ۇلتتىق ەكونوميكا ۆيتسە-ءمينيسترى ەرلان ساعىناەۆ ورتالىق كوممۋنيكاتسيالار قىزمەتىندە وتكەن بريفينگتە 2026 جىلدىڭ قاڭتارىنان باستاپ ەنگىزىلەتىن جاڭا سالىق كودەكسىن ءتۇسىندىرءدى.

ۆيتسە-ءمينيستردىڭ ايتۋىنشا، شاعىن بيزنەس ءۇشىن دەكلاراتسيا مەن بولشەك سالىق رەجيمدەرى بىرىكتىرىلىپ، بىرىڭعاي رەجيم جاسالادى. بۇل جاڭا رەجيم شاعىن كاسىپكەرلىككە ارنالعان بىرىڭعاي سالىق جۇيەسىن قامتاماسىز ەتەدى.

• جىلدىق كىرىس شەگى – 600 مىڭ اەك نەمەسە 2,4 ميلليارد تەڭگە. قىزمەتكەرلەر سانى بويىنشا شەكتەۋ جوق.
• ەگەر جىلدىق كىرىس 24 000 اەك-تەن اسىپ كەتسە, سالىق سالىناتىن تابىس جالاقى قورى سوماسىنا ازايتىلادى.
• بۇل رەجيمدى قولداناتىن سالىق تولەۋشىلەر ققس جانە الەۋمەتتىك سالىق تولەۋشى بولىپ ەسەپتەلمەيدى.

ءوزىن-ءوزى جۇمىسپەن قامتۋشىلار ءۇشىن جاڭا جەڭىلدىك رەجيمى ەنگىزىلەدى — ءبىرتۇتاس مينيمالدى تولەم 4%.

سونىمەن قاتار، جەكە كاسىپكەر رەتىندە تىركەلۋ مىندەتتى ەمەس. ءبىرتۇتاس تولەم قۇرامىنا زەينەتاقى اۋدارىمدارى، الەۋمەتتىك اۋدارىمدار جانە مىندەتتى الەۋمەتتىك مەديتسينالىق ساقتاندىرۋ جارنالارى كىرەدى، - دەدى ول.

ۆيتسە-مينيستر اتاپ وتكەندەي، سالىق ەسەپ بەرۋ فورمالارى 30%-عا قىسقارادى, ال سالىق تولەۋشىنىڭ كەلىسىمى بويىنشا دەكلاراتسيالاردى اۆتوماتتى تۇردە تولتىرۋ مۇمكىندىگى قاراستىرىلعان.

جوسپارلى تەكسەرۋلەر تولىق جويىلادى، تەك تاۋەكەلدەردى باسقارۋ جۇيەسى بويىنشا تەكسەرۋلەر جۇرگىزىلەدى. ميكرو- جانە شاعىن بيزنەس ءۇشىن 2026 جىلعا دەيىنگى كەزەڭگە سالىقتىق تەكسەرۋلەر مەن كامەرالدىق باقىلاۋ تولىعىمەن جويىلدى.

سونىمەن قاتار جەر، كولىك جانە مۇلىك سالىعى بويىنشا اعىمداعى تولەمدەر 1 ميلليون تەڭگەدەن از بولسا، ەسەپتەۋ جۇرگىزىلمەيدى.

ۆيتسە-ءمينيستردىڭ ايتۋىنشا، سەنىمدى سالىق تولەۋشىلەر ءۇشىن كەپىلسىز جانە بانكتىك كەپىلدىكسىز تولەمدى كەيىنگە قالدىرۋ نەمەسە ءبولىپ تولەۋ مۇمكىندىگى قاراستىرىلعان.

Abai.kz