قازاقستان تاۋەلسىزدىگىن جاريالاپ، ەكونوميكالىق باعىتتا كەڭەس وداعىنىڭ ىدىراۋىنا اكەلىپ سوقتىرعان جوسپارلى شارۋاشىلىقتان باس تارتىپ نارىقتىق ەكونوميكاعا كوشتى. بۇل ءوز كەزەگىندە ەلدىڭ ەڭبەك نارىعىنا، ماماندىق تاڭداۋعا، قالا بەردى بۇرىنعى اكىمشىلىك بولىنىسىنە ايتارلىقتاي اسەر ەتتى.

ەل تۇرعىندارى ۇلكەن-كىشى، ەر- ايەل دەمەي بازارعا، ساۋدا جاساۋعا بەت بۇردى. سونىڭ ناتيجەسىندە ورتا جانە شاعىن بيزنەس وكىلدەرى قالىپتاستى. ولار «ءوزىن ءوزى جۇمىسپەن قامتۋشىلار» دەپ اسپەتتەلدى. وزگە دە ماماندىقتار تاسادا قالىپ قويدى. كەي سالادا جۇمىسشى تاپشىلىعى ايقىن سەزىلدى. ماسەلەنىڭ وزەكتىلىگىن جەتە تانىعىن پرەزيدەنت توقاەۆ 2025-جىلدى جۇمىسشى ماماندىقتار جىلى دەپ جاريالادى.

ءوز سوزىندە: "جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز! ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك" دەپ كەسىپ ايتتى قاسىم-جومارت توقاەۆ.

بۇل دەر كەزىندە قابىلدانعان شەشىم ەدى. اركىم ساۋدامەن ميلليونەر بولۋدى ارماندايتىن زاماننىڭ ۋاقىتى ءوتتى. ادال ەڭبەكپەن ءار سالادا ەڭبەكتەنىپ-اق باقۋاتتى دەڭگەيگە جەتەتىن زامان كەلدى. سونى جەتە ءتۇسىنۋ ۇشىندە پرەزيدەنتتىڭ باستاماسىن قوعامدا باسا دارىپتەۋ ماڭىزدى. اسىرەسە جاس بۋىنعا. قازىرگى ينتەرنەت زامانىندا ءوسىپ جاتقان جاس بۋىننىڭ الەۋمەتتىك جەلىدە حايپ قۋىپ، وڭاي جولمەن اقشا تابۋدى كادىمگىدەي كاسىپ ەتىپ العانى جاسىرىن ەمەس. وعان قارسى زاڭدىق تۇرعىدان دا ناقتى قادامدار جاسالىنىپ جاتىر.

سوڭعى 30 جىلدا ىشكى جالپى ءونىم قۇنى 10 مىڭ دوللاردان اسقان ەلدەر قاتىرىنا ەنگەن، ەكونوميكالىق جەتىستىگى الەمدىك دەڭگەيدە مويىندالعان ەلىمىزدە قانداي ماماندىققا دا ورىن، ناقتى تابىس بار. ونى رەسمي ستاتيستيكالاردان انىق بايقايمىز.

ۇلتتىق ستاتيستيكا بيۋروسىنىڭ مالىمەتىنشە، 2025 جىلدىڭ ەكىنشى توقسانىنداعى ەل بويىنشا ورتاشا ايلىق نومينالدى جالاقى 448,6 مىڭ تەڭگەگە جەتكەن. قالالىق جەرلەردە – 471 مىڭ تەڭگە بولسا، اۋىلدىق جەرلەردە – 381,7 مىڭ تەڭگە.

كەيىنگى بەس جىلدىڭ وزىندە ورتاشا ايلىق جالاقى ەكى ەسەدەن استام وسكەن.
ناقتى ماماندىقتاردىڭ تابىسىنا توقتالساق: قارا جۇمىسشىدان تارتىپ اۆتوبۋس جۇرگىزۋشىسى، وراۋشى-فاسوۆششيك، ارنايى تەحنيكا ءماشينيستى، تراكتورشى، دانەكەرلەۋشىلەردىڭ جالاقىسى 350 مىڭ تەڭگەدەن باستاپ 600 مىڭ تەڭگەگە دەيىن جەتكەن. قالا مەن اۋىلدىق جەرلەردىڭ جالاقى پارقى ايتارلىقتاي ازايعان.

قازاقستاندىق مامانداردىڭ جالاقى مولشەرىن كورشىلەس ەلددەردىڭ دەيگەيىمەن سالىستىرساق تا ەلدىڭ الەۋەتىنە انىق كوز جەتكىزەمىز.

قازاقستانداعى ورتاشا ايلىق نومينالدى جالاقىنى 448,6 مىڭ تگ دەپ الساق بۇل وزبەكستانداعى (شامامەن 265 مىڭ تگ) كورسەتكىشتەن 70%-عا، قىرعىزستانداعى (259,2 مىڭ تگ) كورسەتكىشتەن 73%-عا جوعارى.

سوندىقتان ەلىمىزدە قالاعان ماماندىقتا ەڭبەكتەنۋگە، جوعارى تابىس تابۋعا بارلىق مۇمكىندىك بار. ماسەلە نيەتتە، قۇلشىنىستا، تاباندىلقتا.

ماماندىقتىڭ جاقسى-جامانى، ابرويلى-ابرويسىزى، ۇلكەن-كىشىسى بولمايدى. جۇمىسشىلار جىلىنىڭ كوزدەگەنى دە سول.

Abai.kz