بايقوڭىردا «سويۋز مس-28» كەمەسىن ۇشىرۋ كەزىندە №31 ستارت الاڭىندا تەحنيكالىق اپات بولدى. ۇشۋ ءوزى شتاتتىق رەجيمدە ءوتىپ، زىمىران وربيتاعا شىعىپ، عارىش كەمەسى حالىقارالىق عارىش ستانتسياسىنا ءساتتى ءتۇيىستى، – دەپ حابارلايدى Ertenmedia.kz.

الايدا ادەتتەگى تەكسەرىس كەزىندە ستارت پلاتفورماسىنىڭ كەي بولىكتەرى زاقىمدانعانى انىقتالدى. گاز شىعاتىن لوتوكتىڭ ىشىنەن اۋىر مەتالل كونسترۋكتسيا تابىلعان. العاشىندا كەي اقپارات كوزدەرى قۇلاعان ماچتا تۋرالى جازدى، بىراق كەيىن بۇل نۇسقا راستالمادى.

بولجام بويىنشا، زىمىران قوزعالتقىشىنىڭ گاز اعىنى ستارت پلاتفورماعا جاقىن ورنالاسقان قوزعالاتىن كابيناعا قىزمەت كەرەسەتىن قۇرىلعى زاقىمداعان بولۋى مۇمكىن.

قۇرىلعى ۇشىرۋ الدىندا راكەتاعا جاقىن بارىپ، جابدىقتى تەكسەرۋگە قولدانىلادى. ال ستارتقا بىرنەشە مينۋت قالعاندا قاۋىپسىز ورىنعا قايتىپ، بەكىتىلۋى ءتيىس. الدىن الا مالىمەت بويىنشا، سول كابينا قورعالعان قالىپقا تولىق بەكىمەگەن، سونىڭ سالدارىنان رەاكتيۆتى گاز اعىنى كونسترۋكتسيانى جۇلىپ، كوتلوۆانعا لاقتىرىپ جىبەرگەن.

№31 الاڭ «سويۋز» زىمىراندارى ءۇشىن نەگىزگى جانە قازىرگى تاڭدا جالعىز جۇمىس ىستەيتىن ستارت كەشەنى سانالادى. بۇل الاڭ 1961 جىلدان بەرى قولدانىلىپ كەلەدى، شامامەن 500-گە جۋىق ۇشىرۋ وسى جەردە جاسالعان.

2018 جىلدان باستاپ رەسەيدىڭ حعس-كە بايلانىستى پيلوتتى باعدارلاماسىنىڭ بارلىعى دەرلىك وسى ستارتقا بايلاعان بولاتىن.

سوندىقتان مۇنداي زاقىم پيلوتتى رەيستەردىڭ كەستەسىنە تىكەلەي اسەر ەتۋى مۇمكىن. «گاگاريندىك ستارت» №1 الاڭ قازاقستانعا مۋزەي رەتىندە بەرىلگەن، ول بۇرىننان بەرى تەرەڭ جاڭعىرتۋدى قاجەت ەتكەن ەدى.

ونى قايتا قۇرۋ جونىندەگى جوبالار، سونىڭ ىشىندە ءباا-مەن كەلىسسوزدەر العا جىلجىمادى. ال ۆوستوچنىي كوسمودرومىنداعى ينفراقۇرىلىم باستاپقىدا پيلوتتى ۇشۋلارعا ەسەپتەلمەگەن، ونى بەيىمدەۋ ءۇشىن قاۋىپسىزدىك جۇيەلەرىن، جەدەل قۇتقارۋ جانە تەحنيكالىق شەشىمدەردى قايتا قاراۋ كەرەك.

روسكوسموس رەسمي تۇسىنىكتەمەسىندە جاعدايدى قاتتى ۋشىقتىرماي وتىر. ۆەدومستۆو زىمىران شتاتتىق رەجيمدە ۇشقانىن، كەمە ستانتسياعا امان جەتكەنىن، ەكيپاجدىڭ ءوزىن جاقسى سەزىنەتىنىن ايتىپ، ءار ۇشىرۋدان كەيىن ستارت الاڭىن قاراۋ الەمدىك تاجىريبەدەگى مىندەتتى ءراسىم ەكەنىن ەسكە سالدى.

تەكسەرۋ كەزىندە ستارت پلاتفورماسىنىڭ بىرقاتار ەلەمەنتتەرىندە زاقىم انىقتالعان.

مەمكورپوراتسيا وكىلدەرى رەزەرۆتىك بولشەكتەر بار ەكەنىن، قۇراما توراپتاردى قالپىنا كەلتىرۋ جونىندەگى جوسپار دايىندالىپ جاتقانىن ايتتى. قازىر ماماندار زاقىمنىڭ ناقتى كولەمىن، ونىڭ كەلەسى ۇشىرۋلارعا قانشلىقتى دايىن بولاتىنىن باعالاپ جاتىر.

ەگەر جوندەۋ جۇمىستارى دەر كەزىندە جانە ساپالى جۇرگىزىلسە، «سويۋز» كەمەلەرىنىڭ ۇشۋ كەستەسى تەك از ۋاقىتقا عانا تۇزەتىلۋى مۇمكىن. ال ەگەر تەكسەرىس كەزىندە قوسىمشا اقاۋلار انىقتالسا، №31 ستارت كەشەنىن ۇزاق مەرزىمگە توقتاتىپ، باسقا پلوششادكالاردى قايتا جابدىقتاۋ ماسەلەسى كۇن تارتىبىنە شىعۋى ىقتيمال.

قالاي بولعاندا دا، بايقوڭىرداعى سوڭعى اپات تەحنيكالىق ءتارتىپ پەن باقىلاۋدىڭ ماڭىزىن، ەسكى ينفراقۇرىلىمدى جاڭارتپاي، «كەڭەستىك زاپاس» ەسەبىنەن جۇرە بەرۋ قانشالىقتى قاۋىپتى ەكەنىن ايقىن كورسەتتى.

Abai.kz