قازاقستاننىڭ تۇڭعىش پرەزيدەنتىنىڭ كەڭەسشىسى – ءباسپاسوز حاتشىسى ايدوس ۇكىباي سارى نازارباەۆانىڭ دەنساۋلىق جاعدايىنا قاتىستى مالىمدەمە جاسادى.

حابارلامادا سوڭعى ۋاقىتتا كەيبىر باق پەن الەۋمەتتىك جەلىدە سارا نازارباەۆانىڭ دەنساۋلىق جاعدايى مەن جۇرگەن جەرى تۋرالى ءارتۇرلى بولجامدار مەن راستالماعان اقپاراتتار تاراپ جاتقانى ايتىلعان.

«وسىعان وراي رەسمي تۇسىنىكتەمە بەرۋدى ءجون دەپ سانايمىن: ءساۋىر ايىنان بەرى سارا الپىسقىزى نازارباەۆا الماتى قالاسىنداعى پرەزيدەنت ءىس باسقارماسىنىڭ مەديتسينالىق ورتالىعىنا قاراستى ۇلتتىق گوسپيتالدە جوسپارلى ەم قابىلداپ كەلەدى. بارلىق مەديتسينالىق شارالار بەكىتىلگەن ستاندارتتارعا ساي، وتاندىق مامانداردىڭ باقىلاۋىمەن جۇزەگە اسىرىلۋدا»، – دەلىنگەن حابارلامادا.

ايدوس ۇكىباي باق پەن الەۋمەتتىك جەلى قولدانۋشىلارىن ادەپتىلىك پەن قۇرمەت ساقتاۋعا، «سارا الپىسقىزىنىڭ اتىن نەگىزسىز الىپ، تەكسەرىلمەگەن اقپارات ارقىلى نازار اۋدارتۋعا تىرىسپاۋعا» شاقىردى.

ەستەرىڭىزگە سالا كەتەيىك، بۇعان دەيىن جەلىدە سارا الپىسقىزىنىڭ جاعدايى تۋرالى ءتۇرلى قاۋەسەتتەر تاراعان بولاتىن. ايدوس ۇكىباي سارا الپىسقىزى قايتىس بولدى دەگەن اقپارات جالعان ەكەنىن جانە ونىڭ ەم قابىلداپ جاتقانىن جەتكىزگەن بولاتىن.

ال مادەنيەت جانە اقپارات ءمينيسترى ايدا بالاەۆا وسى رەتتە تەك رەسمي اقپاراتقا سۇيەنۋگە شاقىردى.

Abai.kz