ەلىمىزدە 2026 جىلى 1 قاڭتاردان باستاپ 1 اەك 4 325 تەڭگە بولادى. ياعني بۇل اەك-پەن ەسەپتەلەتىن كەز كەلگەن تولەم، ونىڭ ىشىندە ايىپپۇل، الەۋمەتتىك تولەمدەر جانە ت.ب. كولەمى دە ارتادى دەگەندى بىلدىرەدءى.

بيىل 1 اەك 3 392 تەڭگەگە تەڭ بولسا، 2026 جىلدان باستاپ ول 393 تەڭگەگە وسپەك.

ەندەشە 2026 جىلى 1 قاڭتاردان باستاپ قۇقىق بۇزىپ، ايىپپۇل ارقالاعاندار قانشا تەڭگە تولەيتىنىن ەسەپتەپ كورەيىك.

رامىزدەردى قورلاۋ

قىلمىستىق كودەكستىڭ “مەملەكەتتىك رامىزدەردى قورلاۋ” تۋرالى 372-بابى بويىنشا رامىزدەردى قورلاعانى ءۇشىن ايىپپۇل كولەمى 3 000 اەك-كە تەڭ.

2025 جىلدان باستاپ 1 اەك 4 325 تەڭگە، دەمەك 3 000 اەك 12 975 000 تەڭگە بولادى.

كىرەبەرىستە قوقىس قالدىرعانداردا ايىپپۇل تولەيدى

پاتەرگە كىرەبەرىستەگى ەسىگىنىڭ قاسىنا قوقىس سالىنعان دوربانى قالدىرعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 505-بابىنا سايكەس «اباتتاندىرۋ قاعيدالارىن بۇزعانى» ءۇشىن 20 اەك ايىپپۇل سالىنادى. ال بۇل ارەكەتتى ازامات ءبىر جىل ىشىندە قايتالاپ جاساسا، وندا 30 اەك كولەمىندە ايىپپۇل سالىنادى.

20 اەك 86 500 تەڭگەگە تەڭ بولسا، 30 اەك 129 750 تەڭگە.

شۋلاپ، تىنىشتىقتى بۇزۋ

ەلىمىزدە زاڭ بويىنشا كەشكى ساعات 22.00-دەن 9.00-گە دەيىن تىنىشتىقتى بۇزۋعا بولمايدى. تۇرعىن ءۇي عيماراتتارى مەن تۇرعىن ءۇي قۇرىلىسى اۋماقتارىندا ورنالاسقان ويىن-ساۋىق ورىندارىنا جۇمىس كۇندەرى ساعات 22.00-دەن تاڭعى 9.00-گە دەيىن، دەمالىس جانە مەرەكە كۇندەرى ساعات 23.00-دەن تاڭعى 10.00-گە دەيىن شۋلاۋعا تىيىم سالىنادى. ءتارتىپ بۇزعان جەكە تۇلعالارعا – 5 اەك (21 625 تەڭگە), ءبىر جىل ىشىندە قايتالانسا 10 اەك (43 250 تەڭگە) ايىپپۇل سالىنادى.

سونىمەن قاتار كاسىپكەرلەرگە 20 اەك-تەن 150 اەك-كە دەيىن (86 500 – 648 750 تەڭگە) ايىپپۇل سالىنادى.

تۇكىرۋ

قوعامدىق ورىندا تۇكىرگەنى ءۇشىن، سونداي-اق بەلگىلەنبەگەن جەرلەردە قوقىس تاستاعانى ءۇشىن قۇقىق بۇزعان ادامعا ءبىرىنشى رەت 5 اەك، ياعني 21 625 تەڭگە ايىپپۇل سالىنادى. ال ازامات وسى ارەكەتىن قايتالاسا، وندا 10 اەك، ياعني 43 250 تەڭگە كولەمىندە ايىپپۇل تولەيدى.

كولىك جۇرگىزگەندە تەلەفون پايدالانىپ، بەلبەۋ تاقپاۋ

جولاۋشىلار مەن جۇكتەردى تاسىمالداۋ ەرەجەلەرىن بۇزعانى، قاۋىپسىزدىك بەلبەۋىن تاقپانى جانە كولىك جۇرگىزىپ بارا جاتقاندا تەلەفون پايدالانعانى ءۇشىن جۇرگىزۋشىلەرگە 5 اەك كولەمىندە ايىپپۇل سالىنادى. بۇل 2025 جىلى 21 625 تەڭگە.

قۇجاتسىز كولىك جۇرگىزۋ

جۇرگىزۋ قۇقىعى جوق جۇرگىزۋشىنىڭ كولىكتى باسقارۋى 20 اەك، ياعني 86 500 تەڭگە كولەمىندە ايىپپۇل تولەيدى. كولىك قۇرالىن باسقارۋ قۇقىعىنان ايىرىلعاندار كولىك جۇرگىزسە، ولارعا 50 اەك، ياعني 216 250 تەڭگە ايىپپۇل سالىنادى نەمەسە 20 تاۋلىككە قاماۋعا الىنادى.

اۆتوبۋستا جولاقى تولەمەۋ

قالا جانە قالا ماڭىنداعى قوعامدىق كولىكتە جولاقىنى تولمەگەندەرگە 2 اەك، ياعني 8 650 تەڭگە ايىپپۇل سالىنادى.

ال جولاۋشىلاردى بيلەتسىز الىپ جۇرگەنى ءۇشىن 5 اەك (21 625 تەڭگە) ايىپپۇل سالىنادى.

كامەلەتكە تولماعانداردىڭ تۇندە ءجۇرۋى

كامەلەتكە تولماعاندار زاڭدى وكىلدەرىنسىز 22.00-دەن 6.00-گە دەيىن ويىن-ساۋىق مەكەمەلەرىندە بولسا، ولاردىڭ اتا-اناسىنا 3 اەك (12 975 تەڭگە) مولشەرىندە ايىپپۇل سالىنادى. ال 18 جاسقا تولماعان بالا 23.00-دەن 6.00-گە دەيىن ۇيدەن تىس جەردە جۇرسە، وندا زاڭدى وكىلدەرىنە ەسكەرتۋ جاسالادى. ەگەر وسى ارەكەتتەر ءبىر جىل ىشىندە قايتالانسا، وندا بالانىڭ زاڭدى وكىلدەرىنە 30 275 تەڭگە (7 اەك) ايىپپۇل سالىنادى.

ويىن-ساۋىق مەكەمەسىنىڭ يەلەرىنە دە 10-نان 100 اەك دەيىنگى مولشەردە (43 250 جانە 432 500 تەڭگە) ايىپپۇل سالۋ كوزدەلگەن.

جولدى كەسىپ ءوتۋ

جاياۋ جۇرگىنشىلەر جول قوزعالىسى ەرەجەلەرىن ساقتاماعانى ءۇشىن (قاتە جەردەن ءوتۋ جانە ت.ب.) 2 اەك (8 650 تەڭگە) كولەمىندە ايىپپۇل تولەيدى. ءبىر جىل ىشىندە قايتالاپ بۇزعانى ءۇشىن ايىپپۇل 10 اەك-كە (43 250 تەڭگە) دەيىن وسەدى.

جىلدامدىقتى اسىرۋ

كولىك جىلدامدىعىن اسىرعانى ءۇشىن:

- ساعاتىنا 10-20 شاقىرىمعا اسىرعانى ءۇشىن ايىپپۇل 5 اەك (21 625 تەڭگە).

- ساعاتىنا 20-40 شاقىرىمعا اسىرعانى ءۇشىن 10 اەك (43 250 تەڭگە).

- ساعاتىنا 40 شاقىرىمنان اسىرعانى ءۇشىن ايىپپۇل قازىردىڭ وزىندە 20 اەك (86 500 تەڭگە).

اكىمشىلىك جازا قولدانىلعاننان كەيىن ءبىر جىل ىشىندە جىلدامدىقتى قايتالاعانى ءۇشىن 30 اەك (129 750 تەڭگە) ايىپپۇل قاراستىرىلعان.

قوعامدىق ورىندا بالاعات ءسوز ايتۋ

2023 جىلعى ناۋرىز ايىنان باستاپ زاڭعا قوعامدىق ورىنداردا بالاعات ءسوز ايتقاندارعا 20 اەك، ياعني بۇل 86 500 تەڭگە نەمەسە 30 تاۋلىككە قاماۋعا الىنادى.

اقبتك-ءنىڭ 73-بابى بويىنشا وتباسىندا جانە تۇرمىستا بالاعات ءسوز ايتقانى ءۇشىن ەسكەرتۋ نەمەسە 5 اەك (21 625 تەڭگە) كولەمىندە ايىپپۇل سالىنادى. ال مۇعالىمدى نەمەسە دارىگەردى بالاعاتتاسا، وندا 10 اەك (43 250 تەڭگە) كولەمىندە ايىپپۇل قاراستىرىلعان.

Abai.kz