تۇركىستاندا 300-گە جۋىق كومپانيا باسشىلارىنىڭ قاتىسۋىمەن «TURKISTAN INVESTMENT AND TOURISM FORUM – 2025» حالىقارالىق ينۆەستيتسيالىق فورۋمى جوعارى دەڭگەيدە ءوتىپ جاتىر. وعان وتاندىق جانە شەتەلدىك ينۆەستورلار مەن جەرگىلىكتى اتقارۋشى بيلىك ورگاندارىنىڭ وكىلدەرى قاتىستى. ماڭىزدى شارا بارىسىندا كورمە ۇيىمداستىرىلىپ، كەلۋشىلەر مەن ينۆەستورلار نازارىنا ءوڭىردىڭ قولونەر بۇيىمدارى، تۋريستىك نىساندارى مەن اۋىل شارۋاشىلىعى ونىمدەرىنىڭ كورمەسى تانىستىرىلدى.

بۇل فورۋمنىڭ ماقساتى –  ايماقتىڭ ينۆەستيتسيالىق جانە تۋريستىك الەۋەتىن ىلگەرىلەتۋ، ءوڭىر ەكونوميكاسىن ءارتاراپتاندىرۋ باعىتىندا ينۆەستيتسيا تارتۋ، شەتەلدىك جەتەكشى كومپانيالارىمەن ىسكەرلىك بايلانىستاردى نىعايتۋ مەن ءوندىرىس ورىندارىن كوبەيتۋ.

فورۋم اياسىندا مەملەكەتتىك ورگاندار، بيزنەس جانە حالىقارالىق ۇيىم وكىلدەرىنىڭ قاتىسۋىمەن «تۇركىستان – قازاقستاننىڭ جاڭا ينۆەستيتسيالىق تسيكلىنىڭ درايۆەرى» تاقىبىرىندا پلەنارلىق وتىرىس ءوتتى. وعان تۇركىستان وبلىسىنىڭ اكىمى نۇرالحان كوشەروۆ ارنايى قاتىسىپ، فورۋمعا قاتىسۋشىلارعا ەرەكشە ىقىلاسىن ءبىلدىردى.

–  بۇگىنگى فورۋم – جاڭا باستامالاردى جانە ينۆەستيتسيالىق جوبالاردى ىسكە اسىرۋعا ارنالعان ماڭىزدى الاڭ. حالىقارالىق ينۆەستيتسيالىق فورۋمعا شەتەلدەن 200 كومپانيا جانە قازاقستان وڭىرلەرىنەن 100-دەن استام ءىرى كومپانيا وكىلدەرى قاتىسۋدا. قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين وسى كۇنگە دەيىن بىرنەشە رەت كەزدەسىپ، ەكىجاقتى قاتىناستاردى دامىتۋعا باعىتتالعان اسا ماڭىزدى قۇجاتتارعا قول قويعان. ەكى ەل اراسىنداعى ەكونوميكالىق بايلانىس نىعايا تۇسۋدە. سوڭعى 20 جىلدا ەلىمىزگە قىتايدان تارتىلعان ينۆەستيتسيالاردىڭ جالپى كولەمى 27 ملرد. اقش دوللارىن قۇرادى. تۇركىستان وبلىسى قۇرىلعاننان باستاپ، قىتاي كاپيتالىنىڭ قاتىسۋىمەن جالپى قۇنى 165,5 ملن. اقش دوللارىن قۇرايتىن 7 ينۆەستيتسيالىق جوبا ىسكە قوسىلدى. تۇركىستان وبلىسىنىڭ الەۋەتى وتە جوعارى. اۋىل شارۋاشىلىعى، ءوندىرىس، تۋريزم جانە بارلىق سالالاردا ينۆەستيتسيالىق جوبالاردى جۇزەگە اسىرۋعا مۇمكىندىك مول. وڭىردە ينۆەستورلارعا دايىن ينفراقۇرىلىمى بار عيماراتتاردى ۇسىناتىن يندۋستريالدى ايماقتار جانە دايىن عيماراتتار ورناتىلعان شاعىن ونەركاسىپتىك پاركتەر بار. جوعارىدا اتالعان ينۆەستيتسيالىق الاڭداردا بىرلەسكەن جوبالاردى جۇزەگە اسىرۋعا شاقىرامىن، – دەگەن نۇرالحان كوشەروۆ وبلىستىڭ ينۆەستيتسيالىق الەۋەتىن باياندادى.

سپيكەرلەر قاتارىندا شەنسي پروۆينتسياسىنىڭ شەتەلدىك مەملەكەتتەرمەن دوستىق قوعامىنىڭ حاتشىلىق باستىعى – بان حۋەي، قازاقستان رەسپۋبليكاسىنداعى قحر توتەنشە جانە وكىلەتتى ەلشىسى – حان چۋنلين، سيان قالاسىنداعى قازاقستان رەسپۋبليكاسىنىڭ باس كونسۋلى – جوشىحان قىراۋباەۆ، «Souths Oil» كومپانياسىنىڭ پرەزيدەنتى – سەرىكجان سەيتجانوۆ، باچجوۋ قالالىق حالىق ۇكىمەتىنىڭ حاتشىسى (قحر) – مۋ حەجۋن، كاسىپكەر، «Karazhal Operating» جانە «Global Chemicals Company» كومپانيالارىنىڭ نەگىزىن قالاۋشى، قازاقستان رەسپۋبليكاسىنىڭ ۇلتتىق جۇمىس بەرۋشىلەر (كاسىپكەرلەر) كونفەدەراتسياسى قب پرەزيديۋمىنىڭ توراعاسى جۇمابەك جانىقۇلوۆ قاتىستى.

پلەنارلىق وتىرىستار دا ءساتتى ءوتىپ، يدەيالار تالقىلاندى. ارىپتەستىك نىعايا ءتۇستى. تۇركىستان وبلىسىنداعى اۋدان، قالا اكىمدەرى تەگىس قاتىسىپ، كەلىسسوزدەر جۇرگىزدى.

فورۋم بارىسىندا G2B جانە B2B كەلىسسوزدەر، پانەلدىك پىكىرتالاستار ءوتىپ، ايماقتىڭ ينۆەستيتسيالىق مۇمكىندىكتەرىن تانىستىرۋ جانە تۇركىستاننىڭ حالىقارالىق ارىپتەستىكتەگى ستراتەگيالىق ءرولىن نىعايتۋ شارالارى تالقىلاندى. حالىقارالىق فورۋمدا تۇركىستان وبلىسى اكىمدىگى مەن الەمنىڭ كوشباسشى كومپانيالارى اراسىندا بىرلەسكەن ينۆەستجوبالاردى ىسكە اسىرۋ بويىنشا مەموراندۋمدارعا قول قويىلادى.

اتاپ ايتقاندا، «قازاقستان-قىتاي» يندۋستريالدى ايماعىن قۇرۋ جونىندەگى جوبا، دجينس ماتاسىن ءوندىرۋ، ىلمەك جانە ماتا ءوندىرۋ، حالىقارالىق تەكستيل ورتالىعىن قۇرۋ، اليۋكاتسينك قاعازدارىن ءوندىرۋ، اۋىل شارۋاشىلىعى ونىمدەرىنىڭ جوباسى، جارىقتاندىرۋ جابدىقتارى مەن كۇن پانەلدەرىن ءوندىرۋ باعىتىنداعى  ينۆەستجوبالار ماقۇلداندى.

جالپى وبلىستا 2025-2028 جىلدار ارالىعىندا 111 ينۆەستجوبالار پۋلى قالىپتاسقان. جوبا تولىق ىسكە اسقان جاعدايدا 23 915 جاڭا جۇمىس ورنىن اشۋ كوزدەلگەن. بيىل 58 ينۆەستيتسيالىق جوبا قولعا الىنىپ، ناتيجەسىندە 8 250 تۇراقتى جۇمىس ورنى اشىلادى. بۇگىندە 34 ينۆەستجوبا ىسكە قوسىلىپ، 4889 ادام جۇمىسپەن قامتىلدى. سونىمەن قاتار بيىل 10 ايدىڭ قورىتىندىسىمەن وبلىستىڭ كاپيتالىنا 1 178,4 ملرد. تەڭگە كولەمىندە ينۆەستيتسيا تارتىلعان. وبلىسقا 2025 جىلعا 475 ملن. اقش دوللارى كولەمىندە تىكەلەي شەتەلدىك ينۆەستيتسيالار تارتۋ ينديكاتورى بەكىتىلگەن. II توقساننىڭ قورىتىندىسىمەن تىكەلەي شەتەلدىك ينۆەستيتسيالار كولەمى 543,5 ملن. اقش دوللارىن قۇراپ، جىلدىق جوسپار ارتىعىمەن ورىندالدى.

تۇركىستان وبلىسى اكىمىنىڭ ءباسپاسوز قىزمەتى

Abai.kz