استانادا اسكەري قىزمەتشىلەردىڭ قۇقىقتارى مەن الەۋمەتتىك كەپىلدىكتەرىن قامتاماسىز ەتۋ، ارميانىڭ الەۋەتىن نىعايتۋ جانە اسكەري قىزمەتتىڭ بەدەلىن كوتەرۋ ماسەلەلەرىنە ارنالعان دوڭگەلەك ۇستەل ءوتتى. ءىس-شاراعا سەنات پەن ءماجىلىس دەپۋتاتتارى، مەملەكەتتىك ورگاندار مەن كۇشتىك قۇرىلىمداردىڭ، قوعامدىق ۇيىمداردىڭ وكىلدەرى مەن ساراپشىلار قاتىستى.

قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ ۆەدومستۆو جۇمىسىنىڭ نەگىزگى باعىتتارى تۋرالى باياندادى. ول جاۋىنگەرلىك دايىندىقتى جەتىلدىرۋ، ينفراقۇرىلىمدى جاڭعىرتۋ، قاۋىپسىزدىك ستاندارتتارى مەن تسيفرلىق شەشىمدەردى ەنگىزۋ توڭىرەگىندە اتقارىلىپ جاتقان جۇمىستارعا توقتالدى. ءمينيستردىڭ ايتۋىنشا، اسكەري قىزمەتتىڭ قاۋىپسىز جاعدايىن قالىپتاستىرۋ جانە اسكەرگە شاقىرۋ ءتارتىبىن اشىق ەتۋ ءۇشىن پارلامەنتپەن، قوعاممەن، سونداي-اق اتا-انالار قاۋىمداستىعىمەن تىعىز بايلانىس قاجەت.

مينيستر، اسىرەسە مەرزىمدى قىزمەتتەگى ساربازدارمەن كەشەندى جۇمىستى كۇشەيتۋگە جانە پروفيلاكتيكالىق شارالاردى ارتتىرۋعا باسا نازار اۋدارىلاتىنىن اتاپ ءوتتى. كومانديرلەردى دايىنداۋ تالاپتارى كۇشەيتىلىپ، نورماتيۆتىك بازا جەتىلدىرىلىپ، ساربازداردىڭ وتباسىلارىمەن بايلانىس كەڭەيىپ كەلەدى.

قاتىسۋشىلارعا الەۋمەتتىك قولداۋ شارالارى دا تانىستىرىلدى. اتاپ ايتقاندا، بيىل 2710 سارباز ءبىلىم گرانتتارىن السا، 20 مىڭنان استام اسكەري قىزمەتشى جالپى سوماسى 8 ملرد تەڭگەنى قۇرايتىن كرەديتتىك دەمالىسقا قول جەتكىزدى. بۇدان بولەك «Smart ۆوەنكومات»، Jauynger, Sarbaz 2.0 جانە Askeri Ziyat سياقتى تسيفرلىق جوبالار، سونداي-اق ارنايى وپەراتسيالار كۇشتەرىنىڭ جاڭا كيىم ۇلگىلەرى مەن جابدىقتارى ۇسىنىلدى.

سەنات دەپۋتاتى بيبىگۇل جەكسەنباي قورعانىس سالاسىندا اسكەري ومبۋدسمەن ينستيتۋتىن ەنگىزۋدى قاراستىرۋدى ۇسىندى. ونىڭ ايتۋىنشا، بۇل تەتىك قوعام، اسكەري قىزمەتشىلەر جانە پارلامەنت اراسىنداعى بايلانىستى نىعايتىپ، ازاماتتار وتىنىشتەرىنە جانە اسكەري قىزمەتشىلەردىڭ قاجەتتىلىكتەرىنە جەدەل ارەكەت ەتۋگە مۇمكىندىك بەرەدى.

قوعامدىق ۇيىم وكىلدەرى اشىق كوممۋنيكاتسيا مەن سەنىمدى اقپارات كوزدەرىنىڭ ماڭىزىن اتاپ ءوتتى. «انالار جۇرەگى» سارباز انالارى كوميتەتىنىڭ ءتورايىمى ليليا حايرۋللينا رەسمي ءارى اشىق اقپاراتتىڭ قاۋەسەتتەردىڭ الدىن الىپ، قوعام سەنىمىن ارتتىرۋعا ىقپال ەتەتىنىن ايتتى.

تالقىلاۋعا قازاقستان حالقى اسسامبلەياسىنىڭ وكىلدەرى، ساراپشىلار جانە بۇقارالىق اقپارات قۇرالدارىنىڭ وكىلدەرى دە قاتىستى. «ايقىن» گازەتىنىڭ باس رەداكتورى، اسكەري ساراپشى امانگەلدى قۇرمەت اقپاراتتىق كەڭىستىكتە وڭ پىكىر قالىپتاستىرۋدى نىعايتىپ، قوعام سەنىمىن ارتتىرۋ باعىتىندا جۇيەلى جۇمىس جۇرگىزۋ قاجەتتىگىن كوتەردى.

ءماجىلىس دەپۋتاتتارى زاڭنامانى ودان ءارى جەتىلدىرۋ كەرەك ەكەنىن اتاپ ءوتتى. بيىل اسكەري-پاتريوتتىق تاربيە، اۋماقتىق قورعانىس جانە رەزەرۆتىك قىزمەت تۋرالى ءۇش ماڭىزدى زاڭ قابىلدانعانى ەسكە سالدى.

قارۋلى كۇشتەردىڭ ارداگەرلەرى حالىق قاھارمانى گەنەرال-لەيتەنانت باقىتجان ەرتاەۆ پەن گەنەرال-مايور مارات ناعۇمانوۆ جەكە قۇراممەن جۇمىستى جەتىلدىرۋگە قاتىستى ءوز تاجىريبەلەرىن ورتاعا سالىپ، ۇسىنىستارىن جەتكىزدى.

دوڭگەلەك ۇستەل فورماتى مەملەكەتتىك ورگاندار، كۇشتىك قۇرىلىمدار جانە قوعامدىق ۇيىم وكىلدەرىنىڭ ورتاق ۇستانىمدارىن بىرىكتىرۋگە مۇمكىندىك بەردى. جيىن قورىتىندىسى بويىنشا اسكەري قىزمەتشىلەر مەن ولاردىڭ وتباسىلارىن الەۋمەتتىك قورعاۋدى كۇشەيتۋ، قىزمەت جاعدايلارىن جاقسارتۋ جانە جاستاردى اسكەري-پاتريوتتىق تاربيەلەۋ سالاسىندا زاڭ شىعارۋشىلاردىڭ، مەملەكەتتىك ورگاندار مەن قوعامنىڭ بىرلەسكەن جۇمىسىنا باعىتتالعان بىرقاتار ۇسىنىستار ازىرلەندى.

Abai.kz