تالعارداعى سوت پروتسەسىندە باسى ايىپكەر حاسان قاسىمباەۆ سوڭعى ءسوزىن ايتتى. بۇعان دەيىن پروكۋرور ەرلان قۇلانباەۆ ونى ادام ۇرىپ-سوعۋ جانە ۇرلاپ اكەتۋ ءىسى بويىنشا كىنالى دەپ تانىپ، 15 جىلعا باس بوستاندىعىنان ايىرۋدى سۇراعان ەدى، دەپ حابارلايدى Ertenmedia.

Orda-نىڭ مالىمەتىنشە پروكۋروردىڭ ءسوزى زالداعى جاعدايدى كۇرت ۋشىقتىرىپ جىبەرگەن. پروكۋرور مەن سوتتالۋشىلار اراسىندا ۇرىس-كەرىس بولىپ، سۋديا بىرنەشە رەت تارتىپكە شاقىرۋعا ءماجبۇر بولعان. قاسىمباەۆ بولسا وزىنە تاعىلعان ايىپتىڭ ءبارىن ءۇزىلدى-كەسىلدى جوققا شىعارىپ وتىر.

«ومىردە ايىپتالۋشى ورىندىعىندا وتىرامىن دەپ ويلامادىم. مەنىڭ تاعدىرىمدى قوعام تىنىشتالسىن دەپ قۇربان ەتۋ ادىلەتسىزدىك»، – دەدى ول.

سونىمەن قاتار، ول ەشقاشان زاڭ بۇزباعانىن، تەرگەۋدىڭ بۇرمالانعان مالىمەتكە سۇيەنىپ وتىرعانىن جەتكىزگەن ەكەن.

«مەنىڭ كىنامنىڭ ەشبىرى دالەلى جوق. نە كۋاگەر جوق، نە جازبا، نە حات-حابار جوق. تەك قارجاۋبايدىڭ قۇرعاق ءسوزى عانا. مەن ونىمەن ەشقاشان كەزدەسكەن دە، سويلەسكەن دە ەمەسپىن. وعان قاستىق قىلۋعا ەش سەبەبىم بولعان جوق»، – دەدى قاسىمباەۆ.

ونىڭ پىكىرىنشە، ءىستىڭ قوعامدىق رەزونانس تۋدىرۋى سەبەپتى «كىنالى» رەتىندە وزىنە جالا جابىلعان.

«مەن ەشقانداي وپگ-عا مۇشە بولمادىم. ءىس ەل نازارىن اۋدارىپ كەتكەن سوڭ، كىنالى كەرەك بولدى دا، ماعان تاڭدى. جابىرلەنۋشى مەنى «حۋتور بانداسىنىڭ باسشىسى» دەپ اتاعان. تالعاردا دا، الماتى وبلىسىندا دا مۇنداي باندا ەشقاشان بولماعان. مۇنى ءتىپتى پوليتسيا دا راستاي المادى»، – دەپ اتاپ ءوتتى ول.

ايىپتالۋشىنىڭ ادۆوكاتى ەرلان مەندەشەۆ تە ءىستىڭ زاڭسىز قوزعالىپ، تەرگەۋ قوعامدىق پىكىردىڭ قىسىمىمەن جۇرگەنىنە سەنىمدى.

«شەرزاتتىڭ قازاسىنان كەيىن ونىڭ اكەسى ەموتسيامەن حاساندى ايىپتاپ، «حۋتور بانداسى» دەگەن ءسوزدى قولداندى. الگى پىكىر الەمجەلىگە تاراپ، تەرگەۋگە قىسىم كورسەتە باستادى. ناتيجەسىندە تەرگەۋ زاڭ بويىنشا ەمەس، قوعامدىق شۋعا نەگىزدەلىپ جۇرگىزىلدى»، – دەيدى ادۆوكات.

سوت عيماراتىنىڭ الدىنا ونداعان ادام جينالىپ، پروكۋروردىڭ حاسان قاسىمباەۆتى تۇرمەگە قاماۋ تالابىنا قارسىلىق ءبىلدىردى. ولار سوتتان ءادىل شەشىم شىعارۋدى سۇرايدى جانە سوڭىنا دەيىن كۇرەسۋگە بەكىنىپ وتىر.

Abai.kz