ۇكىمەت وتىرىسىندا رەيستەردىڭ كەشىگۋى، اۋە كەمەلەرىن اۋىستىرۋ، اۋەجايلاردا كەزەكتەردىڭ پايدا بولۋى جانە جولاۋشىلاردىڭ قۇقىقتارىنىڭ بۇزىلۋى سياقتى ماسەلەلەر قارالدى. سونداي-اق ۇشۋلاردىڭ ۋاقىتىلى ورىندالۋىن قامتاماسىز ەتۋ جانە قىسقى ماۋسىمعا دايىندىق بارىسى تالقىلاندى.

– قازىرگى ۋاقىتتا اۋە كەمەسىن اۋىستىرعان جاعدايدا وتەماقى تەك بيزنەس-كلاسس جولاۋشىلارىنا عانا تولەنەدى. ۆيتسە-مينيستر اۋە كومپانيالارىنا ۇشاقتاردى ءوز ەركىمەن اۋىستىرۋعا تىيىم سالۋ جانە رەزەرۆتىك اۋە كەمەلەرىن الدىن الا قاراستىرۋدى تاپسىردى. ياعني Fly Arystan رەيستەرىن تەك Fly Arystan ۇشاعىمەن، ال Air Astana رەيستەرىن تەك Air Astana ۇشاعىمەن اۋىستىرۋ قاجەت. تالعات لاستاەۆ ماۋسىمدىق جۇكتەمە كەزەڭىندە رەيستەردىڭ ۋاقىتىلى ورىندالۋىن ارتتىرۋ ءۇشىن قوسىمشا شارالار قابىلداۋدى تاپسىردى، – دەپ حابارلادى كولىك مينيسترلىگىنىڭ ازاماتتىق اۆياتسيا كوميتەتى.

وتىرىستا سونداي-اق جولاۋشىلارعا قىزمەت كورسەتۋ ساپاسى مەن جەردەگى قىزمەتتەردىڭ جۇمىسىنا نازار اۋدارىلدى. اسىرەسە اۋەجاي قىزمەتكەرلەرىنىڭ جولاۋشىلارعا دورەكى قارىم-قاتىناس جاساۋى سىنعا الىندى. اۋە كومپانيالار مەن اۋەجاي باسشىلىعىنا قىزمەت كورسەتۋ ساپاسىن جاقسارتۋ، قىزمەتكەرلەردىڭ دايىندىق دەڭگەيىن ارتتىرۋ جانە مادەنيەت جونىندەگى ترەنينگتەر وتكىزۋ تاپسىرىلدى. سونداي-اق كەزەكتەردى بولدىرماۋ ءۇشىن تەكسەرۋ راسىمدەرىن وڭتايلاندىرۋ قاجەت ەكەنى ايتىلدى.

– Fly Arystan اۋە كومپانياسىندا ونلاين تىركەلۋ ۇشۋعا 30 كۇن قالعاندا اشىلادى. الايدا اۋەجايدا تىركەلۋ قىزمەتى اقىلى بولىپ تابىلادى. بۇل ءموبيلدى قۇرىلعىلاردى پايدالانا المايتىن قارت جولاۋشىلار مەن مۇمكىندىگى شەكتەۋلى ادامدار ءۇشىن قيىندىق تۋعىزادى. مينيسترلىك وسىنداي ازاماتتارعا ارنالعان قوسىمشا قىزمەت كورسەتۋ تەتىكتەرىن ازىرلەۋدى تاپسىردى، – دەدى ازاماتتىق اۆياتسيا كوميتەتى وكىلدەرى.

قازاقستاننىڭ اۆياتسيالىق اكىمشىلىگى (ااق) ينسپەكتورلارى ەكى اپتا بويى استانا مەن الماتى اۋەجايلارىنداعى ۇشىپ شىعۋ جانە كەلۋ زالدارىندا بولىپ، رەيستەردىڭ كەشىگۋىن باقىلاپ، جولاۋشىلار اراسىندا ساۋالناما جۇرگىزەدى.

Abai.kz