ەلىمىز ەرتەڭ ۇلتتىق مەرەكە – رەسپۋبليكا كۇنىن اتاپ وتەدى. وسىعان وراي مەملەكەت باسشىسى قاسىم-جومارت توقاەۆ ەل دامۋىنا ەلەۋلى ۇلەس قوسقان بىرقاتار ازاماتتاردى مەملەكەتتىك ناگرادالارمەن ماراپاتتاۋ تۋرالى جارلىققا قول قويدى.

وندىرىستىك قىزمەتتەگى اسا ۇزدىك ەڭبەگى، اگروونەركاسىپ كەشەنىن جانە تاۋ-كەن ءوندىرۋ سالاسىن دامىتۋعا قوسقان ايرىقشا ۇلەسى ءۇشىن جوعارى دارەجەلى ەرەكشەلىك بەلگىسى – «قازاقستاننىڭ ەڭبەك ەرى» اتاعى بەرىلىپ، ايرىقشا بەلگىسى – التىن جۇلدىز بەن «وتان» وردەنى تابىستالدى:

* سولتۇستىك قازاقستان وبلىسىنداعى «مامبەتوۆ جانە ك» كس مەحانيزاتورى مۇرات قاراجۇمانوۆقا;

* قاراعاندى وبلىسىنداعى «Qarmet» اق كد «شاحتينسكايا» شاحتاسى ۋچاسكەسىنىڭ باستىعى سەرگەي چەرنوبايعا.

ۇلتتىق مەرەكە قارساڭىندا مەملەكەت باسشىسىنىڭ جارلىعىمەن ەلىمىزدىڭ الەۋمەتتىك-ەكونوميكالىق، مادەني جانە رۋحاني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا، سونداي-اق بەلسەندى قوعامدىق قىزمەت اتقارعان ازاماتتارعا مەملەكەتتىك ماراپاتتار تابىستالدى.

ماراپات يەلەرىنىڭ قاتارىندا ەڭبەك ارداگەرلەرى، جۇمىسشىلار، ءوندىرىس، بيزنەس، ءبىلىم بەرۋ، عىلىم، دەنساۋلىق ساقتاۋ سالالارىنىڭ وكىلدەرى، اسكەريلەر، قۇقىق قورعاۋ ورگاندارىنىڭ قىزمەتكەرلەرى، سپورتشىلار مەن مادەنيەت قايراتكەرلەرى بار.

* «وتان» وردەنىمەن پاۆلودار وبلىسىنداعى «گاليتسكوە» جشس ديرەكتورى ا.كاسيتسين ماراپاتتالدى.

* ءى دارەجەلى «بارىس» وردەنى – «باقىرشىق تاۋ-كەن ءوندىرۋ كاسىپورنى» جشس باسقارما توراعاسى ك.يساەۆقا جانە قازاقستان جۋرناليستيكاسىنىڭ ارداگەرى س.حارچەنكوعا تابىستالدى.

* ءىى دارەجەلى «بارىس» وردەنى – «اقتوعاي» سۋ ەلەكتر ستانساسىنىڭ ديرەكتورى ت.بايمولداەۆقا, اكادەميك و.سابدەنگە، ەڭبەك ارداگەرى ە.تاجيەۆكە, ديريجەر م.سەركەباەۆقا جانە باسقا تۇلعالارعا بەرىلدى.

* ءىىى دارەجەلى «بارىس» وردەنىمەن پروفەسسورلار ا.الماتوۆ پەن ن.يزمايلوۆ, كاسىپكەر ت.شەكتەباەۆ, اقىن ءا.بەركەنوۆا جانە وزگە دە ازاماتتار ماراپاتتالدى.

ەلىمىزدىڭ رۋحاني جانە زياتكەرلىك دامۋىنا قوسقان ۇلەسى ءۇشىن بىرقاتار عالىمدار، مادەنيەت جانە ءوندىرىس سالاسىنىڭ وكىلدەرى «پاراسات» وردەنىنە يە بولدى. ولاردىڭ قاتارىندا اقىن ع.جايلىباي, جۋرناليستيكا ارداگەرى ە.برۋسيلوۆسكايا, دارىگەر م.باشاباەۆ جانە باسقالار بار.

حالىقتار اراسىنداعى بەيبىتشىلىك پەن ىنتىماقتاستىقتى نىعايتۋعا قوسقان ەڭبەگى ءۇشىن يتاليالىق «Social theater-Camogli» تەاترىنىڭ كوركەمدىك جەتەكشىسى اكۆاۆيۆا دجۋزەپپە ءىى دارەجەلى «دوستىق» وردەنىمەن ماراپاتتالدى.

«قۇرمەت» وردەنى استاناداعى №3 قالالىق بالالار اۋرۋحاناسىنىڭ باس دارىگەرى م.ابدۋوۆقا, ينجەنەر ب.ايتجانعا, «QazaqGaz Aimaq» سلەسارى گ.جاسىباەۆاعا, ارحيۆ ديرەكتورى س.شىلدەبايعا, اكتريسا گ.دۋسماتوۆاعا, ساراپشى ا.چەبوتارەۆكە جانە باسقا ازاماتتارعا تابىستالدى.

ۇلت بىرلىگىن نىعايتۋ جانە قوعامدىق كەلىسىمدى قامتاماسىز ەتۋ جولىنداعى ەڭبەگى ءۇشىن «ەل بىرلىگى» وردەنى «احىسكا» تۇرىك ەتنومادەني ورتالىعىنىڭ توراعاسى ل.اسانوۆقا, پاۆلودار وبلىسىنداعى سلاۆيان جانە كازاك ۇيىمدارى قاۋىمداستىعىنىڭ توراعاسى ۆ.بەركوۆسكيگە, نەمىس بىرلەستىگى وكىلى ە.بولگەرتكە، تاتار-باشقۇرت ورتالىعىنىڭ توراعاسى ر.ۆاليەۆكە, وزبەك قاۋىمداستىعى وكىلى ا.يسماتۋللاەۆقا بەرىلدى.

ونەركاسىپ، كولىك، قۇرىلىس، اۋىل شارۋاشىلىعى جانە وزگە وندىرىستىك سالالاردىڭ ەڭبەككەرلەرى ءىىى دارەجەلى «ەڭبەك داڭقى» وردەنىنىڭ يەگەرلەرى اتاندى.

«قازاقستاننىڭ ەڭبەك سىڭىرگەن قايراتكەرى» اتاعى مادەنيەت سالاسىنىڭ كورنەكتى وكىلدەرى ز.التىنباەۆاعا، ءا.التىنبەككە، ن.جمەرەنەتسكاياعا، ب.قاجىباەۆقا, قوعام قايراتكەرى ي.ساۋەرگە جانە باسقا تۇلعالارعا بەرىلدى.

«قازاقستاننىڭ حالىق جازۋشىسى» اتاعىنا م.ايتقوجا مەن ع.قابىشۇلى، ال «قازاقستاننىڭ حالىق ءارتىسى» اتاعىنا ب.ءابدىلمانوۆ، م.وتەكەشوۆا، ا.جايىموۆ، ت.جانقۇل، ش.جانىسبەكوۆا، ب.يبراەۆ، ك.قازاقباەۆا جانە ر.ماشۋروۆا لايىق دەپ تانىلدى.

دەنساۋلىق ساقتاۋ جانە عىلىم سالاسىنىڭ وكىلدەرى «قازاقستاننىڭ ەڭبەك سىڭىرگەن دارىگەرى» جانە «قازاقستاننىڭ ەڭبەك سىڭىرگەن عىلىم جانە تەحنيكا قايراتكەرى» اتاقتارىن يەلەندى.

اسكەري جانە قىزمەتتىك بورىشىن ادال اتقارىپ، ۇلتتىق قاۋىپسىزدىك پەن قۇقىقتىق ءتارتىپتى قامتاماسىز ەتۋدەگى ەرلىگى ءۇشىن اسكەريلەر مەن قۇقىق قورعاۋ ورگاندارىنىڭ وكىلدەرى «داڭق»، «ايبىن» وردەندەرىمەن، سونداي-اق «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارىمەن ماراپاتتالدى.

ايتا كەتەرلىگى، جۇمىسشى ماماندىقتارى جىلى اياسىندا رەسپۋبليكا كۇنى قارساڭىندا ەڭبەك اۋلەتتەرىنىڭ 138 وكىلى، ءتۇرلى سالاداعى 500-گە جۋىق جۇمىسشى مەن ەڭبەككەر، شاعىن جانە ورتا بيزنەستىڭ 200-گە جۋىق وكىلى، 130-دان استام ۇستاز بەن عالىم، 100-دەن اسا مەديتسينا قىزمەتكەرى جانە ءوز ەڭبەگىمەن ەل دامۋىنا ۇلەس قوسىپ جۇرگەن باسقا دا ازاماتتار مەملەكەتتىك ناگرادالارعا يە بولدى.

Abai.kz