شىمكەنتتە مەملەكەتتىك قىزمەتشىدەن 10 ملن تەڭگە بوپسالادى دەگەن كۇدىكپەن بلوگەر-جۋرناليست ۇستالدى، دەپ حابارلايدى Polisia.kz.

پوليتسيا قىزمەتكەرلەرى جەدەل-ىزدەستىرۋ ءىس-شارالارى بارىسىندا لاۋازىمدى تۇلعادان اقشا بوپسالاعان بلوگەر-ءجۋرناليستى ۇستادى.

«الدىن الا مالىمەتكە سايكەس، كۇدىكتى اكىمدىك قىزمەتكەرىنەن 10 ميلليون تەڭگە كولەمىندە اقشا تالاپ ەتكەن. ول بۇل سوماعا الەۋمەتتىك جەلىلەردە مەملەكەتتىك ورگانداردىڭ قىزمەتىن قارالايتىن ماتەريالداردى تاراتپاۋعا ۋادە بەرگەن. اتالعان جايت بويىنشا قىلمىستىق ءىس قوزعالدى. تەرگەۋ اياسىندا كۇدىكتىنىڭ تۇرعىلىقتى جەرى مەن كەڭسەسىندە ءتىنتۋ جۇرگىزىلىپ، ناتيجەسىندە ەلەكتروندىق قۇرىلعىلار مەن وزگە دە زاتتاي ايعاقتار تاركىلەندى», - دەپ جازىلعان حابارلامادا.

كۇدىكتى ۋاقىتشا ۇستاۋ يزولياتورىنا قاماۋعا الىندى. قازىرگى تاڭدا وقيعانىڭ بارلىق ءمان-جايىن انىقتاۋعا باعىتتالعان تەرگەۋ ارەكەتتەرى جۇرگىزىلۋدە.

پوليتسيا بوپسالاۋ - قىلمىستىق جاۋاپكەرشىلىككە اكەپ سوعاتىن زاڭعا قايشى ارەكەت ەكەنىن ەسكەرتەدى.

Abai.kz