسى 2023 جىلعى الەم چەمپيوناتىنىڭ كۇمىس جۇلدەگەرى، ازيا ويىندارىنىڭ جەڭىمپازى وڭتۇستىككورەيالىق چا دجۋنحۆان بولادى دەگەن بولجام بار ەدى. الايدا ول قىسقا باعدارلامادا ءساتسىز ونەر كورسەتكەننەن كەيىن، ەركىن باعدارلامانى ورىنداۋدان باس تارتىپ، تۋرنيردەن شىعىپ قالدى.

سوعان قاراماستان، شايدوروۆتىڭ قارسىلاستارى وتە مىقتى بولدى. ماسەلەن، وليمپيادانىڭ قولا جۇلدەگەرى (كوماندالىق سايىس) دجەيسون براۋن (اقش) جانە ايگىلى ەتەري تۋتبەريدزەنىڭ شاكىرتى گرۋزيالىق نيكا ەگادزە (2025 جىلعى الەم چەمپيوناتىندا توعىزىنشى ورىن).

باستاپقى كەزەڭنەن-اق شايدوروۆ كوشباسشىلىقتى ءوز قولىنا الدى. قىسقا باعدارلامادا ول 95,01 ۇپاي جيناپ، قالعان سپورتشىلاردى باسىپ وزدى. ەركىن باعدارلامادا ارتىقشىلىعىن ساقتاپ، 187,21 ۇپاي ەنشىلەدى. جالپى ەسەپتە 282,22 ۇپاي جيناپ، ءبىرىنشى ورىنعا يە بولدى. ەكىنشى ورىندا - نيكا ەگادزە (266,90), ال دجەيسون براۋن (257,81) ءۇشىنشى ساتىعا جايعاستى.

شايدوروۆ ەركىن باعدارلامادا بەس ءتورت اينالىمدى سەكىرۋ ورىندادى. بارلىق ەلەمەنت ءمىنسىز شىقپاعانىمەن، بۇل ونىڭ ماۋسىمداعى العاشقى جارىسى ەدى. الداعى ۋاقىتتا ول باعدارلاماسىن جەتىلدىرىپ، تەحنيكاسى مەن ورىنداۋ ساپاسىن ارتتىرا تۇسپەك.

دياس جيرەنباەۆ تا ءوزىن جاقسى قىرىنان كورسەتتى. ول قىسقا باعدارلامادا (77.14) جانە جالپى ەسەپتە (208.68) جەكە رەكوردتارىن جاڭارتىپ، 11-ورىنعا يە بولدى.

ايەلدەر اراسىنداعى جەكەلەي سىرعاناۋدا سوفيا سامودەلكينا ونەر كورسەتۋى ءتيىس ەدى. الايدا تۋرنير الدىندا العان جاراقاتىنا بايلانىستى جارىستان باس تارتتى. وسىلايشا مۇزعا جاقىندا عانا ورالعان وڭتۇستىككورەيالىق لي حە ين جارىستىڭ باستى فاۆوريتىنە اينالدى.

سپورتشى ۇزاق ۇزىلىستەن كەيىن بابىنا قايتا ەنە باستادى. ەسكە سالا كەتسەك، ول 2023 جىلى الەم چەمپيوناتىندا قولا جۇلدە يەلەنگەن بولاتىن. ال الماتىداعى جارىستا جەڭىسكە جەتتى. سپورتشى جالپى ەسەپتە 196.84 ۇپاي جينادى. وڭتۇستىك كورەيا وكىلى يۋن اسۋن (174.37) ەكىنشى ورىنعا يە بولدى. كانادا سپورتشىسى مادەلين ششيجاس (164.39) ءتۋرنيردى قولا جۇلدەمەن اياقتادى. قازاقستان قۇراماسىنىڭ ساپىندا ەڭ ۇزدىك ناتيجە كورسەتكەن اميرا يرماتوۆا التىنشى ورىنعا تۇراقتادى (137.15).

مۇزداعى بي باعدارلاماسىندا ديانا دەۆيس پەن گلەب سمولكين (گرۋزيا) جۇبى 193.14 ۇپايمەن جەڭىسكە جەتتى. ەكىنشى ورىندا - امەريكالىق ۋنا براۋن مەن گەيدج براۋن (178.86), ال شۆەد جۇبى ميللا رەيتان مەن نيكولاي مايوروۆ (177.25) ۇزدىك ۇشتىكتى تۇيىندەدى. قازاقستاندىق بويسانگۋر داتيەۆ پەن گاۋحار ناۋرىزوۆا توعىزىنشى ورىنمەن (131.59) جارىستى اياقتادى.

سونداي-اق دەنيس تەن مەموريالىندا جاستار اراسىندا دا جۇلدەلەر ساراپقا سالىندى. ەر بالالار اراسىنداعى باسەكە تەك قازاقستاندىق مانەرلەپ سىرعاناۋشىلاردىڭ اراسىندا ءوتتى. ەڭ ۇزدىك ناتيجە كورسەتكەن - ارتۋر سماعۇلوۆ (159.59). كۇمىس مەدالدى نيكيتا كوزلوۆ (134.97) يەلەنسە، ءۇشىنشى ورىندى كەنان بەردىباەۆ (126.42) ەنشىلەدى. ال قىزدار اراسىندا ءبىزدىڭ سپورتشىلار جۇلدەسىز قالدى.

كيم گونحي (وڭتۇستىك كورەيا، 179.24) جەڭىسكە جەتتى. كيم مين سون (وڭتۇستىك كورەيا، 171.33) كۇمىستەن القا تاقسا، ارينا كالۋگينا ء(ازىربايجان، 167.24) قولا مەدالعا قول جەتكىزدى.

قازاقستان قۇراماسىنىڭ ساپىندا ۇزدىك ناتيجە كورسەتكەن - اننا ساننيكوۆا. ول 136.85 ۇپاي جيناپ، 6-ورىنعا يە بولدى. كارينا شەينا - 11-ورىن (127.34), سابينا بوتينا - 13-ورىن (116.92), ۆالەريا زوركينا - 14-ورىن (115.63), زەرە ساربالينا - 15-ورىن (114.98), ميلانا ۆورونتسوۆا - 19-ورىن (95.34), امينا شالىمبەكوۆا - 20-ورىن (93.62).

جاقىن ۋاقىتتا ەرەسەكتەر اراسىندا وتەتىن گران-پري كەزەڭدەرى باستالادى. بۇل سىنداردا الەمنىڭ ۇزدىك مانەرلەپ سىرعاناۋشىلارى باس قوسادى. سول جارىستاردىڭ كەيبىرىنە ميحايل شايدوروۆ تا قاتىسادى. بۇل تەك باسى عانا، باستى باسەكە ءالى الدا.

سۋرەت: سالي سابيروۆ، قازاقستان ۇوك ءباسپاسوز قىزمەتى

Abai.kz