ءبىر پالاتالى پارلامەنتتىڭ ۇكىمەت پەن جوعارى اۋديتورلىق پالاتادان رەسپۋبليكالىق بيۋدجەتتىڭ اتقارىلۋىنان ەسەپ الاتىن كونستيتۋتسيالىق قۇزىرەتى بولۋى كەرەك!

«كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت». بۇل — پرەزيدەنتىمىز قاسىم-جومارت توقاەۆتىڭ فورمۋلاسى.

وسىنداي تاماشا فورمۋلا جولعا قويىلعالى ءبىراز جىل بولعانىمەن، ونىڭ سوڭعى ەكى بولىگىن قامتاماسىز ەتەتىن تەتىك كونستيتۋتسيادا جوق! تەك، ءسوز جۇزىندە قالىپ بارادى…

ەندەشە، ەلىمىزدە جۇرگىزلەتىن بارلىق رەفورما وسى فورمۋلانىڭ ءوز دەڭگەيىندە جۇزەگە اسۋىنا باعىتتالىپ جاسالۋى كەرەك.

وسى جەردە پارلامەنتتىك رەفورما جونىندەگى جۇمىس توبىنىڭ جەتەكشىسى ە. قارين مىرزانىڭ; جۇمىس توبى جەتەكشىسىنىڭ ورىنباسارلارى ە. جيەنباەۆ پەن ا. قىرىقباەۆ مىرزانىڭ جانە جۇمىس توبىنىڭ وزگە دە مۇشەلەرىنىڭ نازارىن قولدانىستاعى كونستيتۋتسيانىڭ مىنا ءبىر تۇسىنا اۋدارعاندى ءجون كوردىم.

— ۇكىمەت پەن جوعارى اۋديتورلىق پالاتانىڭ رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن بەكىتەدى.

بۇل قازىرگى كونستيتۋتسيامىزدىڭ 53-بابىنىڭ 2) تارماعىنىڭ ءبىرىنشى بولىگى.

شىن مانىندەگى ىقپالدى پارلامەت قۇرۋ ءۇشىن، ەندى قۇرىلاتىن ءبىر پالاتالى پارلامەنت ۇكىمەت پەن جوعارى اۋديتورلىق پالاتانىڭ رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن بەكىتىپ قانا قويماۋى كەرەك.

سونىمەن بىرگە، پارلامەنتتىڭ ۇكىمەت پەن جوعارى اۋديتورلىق پالاتادان رەسپۋبليكالىق بيۋدجەتتىڭ اتقارىلۋىنان ەسەپ الاتىن دا كونستيتۋتسيالىق قۇزىرەتى بولۋى كەرەك!

سوندا عانا پارلەمەتتىڭ ىقپالى ارتادى. ناعىز ىقپالدى پارلامەنت بولادى.

ايتپاقشى، اتا زاڭنىڭ وسى اتالعان 53-بابىنىڭ 2) تارماعىندا «ۇكىمەتتىڭ رەسپۋبليكالىق بيۋدجەتتىڭ اتقارىلۋى تۋرالى ەسەبىن پارلامەنتتىڭ بەكىتپەۋى پارلامەنتتىڭ ۇكىمەتكە سەنىمسىزدىك بىلدىرگەنىن كورسەتەدى;» دەپ جازۋلى تۇر.

دەپۋتاتتاردىڭ سوزدەرى مەن سۇحباتتارىنا قاراساق، اسقار مامين، ءاليحان سمايىلوۆ جانە قازىرگى ولجاس بەكتەنوۆ ۇكىمەتىنە پارلامەنتتىڭ كوڭىلى ەشقاشان توعان ەمەس!

دەپۋتاتتار ۇنەمى، سىناپ، وزدەرىنىڭ الاڭداۋشىلىعىن ءبىلدىرىپ جاتادى.

«رەسپۋبليكالىق بيۋدجەت تۋرالى» زاڭعا، جاڭىلماسام، بيىل پارلامەنت ءتورت مارتە وزگەرىستەر مەن تولىقتىرۋلار ەنگىزدى-اۋ دەيمىن.

بىراق، نەگە ەكەنى بەلگىسىز، پارلامەنت جوعارىداعى 53-باپتاعى نورمانى پايدالانىپ، وزدەرىنىڭ دىتتەگەن جەرىنەن شىقپاعان سول ۇكىمەتتەرگە سەنىمسىزدىك جاريالاۋعا باتىلدارى جەتپەي-اق قويدى.

مۇمكىن، بۇل نورمانى ەندى ءبىر پالاتالى پارلامەنتتىڭ دەپۋتاتتارى پايدالاناتىن شىعار.

قالاي دەسەك تە، پارلامەنتتىڭ ۇكىمەت پەن جوعارى اۋديتورلىق پالاتادان رەسپۋبليكالىق بيۋدجەتتىڭ اتقارىلۋىنان ەسەپ الاتىن ناقتى كونستيتۋتسيالىق قۇزىرەتى بولۋى كەرەك!

پارلامەنتتىك رەفورما بويىنشا جۇمىس توبى وسى ماسەلەنى قاپەرىنە السا ەكەن دەيمىن…

اۋىت مۇقيبەك

Abai.kz