بۇگىن ءماجىلىس دەپۋتاتتارى «بانكتەر تۋرالى» زاڭ جوباسىن قاراعان جۇمىس توبىنىڭ وتىرىسىندا ماڭىزدى تۇزەتۋ قابىلداندى. بۇل تۋرالى ءماجىلىس دەپۋتاتى تيمۋر قىرىقباەۆ مالىمدەدى.

تۇزەتۋ بانكتەرگە قارجىلىق جاعدايى دالەلدەنبەگەن نەمەسە نەسيە الۋشىعا قاتىسى جوق جەكە تۇلعالاردىڭ جەكە كەپىلگەرلىگىن تالاپ ەتۋگە تىيىم سالۋدى كوزدەيدى.

«قازىرگى تاڭدا جەكە كەپىلگەرلىك كوپ جاعدايدا بانكتەر قولداناتىن اۋىر ءارى ادىلەتسىز تاجىريبەگە اينالدى. نەسيە الا الماي وتىرعان ازاماتتىڭ تۋىستارى مەن تانىستارى ولاردىڭ ورنىنا تولەم جاساۋ مۇمكىندىگى بولماعانىنا قاراماستان، ارتىق مىندەتتەمەلەرگە قول قويۋعا ءماجبۇر بولۋى جيىلەپ كەتتى. مۇنداي جاعدايلار كەيىن كەپىلگەرلەرگە ۇلكەن اۋىرتپالىق ءتۇسىرىپ، ولاردىڭ ءومىرىن كۇردەلەندىرەدى. اسىرەسە تەلەفون ارقىلى قاشىقتان راسىمدەلەتىن كەپىلگەرلىك كەزىندە ادام وزىنە العان مىندەتتەمەنىڭ كولەمىن تولىق تۇسىنبەي قالادى.

وسىعان بايلانىستى مەن «بانكتەر تۋرالى» زاڭنىڭ 54-بابىنا وزگەرىستەر ۇسىندىم. ەندى بانك كەپىلگەرلىك نەمەسە كەپىل راسىمدەۋ كەزىندە كەپىلگەردىڭ قارجىلىق جاعدايىن ەسكەرە وتىرىپ، ونىڭ تولەم قابىلەتتىلىگىنە مىندەتتى تۇردە باعالاۋ جۇرگىزۋگە، سونداي-اق نەگىزگى قارىز بەن ۇسىنىلعان قامتاماسىز ەتۋ قۇنىنىڭ ايىرماسى بويىنشا مىندەتتەمەنى قابىلداۋعا كەپىلگەردىڭ جازباشا كەلىسىمىن الۋعا ءتيىس.

ەگەر ۇسىنىلعان قامتاماسىز ەتۋ بانكتىڭ كەپىل ساياساتىنىڭ تالاپتارىنا سايكەس كەپىل شارتى جاسالعان كەزدە نەگىزگى مىندەتتەمەنى تولىق كولەمدە قامتاماسىز ەتسە، بانك جەكە تۇلعادان قوسىمشا كەپىلگەرلىك نەمەسە كەپىل تالاپ ەتۋگە قۇقىلى ەمەس.

مەن ۇسىنعان تۇزەتۋگە دەپۋتاتتار ب.بازاربەك پەن ا.باققوجاەۆ تا قول قويدى. جۇمىس بارىسى تۋرالى الداعى ۋاقىتتا دا اقپارات بەرىپ وتىرامىن»، - دەيدى دەپۋتات.

Abai.kz