قوستاناي وبلىسىندا ورتالىق ازياداعى ەڭ ءىرى جانە ەكولوگيالىق تازا مەتاللۋرگيالىق زاۋىت سالىنادى. جوبانى Eurasian Resources Group (ERG) جۇزەگە اسىرىپ، اقش پەن اۆستريانىڭ جەتەكشى سەرىكتەستەرى — Midrex Technologies جانە Primetals Technologies كونسورتسيۋمىمەن ستراتەگيالىق كەلىسىمگە قول قويدى.

جاڭا زاۋىت «QazIron ERG» جشس ارقىلى ىسكە اسادى. ونىڭ قۋاتتىلىعى جىلىنا 2 ميلليون توننا ىستىق بريكەتتەلگەن تەمىر بولادى. قۇرىلىس 2029 جىلى اياقتالىپ، ءوندىرىس ىسكە قوسىلماق. ينۆەستيتسيا كولەمى 650 ملرد تەڭگەدەن اسادى، ال مىڭنان استام جاڭا جۇمىس ورنى اشىلادى.

ءوندىرىس Midrex تەحنولوگياسىن قولدانادى — ءداستۇرلى كوكستىڭ ورنىنا تابيعي گاز پايدالانىلادى، بۇل قالدىق شىعارىندىلاردى 50%-دان استام ازايتادى. شيكىزات رەتىندە سسگپو كاسىپورنىنىڭ تەمىر وكاتىشتارى قولدانىلادى، دايىن ءونىم بولاشاق بولات بالقىتۋ زاۋىتىنا جونەلتىلەدى.

ERG باس ديرەكتورى شۇقرات يبراگيموۆ جوبانى قازاقستاننىڭ مەتاللۋرگياسىن دامىتۋدىڭ جاڭا كەزەڭى دەپ اتادى: «بۇل تەك زاۋىت سالۋ ەمەس، “جاسىل” مەتاللۋرگيانى دامىتۋعا، جاڭا تەحنولوگيالار ەنگىزۋگە، ەكسپورتتى ۇلعايتۋعا جانە بىلىكتى كادرلاردى دايىنداۋعا جول اشادى»، — دەدى.

قوستاناي وبلىسىنىڭ اكىمى قۇمار اقساقالوۆ زاۋىتتىڭ ءوڭىر ەكونوميكاسىن كۇشەيتەتىنىن جانە جاڭا يندۋستريالدى ەكوجۇيەنىڭ نەگىزى بولاتىنىن اتاپ ءوتتى.

Primetals Technologies وكىلى اندرەاس فيبەك MIDREX Flex تەحنولوگياسىن الەمدەگى ەڭ ەكولوگيالىق شەشىمدەردىڭ ءبىرى دەپ سيپاتتاپ، ونىڭ كومىرتەك ءىزىن 50%-دان استام ازايتاتىنىن ايتتى. Midrex قازىرگى تاڭدا گبج ءوندىرىسىنىڭ 90%-ىن قامتاماسىز ەتەدى.

بۇل كەلىسىم جوبانىڭ كەلەسى كەزەڭى بولىپ سانالادى — بۇعان دەيىن كونسورتسيۋم زاۋىتتىڭ نەگىزگى ينجەنەرلىك جوباسىن ازىرلەگەن بولاتىن.

Abai.kz