وسىدان تۋرا 5 جىل بۇرىن، قاراباقتا قيان-كەسكى شايقاستار بولىپ جاتتى. ازەربايجان اسكەرى العا جىلجىپ، قاراباقتى ازات ەتۋ جولىندا سوعىسىپ جاتقان ەدى. شۋشاعا جاقىنداپ قالعان بولاتىن.

(سۋرەت:https://baq.kz/)

قاراباقتىڭ ازەربايجانعا ءتۇبى قايتارى انىق ەدى. بىراق ول ساتتە «زانگەزۋر ءدالىزى» اياسىندا ءىرى جوبالار تالقىلانادى دەپ ەشكىم ويلاماعان. بەس جىل ءوتتى. «زانگەزۋر ءدالىزى» انە-مىنە اشىلۋى مۇمكىن. ال ونىڭ ماڭىزى جايلى ماڭىزدى تالقىلاۋلار ءجۇرىپ جاتىر.

كەشە قازاقستانعا ازەربايجاننىڭ باسشىسى اليەۆ كەلدى. مەملەكەتتىك ساپار. بۇگىن قازاقستان مەن ازەربايجاننىڭ باسشىلارى ەكى ەلدىڭ ارىپتەستىگى جايلى، ەكونوميكالىق بايلانىستى ارتتىرۋ حاقىسىندا كەزدەسۋ وتكىزىپ جاتىر. جوعارى مەملەكەتارالىق كەڭەسىنىڭ ەكىنشى وتىرىسى دا ءوتتى. بيىل قازاقستان مەن ازەربايجاننىڭ ستراتەگيالىق سەرىكتەستىك جانە وداقتاستىق تۋرالى شارتقا قول قويىلعانىنا 20 جىل تولدى. ول دا بۇگىنگى جيىندا ايتىلدى.

جالپى ازەربايجانعا ەرەكشە نازار اۋدارىپ كەلەمىز. نەگە؟ ءۇش قانا سەبەبىن جازايىن (جالپى ول ۇشتەن دە كوپ).

ءبىرىنشىسى، ترانسكاسپي باعىتى. بۇگىن توقاەۆ پەن اليەۆكە «ورتا ءدالىزدى دامىتۋ جوباسى» تانىستىرىلدى. بۇل باعىت قىتاي مەن ەۋروپانى جالعاپ جاتقان نەگىزگى كولىك-لوگيستيكالىق باعىت سانالادى. قىتايدان شىققان جۇك 15-18 كۇندە قازاقستان اۋماعىن، ازەربايجان اۋماعىن باسىپ ءوتىپ، گرۋزيا پورتتارىنا جەتەدى ەكەن. ارى قاراي قارا تەڭىزبەن ەۋروپاعا بەت الادى. ءدال وسى باعىتپەن ەۋروپانىڭ تاۋارى قىتايعا كەلەدى. مىنە، وسى باعىتتىڭ دامۋىنا ءبىز دە، ازەربايجان دا مۇددەلى. ەكى ەلدىڭ مۇددەسى وسى تۇستا تۋرا كەلىپ تۇر. بۇگىنگى جيىندا بۇل تۋرالى كوپ ايتىلدى. جاقىندا «زانگەزۋر ءدالىزى» اشىلسا، وندا تاعى ءبىر تارماق قوسىلادى. تاۋار وتكىزۋ كولەمى دە ارتادى.

ەكىنشىسى، مۇناي تاسىمالداۋ. ءبىزدىڭ مۇنايدىڭ باسىم بولىگى رەسەيمەن وتەتىنىن ءبارىمىز بىلەمىز. بىراق تاسىمال جولىن ءارتاراپتاندىرۋ كەرەك. «باكۋ-تبيليسي-جەيحان» قۇبىرىمەن مۇنايدى كوبىرەك تاسۋعا نيەتتىمىز. 2022 جىلدان باستاپ بۇل باعىت بويىنشا مۇناي تاسۋ ارتىپ كەلەدى. ءبىز وسى جوسپاردى ىسكە اسىرۋ ءۇشىن بىرنەشە كىشى تانكەرلەر دە ساتىپ الدىق.

ءۇشىنشىسى، سۋاستى جەلىسى. قازاقستان مەن ازەربايجاننىڭ كومپانيالارى كاسپيدىڭ تۇبىمەن وپتيكالىق كابەل تارتۋ جۇمىسىن باستادى. بۇل ارينە ءبىراز ۋاقىتتى قاجەت ەتەدى. جوسپار بويىنشا 2026 جىلى ءبىتۋى ءتيىس. ءسويتىپ تاعى ءبىر باعىتپەن ينتەرنەت الا باستايمىز. قازىر ترافيكتىڭ 90 پايىزدان استامى رەسەي ارقىلى كەلىپ جاتىر عوي. ال بۇل جوبا رەسەيدى اينالىپ وتەدى. بۇل بىزگە كەرەك پە؟ البەتتە كەرەك!

قازاقستان مەن ازەربايجان باسشىلارى بۇگىن 15 ءتۇرلى قۇجاتقا قول قويىپتى. حازار تەڭىزىنىڭ ءبىر جاعالاۋىندا قازاق ەلى، ءبىر جاعالاۋىندا ازەربايجان ەلى ورنالاسقان. ەكى ەلدىڭ حالقى ءبىر-بىرىنە تاتۋلىق پەن تىنىشتىق، دامۋ مەن وركەندەۋ تىلەيدى دەپ ويلايمىن.

Abai.kz