رەسپۋبليكا كۇنى ءبارىمىز ءۇشىن ۇلى مەرەكە. ويتكەنى الەم ەلدەرىندە رەسپۋبليكا كۇنى ەڭ باستى ۇلتتىق مەرەكە بولىپ تويلانادى.

ەلىمىزدىڭ جاڭا ساياسي باسشىلىعى قۇقىقتىق جۇيەنى قالىپتاستىرۋ ارقىلى، الەمنىڭ دامىعان ەلدەرىنىڭ تاجىريبەسىن ەسكەرە وتىرىپ، دەموكراتيالىق ينستيتۋتتار قۇرۋ جونىندە تاباندى جۇمىستار جۇرگىزىپ كەلەدى. تاريحي دامۋ كوكجيەگىمىز كورسەتىپ وتىرعانىنداي، مەملەكەت قۇرۋدىڭ شەشۋشى كەزەڭدەرىندە جۇرگىزىلگەن رەفورمالاردىڭ ساتتىلىگى حالقىمىزدىڭ جۇرەگىندە وسى تاريحي كۇندى ۇيالاتىپ بەردى. ارينە، مۇنىڭ ءبارى ۇلتقا جەتەكشىلىك ەتۋشى تۇلعاعا بايلانىستى ەكەنى انىق. بۇگىنگى تاڭدا ءبىز قازاقستان رەسپۋبليكاسىنىڭ  پرەزيدەنتى قاسىم-جومارت توقاەۆتىڭ وراساڭ زور ءرولىن اتاپ ايتقانىمىز ابزال.

قازاقستان – ەۋرازيالىق قۇرلىعىنىڭ ورتالىعىندا، ۇلى سارىارقانىڭ ورتاسىندا ءوزىنىڭ قايتالانباس ورنەگىمەن، قۇرىلىس قارقىنىمەن سەنىمدى قادامى ارقىلى تۇراقتىلىق پەن پروگرەسستى ورنىقتىردى. وسى ارقىلى ۇزاق مەرزىمدى ستراتەگياسىنىڭ نەگىزىندە يننوۆاتسيالىق-يندۋستريالىق دامۋ ستراتەگياسىن جۇزەگە اسىرىپ كەلەدى.

بيىل قازاقستان مەملەكەتتىك ەگەمەندىك تۋرالى دەكلاراتسيانىڭ 35 جىلدىعىن اتاپ وتۋدە. بۇگىندە قازاقستان ءوز دامۋىنىڭ جاڭا ساپالى كەزەڭىندە تۇر. ءبىز الەمدەگى باسەكەگە اناعۇرلىم قابىلەتتى ەلدەردىڭ قاتارىنان ورىن الدىق. بۇل كۇن ءبارىمىز ءۇشىن ۇلى مەرەكە بولۋى ءتيىس.

تاۋەلسىزدىكتىڭ قۇنى دا، ساپاسى دا ەشقانداي باعامەن ولشەنبەيدى. ۇلى اعارتۋشى ىبىراي التىنسارين: «...قازاق حالقى ازباعان، تابيعاتى تازا حالىق. ونىڭ تالابى بىرەۋ سالىپ بەرگەن تار شەڭبەردىڭ قىسپاعىنا سىيا المايدى»، - دەپ ايتقان بولاتىن. ءبىز، قازاقستاندا تۇراتىن ەتنوس وكىلدەرى ءوزىمىزدى وسى توپىراقتا تۇرىپ جاتقانىمىزدى ماقتان ەتەمىز. رەسپۋبليكا تۋىن كوتەرە وتىرىپ، ءبىز، قازاق مەملەكەتىنىڭ تاۋەلسىزدىگىنە جول اشىلعانىنا قۋانا بىلدىك. سول كۇننەن باستاپ، تۋعان جەرگە قۇت كەلدى. عاسىرعا بەرگىسىز ءجۇرىپ وتكەن جولىمىز قانشالىق اۋىر بولعانىمەن، سول تاۋەلسىزدىكتى باياندى ەتۋ ەلگە دە، ەل تاعدىرىن ويلاعان ەرگە دە سونشالىق سىن بولدى.

قازىرگى تاڭدا بىزدەر، ۇلى جەتىستىكتەرگە قول جەتكىزدىك. تاۋەلسىزدىك الۋىمىزبەن بىرگە بۇگىندە جاڭارعان قازاقستاننىڭ جاڭا ءومىر كەزەڭدەرى، ءتىپتى كەرەك دەسەڭىز، ونىڭ جاڭا تاريحىن جاساۋعا اتسالىسۋعا ءتيىسپىز. ءبىز ونى ەشۋاقىتتا ۇمىتپاۋعا، ەستەن شىعارماۋعا ءتيىسپىز. بۇل – ۇلتتىق ماقتانىشىمىزعا لايىقتى ۇلاعاتتى ۇلكەن ءىس.

ەلىمىزدە تاۋەلسىزدىكتىڭ قۇنى دا، ساپاسى دا ەشقانداي باعامەن ولشەنبەيدى. ءبىز الەمدىك قاۋىمداستىقتا تەرەزەسى تەڭ تولىققاندى تۇتاس مەملەكەتپىز. دۇنيەجۇزىلىك كاۋىمداستىقتىڭ بەلسەندى مۇشەسىمىز. قول جەتكىزگەن جەتىستىگىمىز –تاۋەلسىزدىگىمىزدىڭ نىعايۋى.

تاۋەلسىزدىك بۇكىل اتا-بابالارىمىزدىڭ اسقاقتاعان ارمانى ەدى، سول ءۇشىن قازاق دالاسىندا ءومىر ءسۇرىپ جاتقان حالىقتاردىڭ رەسپۋبليكا تۋىنىڭ استىندا ءبىر ساپتا تۇرۋى ءتيىس. تاۋەلسىزدىكتىڭ ارقاسىندا ىنتىماعىمىز بەن بىرلىگىمىز جاراسىپ، كەرەگەسى كەڭ ەلگە اينالدىق. ەلىمنىڭ قاي قيىرىندا ەڭبەك ەتسەم دە مەنىڭ نەگىزگى ماقساتىم – ۇرپاعىمنىڭ وسى ەلگە، وسى توپىراققا تاعزىم ەتۋىن كورۋىمنەن تۇرادى. بۇل بەيبىتشىلىكتىڭ، تۇراقتىلىق پەن گۇلدەنۋدىڭ بيىك شىڭى.

ءبىزدىڭ الداعى كەزەڭدەگى ماقسات-مۇراتىمىز – تاۋەلسىزدىگىمىزدى بۇدان دا تۇعىرلى ەتۋگە بارىنشا ۇلەس قوسۋ. بارىنەن بۇرىن ەگەمەن ەل مۇددەسىن جوعارى ۇستاپ، اقىل-پاراساتىمىز بەن قاجىر-قايراتىمىزدى جاڭارۋ مەن كەمەلدەنۋ جولىنا جۇمىلدىرۋ.

رافيك ميرزوەۆ،

قازاقستان حالقى اسسامبلەياسى قورىنىڭ توراعاسى

Abai.kz