قازاقستان مەن رەسەي اراسىنداعى شىعارماشىلىق ىنتىماقتاستىق جايلى وي...

ونەر – حالىقتىڭ جانى، رۋحتىڭ كورىنىسى!

ال سول ونەردى ۇلىقتاپ، دامىتاتىن ماماندار – ۇلتتىڭ مادەني تىرەگى.
بۇگىن مەن قازاقستان مەن رەسەي اراسىنداعى ونەر سالاسىنداعى ءبىلىم بەرۋ مەن شىعارماشىلىق سەرىكتەستىك تۋرالى وي بولىسكىم كەلەدى.

ەكى ەلدىڭ اراسىنداعى بايلانىس عاسىرلار بويى قالىپتاسقان ورتاق تاريح پەن مادەني ساباقتاستىققا نەگىزدەلگەن. بۇل دوستىقتىڭ شىنايى دانەكەرى – ونەر. ول مۋزىكا مەن تەاتردا، كينەماتوگرافيا مەن بەينەلەۋ ونەرىندە ايقىن كورىنىس تابادى.

كەڭەس داۋىرىندە-اق قازاق ونەرىنىڭ تالاي ساڭلاقتارى ماسكەۋ مەن لەنينگرادتىڭ ايگىلى وقۋ ورىندارىندا – كونسەرۆاتوريالاردا، رەسەي تەاتر ونەرى ينستيتۋتى گيتيس پەن س. ا. گەراسيموۆ اتىنداعى كينەماتوگرافيا ۋنيۆەرسيتەتى ۆگيك قابىرعاسىندا ءبىلىم الدى. سول بۋىن وكىلدەرى ۇلتتىق ونەر مەكتەبىن قالىپتاستىرىپ، قازاق مادەنيەتىنىڭ وركەندەۋىنە ولشەۋسىز ۇلەس قوستى.

جاڭا ءداۋىر – جاڭا مازمۇن

بۇگىندە بۇل ءداستۇر جاڭاشا سيپات الىپ وتىر. قازىرگى قازاقستاندىق جاستار رەسەيدىڭ جەتەكشى وقۋ ورىندارىندا – ماسكەۋ جانە سانكت-پەتەربۋرگ كونسەرۆاتوريالارىندا، س. ا. گەراسيموۆ اتىنداعى كينەماتوگرافيا ۋنيۆەرسيتەتى ۆگيك پەن رەپين اتىنداعى ونەر اكادەمياسىندا ءبىلىم الۋدا. ال قۇرمانعازى اتىنداعى ۇلتتىق كونسەرۆاتوريا مەن ت. جۇرگەنوۆ اتىنداعى قازاق ۇلتتىق ونەر اكادەمياسى رەسەيلىك ۇستازداردى شاقىرىپ، شەبەرلىك ساباقتارى مەن بىرلەسكەن شىعارماشىلىق جوبالاردى جۇزەگە اسىرىپ كەلەدى.

بۇل سەرىكتەستىكتىڭ ناقتى ناتيجەلەرى بار. مىسالى، جۇرگەنوۆ اكادەمياسى مەن رەسەي تەاتر ونەرى ينستيتۋتى گيتيس اراسىنداعى ستۋدەنتتەر الماسۋ باعدارلاماسى، حالىقارالىق بالەت جانە وپەرا جازعى مەكتەپتەرى، بىرلەسكەن قويىلىمدار مەن وركەسترلىك گاسترولدەر – جاس ونەرپازداردىڭ كاسىبي وسۋىنە زور مۇمكىندىك بەرىپ وتىر.

الايدا بۇل بايلانىس تەك تاجىريبە الماسۋمەن شەكتەلمەيدى. بۇل – مادەنيەتتەردىڭ توعىسۋى، حالىقتار اراسىنداعى رۋحاني كوپىر. ويتكەنى ونەر – ساياساتتان جوعارى، ال شىعارماشىلىق جۇرەكتەن تۋادى.

جۇرگەنوۆ اكادەمياسى – شىعارماشىلىق ديالوگ ورتالىعى

قازاق ۇلتتىق ونەر اكادەمياسى بۇگىندە رەسەيدىڭ 15-تەن استام جەتەكشى جوعارى وقۋ ورنىمەن تۇراقتى بايلانىس ورناتقان.
ولاردىڭ قاتارىندا:

• گيتيس – رەسەي تەاتر ونەرى ينستيتۋتى;
• ۆگيك – س. ا. گەراسيموۆ اتىنداعى كينەماتوگرافيا ۋنيۆەرسيتەتى;
• شتيگليتس اتىنداعى سانكت-پەتەربۋرگ ونەر جانە وندىرىستىك اكادەمياسى;
• ءنوۆوسىبىر ارحيتەكتۋرا، ديزاين جانە ونەر ۋنيۆەرسيتەتى;
• چەليابى مەملەكەتتىك مادەنيەت ينستيتۋتى;
• رەسەيدىڭ «جوعارى ەكونوميكا مەكتەبى» ۋنيۆەرسيتەتى جانە تاعى باسقالار بار.

اكادەميالىق ۇتقىرلىق باعدارلامالارى ستۋدەنتتەرگە تەك جاڭا ءبىلىم ەمەس، شىعارماشىلىق ەركىندىك پەن حالىقارالىق تاجىريبە سىيلايدى.

اكادەميا ستۋدەنتتەرى مەن وقىتۋشىلارى رەسەيلىك وقۋ ورىندارى ۇيىمداستىراتىن حالىقارالىق بايقاۋلار مەن فەستيۆالدەرگە بەلسەندى قاتىسادى.
مىسالى، ۆگيك اياسىندا وتكەن تمد ەلدەرىنىڭ III حالىقارالىق ستۋدەنتتىك فيلمدەر فەستيۆالى – «ۆوسحوجدەنيە» كەزىندە جۇرگەنوۆ اكادەمياسىنىڭ جاس رەجيسسەرلەرى مەن اكتەرلەرى بىرنەشە ماراپاتقا يە بولدى:

• مىرزا ماحامبەتتىڭ «قاراشا» ءفيلمى – «ۇزدىك رەجيسسۋرا»;
• ايشا الداكەەۆانىڭ «مامىر ءانى» – «ۇزدىك اكتريسا»;
• تىلەۋبەردى تۇراربەكۇلىنىڭ «جالعىز قالعان» ءفيلمى – قازىلار القاسىنىڭ ارنايى ديپلومى.

بۇل جەڭىستەر – جاستارىمىزدىڭ كاسىبي الەۋەتىنىڭ ايعاعى، ءارى حالىقارالىق ساحناعا شىعۋدىڭ سەنىمدى قادامى.

بولاشاق – تسيفرلىق ونەر مەن جاڭا فورماتتا

قازاق ۇلتتىق ونەر اكادەمياسى مەن رەسەيدىڭ مەملەكەتتىك كينوقورى اراسىنداعى ءوزارا تۇسىنىستىك تۋرالى مەموراندۋمى ەكى ەلدىڭ مادەني بايلانىسىن جاڭا دەڭگەيگە كوتەردى. قۇجاتتا مۋزىكا، تەاتر جانە كينو سالالارىنداعى تاجىريبە الماسۋ مەن بىرلەسكەن جوبالار قامتىلعان.

سونىمەن قاتار، اكادەميامىز، رەسەيدىڭ «جوعارى ەكونوميكا مەكتەبى» جانە «ياندەكس» كومپانياسى اراسىندا ۇشجاقتى كەلىسىم جاسالىپ، ستۋدەنتتەرگە ارنالعان ستسەناريلىك شەبەرلىك بويىنشا minor باعدارلاماسى ىسكە قوسىلماق.

بۇگىنگى سەرىكتەستىكتىڭ ستراتەگيالىق باعىتى – تسيفرلىق ونەر مەن ونلاين ءبىلىم بەرۋ. 3D-انيماتسيا، گرافيكالىق ديزاين، زاماناۋي مەديا جانە بەينەوندىرىس بويىنشا بىرلەسكەن كۋرستار ەكى ەل ستۋدەنتتەرىن جاڭا تەحنولوگيالار كەڭىستىگىندە توعىستىرادى.

سونداي-اق تەاتر، مۋزىكا، كينو جانە حورەوگرافيا باعىتتارىندا جازعى مەكتەپتەر مەن شىعارماشىلىق زەرتحانالار ۇيىمداستىرۋ جوسپارلانىپ وتىر. الداعى ۋاقىتتا رەسەي تەاتر ونەرى ينستيتۋتى گيتيس-پەن ەكىجاقتى قاتىناستاردى دامىتۋ كارتاسىنا قول قويۋ دا وسى باعىتتاعى جاڭا كەزەڭ بولماق.

مادەني مۇرا مەن رۋحاني ساباقتاستىق

ءبىزدىڭ سەرىكتەستىگىمىز تەك زاماناۋي باعىتتارمەن شەكتەلمەيدى. فولكلور، ءداستۇرلى مۋزىكا مەن ساندىك-قولدانبالى ونەر سالالارىنداعى بىرلەسكەن جوبالار – مادەني مۇرانى ساقتاۋ مەن ناسيحاتتاۋعا باعىتتالعان ماڭىزدى قادام. بۇل – ۇلتتىڭ رۋحاني ىرگەتاسىن بەكەمدەپ، ۇرپاقتار ساباقتاستىعىن جالعايتىن ىزگى ميسسيا.

رەسەيدىڭ ونەر مەكتەپتەرى قازاق مادەنيەتىنىڭ دامۋىنا ايتارلىقتاي ۇلەس قوستى. ال بۇگىندە جۇرگەنوۆ اكادەمياسى سول ءداستۇردى جاڭا زامان تالابىنا ساي جالعاستىرىپ وتىر.

قازاقستان مەن رەسەي اراسىنداعى سەرىكتەستىك – جاي عانا اكادەميالىق بايلانىس ەمەس. بۇل – مادەنيەت پەن ونەر ارقىلى حالىقتاردى جاقىنداستىراتىن، ورتاق رۋحاني كەڭىستىك قالىپتاستىراتىن كوپىر.

ونەر – دوستىقتىڭ، ءوزارا تۇسىنىستىكتىڭ جانە رۋحاني بىرلىكتىڭ جارشىسى.
ءبىزدىڭ ماقسات – وسى بايلانىستى جاڭا بيىككە كوتەرۋ، جاس ۇرپاققا شابىت پەن سەنىم ۇيالاتۋ.

ويتكەنى ونەردىڭ شەكاراسى جوق. ال ونى بىرىكتىرەتىن جۇرەك پەن تالپىنىس – ورتاق قۇندىلىق.

شىڭعىس ەرگوبەك،

تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ
وقۋ جانە وقۋ-ادىستەمەلىك جۇمىستار جونىندەگى پرورەكتورى

Abai.kz