قاراعاندىدا 22 جاستاعى اليكا مۇحاماديەۆاعا قاتىستى سوت پروتسەسى باستالدى. ول الەۋمەتتىك جانە ۇلتتىق ارازدىقتى قوزدىردى دەگەن ايىپپەن جاۋاپقا تارتىلۋدا. باستى سوت تالقىلاۋى قازىبەك بي اۋداندىق قىلمىستىق ىستەر جونىندەگى سوتىندا ءوتىپ جاتىر. ءىستى سۋديا ارعىن قۇتىشەۆ قاراۋدا.

ەسكە سالا كەتسەك، 2025 جىلدىڭ جازىندا اليكا مۇحاماديەۆانىڭ Threads جەلىسىندەگى جازبالارى قازاقستاندىقتاردى قورلايتىن سوزدەر بار دەگەن شاعىمداردان كەيىن، ول شىلدە ايىندا شەت ەلگە قاشىپ بارا جاتقان جەرىنەن ۇستالىپ، قاماۋعا الىنىپ، ءىس ماتەريالدارى تەرگەۋ ورگاندارىنا تاپسىرىلعان بولاتىن.

بۇعان دەيىن ايىپتالۋشى كىناسىن ءىشىنارا مويىنداپ، سوزدەرى كونتەكستەن ءۇزىپ الىنعانىن ايتىپ، كوپشىلىك الدىندا كەشىرىم سۇراپ، ەشكىمنىڭ نامىسىنا تيۋ نيەتى بولماعانىن مالىمدەگەن ەدى.

بىراق، وعان ەكى اي قاماۋ جازاسى قولدانىلدى. قىلمىستىق ءىس قوزعالى، ول 3 قازاندا سوتقا ءتۇستى. اليكاعا قىلمىستىق كودەكستىڭ 174-بابى، 1-بولىگى بويىنشا — «الەۋمەتتىك، ۇلتتىق، تەكتىك، ناسىلدىك نەمەسە ءدىني ارازدىقتى قوزدىرۋ» ايىبى تاعىلدى.

سوت پروتسەسىنىڭ باسىندا پروكۋرور فاريدا سادۋوۆا ءىستى جابىق رەجيمدە وتكىزۋدى سۇرادى. بۇل ءوتىنىشتى ايىپتالۋشى مەن قورعاۋشى تاراپ قولدادى. الايدا سوت ارعىن قۇتىشەۆ ءوتىنىشتى قاناعاتتاندىرماي، سوت اشىق وتەتىنىن ايتتى. تەك قانا، ايىپتالۋشىنىڭ ءجۇزىن فوتو جانە بەينەتۇسىرىلىمگە تۇسىرمەۋ تۋرالى ءوتىنىشتى قاناعاتتاندىردى.

سوتتا اليكا مۇحاماديەۆا كىناسىن تولىق مويىنداپ، وكىنەتىنىن ايتتى. ول جىلاپ، ىستەگەن ءىسىنىڭ سالدارىن ەندى عانا تۇسىنگەنىن بىرنەشە رەت قايتالادى. تەرگەۋ يزولياتورىندا جاتقاندا قازاق حالقىنىڭ تاريحىمەن، ءدىني داستۇرىمەن تانىسقانىن، ءبىر اي بۇرىن اجەسى قايتقانىن، سودان ءوزىنىڭ دەپرەسسيالىق كوڭىل‑كۇي جەتەگىندە كەتكەنىن، كىشكەنتايىن ساعىناتىنىن ايتىپ، كەشىرىم ەتۋدى سۇرادى...

اليكا مۇحامەديەۆانىڭ قىلمىستىق ءىسى جەلىدە قىزۋ تالقىلاندى:

كەيبىر وقىرماندار: «وعان كولونيادا قازاق حالقىنىڭ تاريحىن، ءداستۇرىن جانە ءتىلىن تەرەڭ ۇيرەنۋ مىندەتتەلىپ، سوسىن ونى كەشىرىپ، شارتتى تۇردە بوساتۋعا بولادى. قازاقستاندا حالىقتار اراسىندا دوستىق، توزىمدىلىك جانە دىنگە قۇرمەت بولۋى ءتيىس، بىراق سونىمەن بىرگە، باسىمدىق قازاق ءداستۇرى مەن مادەنيەتىنە بەرىلۋى قاجەت. تەڭدىك – قازاقتاردى قورلاۋعا رۇقسات دەگەن ءسوز ەمەس» ‑ دەدى.

ەندى بىرەۋلەرى: «وتپەن ويناۋعا بولمايدى. كەز كەلگەن مەملەكەت، ۇلت، ءتىل، ءدىن مەن مادەنيەت قۇرمەتكە لايىق. ءوز ەرەجەڭمەن بوتەننىڭ ۇيىنە كىرمەۋ كەرەك» دەگەن ناقتى تالاپ قويدى...

شىنىندا دا، قازىرگى كۇردەلى زاماندا كەز كەلگەن ۇلتارالىق كەمسىتۋ، نە استامشىلىق ايتۋ قۇرعاق شوپكە وت جاققانمەن بىردەي – ءورت لاۋ ەتە قالۋى مۇمكىن، ءورت بولىپ جاتقانى دا بەلگىلى... سول سەبەپتى، وسىنداي ءاربىر مويىندالعان قىلمىستىق ءىس زاڭدى باعاسىن الۋ كەرەك – ادىلەتتى قازاقستاننىڭ ۇستانىمى سونداي!

Abai.kz