قازاقستان ۆارشاۆادا دەموكراتيالىق رەفورمالاردى تانىستىردى

ۆارشاۆاداعى ادام قۇقىقتارى جونىندەگى كونفەرەنتسيادا «ۇلتتىق وركەندەۋگە جاردەم قورى» قوعامدىق قورىنىڭ ديرەكتورى ۇسەن سۇلەيمەن قازاقستاننىڭ قازىرگى تاڭدا قۇقىقتىق كەپىلدىكتەردى، سوتتاردىڭ تاۋەلسىزدىگىن جانە ءسوز بوستاندىعىن نىعايتۋعا باسىمدىق بەرىپ وتىرعانىن اتاپ ءوتتى.

ونىڭ ايتۋىنشا، سوڭعى جىلدارداعى رەفورمالار ازاماتتاردىڭ قۇقىقتارى بارلىق دەڭگەيدە قورعالاتىن اشىق ءارى ينكليۋزيۆتى مەملەكەت قالىپتاستىرۋعا باعىتتالعان.

نەگىزگى قادامداردىڭ ءبىرى – كونستيتۋتسيالىق سوتتىڭ قايتا قالپىنا كەلتىرىلۋى. بۇل ازاماتتارعا ءوز قۇقىقتارىن قورعاۋ ءۇشىن تىكەلەي جۇگىنۋ مۇمكىندىگىن بەردى. سونداي-اق ومبۋدسمەننىڭ مارتەبەسى ارتتىرىلىپ، اكىمشىلىك ادىلەت جۇيەسى دامۋدا.

«بۇل – ادامعا باعىتتالعان ەلدىڭ جاڭا قۇقىقتىق ارحيتەكتۋراسىنىڭ ماڭىزدى ەلەمەنتى»، – دەدى ول.

بيىلدان باستاپ سوت بيلىگىنىڭ تاۋەلسىزدىگىن جانە ادىلەت جۇيەسىنە دەگەن سەنىمدى كۇشەيتەتىن جەكە كاسساتسيالىق سوتتار جۇمىس ىستەي باستادى.

ءسوز بوستاندىعى مەن ازاماتتىق قاتىسۋ سالاسىندا دا ايتارلىقتاي وزگەرىستەر ورىن الدى. قوعامدىق ءىس-شارالاردى وتكىزۋ ءۇشىن حابارلاما بەرۋ جۇيەسى ەنگىزىلدى. بۇل ازاماتتارعا ءوز پىكىرىن ءبىلدىرۋ جانە جينالۋ جونىندەگى كونستيتۋتسيالىق قۇقىقتارىن ەركىن جۇزەگە اسىرۋعا مۇمكىندىك بەردى.

بۇدان بولەك، پەتيتسيالار پورتالى ىسكە قوسىلدى. قازىرگى ۋاقىتتا ازاماتتاردان 100-دەن استام باستاما كەلىپ ءتۇستى. ولاردىڭ كوپشىلىگى ۇكىمەت دەڭگەيىندە قارالۋدا، بۇل قوعامدىق ديالوگتىڭ جاڭا تەتىگىنە اينالدى.

«قازاقستان قوعام مەن مەملەكەت اراسىنداعى سەنىم ينفراقۇرىلىمىن دايەكتى تۇردە قالىپتاستىرىپ كەلەدى. بۇل – دەموكراتيالىق ۇدەرىس، ونى جوعارىدان ەنگىزۋ مۇمكىن ەمەس، ول تومەننەن، ازاماتتىق باستامادان ءوسىپ شىعادى»، – دەپ اتاپ ءوتتى ۇسەن سۇلەيمەن.

ءوز ءسوزىن قورىتىندىلاي كەلە، ول قازاقستاننىڭ دەموكراتيا ينستيتۋتتارى مەن ادام قۇقىقتارىن قورعاۋ جۇيەسىن ءارى قاراي دا نىعايتا بەرەتىنىن، حالىقارالىق ستاندارتتارعا ادال بولا وتىرىپ، ازاماتتاردىڭ مەملەكەتتىڭ قوعامدىق ومىرىنە قاتىسۋىنىڭ وزىندىك قازاقستاندىق ۇلگىسىن دامىتاتىنىن ايتتى.

Abai.kz