پرەزيدەنت قاسىم-جومارت توقاەۆتىڭ باستاماسىمەن جاريالانعان جۇمىسشى ماماندىقتار جىلى اياقتالۋعا جاقىن. الايدا، اتاۋلى جىلدا ايقىندالعان قارقىن مەن سەرپىن ساقتالىپ، الداعى ۋاقىتتا ودان ءارى ارتا تۇسپەك. الماتى ءۇشىن بۇل كەزەڭ تەحنيكالىق جانە كاسىپتىك ءبىلىم بەرۋ (تجكب) جۇيەسىن جاڭعىرتۋدىڭ باستاۋ نۇكتەسىنە اينالدى. ناقتىراق ايتقاندا، جاڭا ساپا ستاندارتتارى، باسىمدىقتار مەن دامۋ باعىتتارى بەلگىلەندى. سەبەبى، كوللەدجدەر قالانىڭ ەكونوميكاسىنا قاجەت كادرلاردى دايارلايتىن نەگىزگى بۋىن بولىپ وتىر.

الماتى قۇرىلىس-تەحنيكالىق كوللەدجىنىڭ بازاسىندا قالا اكىمىنىڭ ورىنباسارى ابزال نۇكەنوۆتىڭ توراعالىعىمەن مەگاپوليستەگى تجكب جۇيەسىن دامىتۋ ماسەلەلەرى بويىنشا كەڭەيتىلگەن جيىن ءوتتى. جيىنعا ءبىلىم باسقارماسى، كوللەدجدەر باسشىلىعى، پروكۋراتۋرا وكىلدەرى، ءبىلىم ساپاسىن قامتاماسىز ەتۋ دەپارتامەنتى، پوليتسيا دەپارتامەنتى جانە «اتامەكەن» وڭىرلىك كاسىپكەرلەر پالاتاسىنىڭ وكىلدەرى قاتىستى.

سۋرەت: الماتى قالاسى اكىمدىگىنەن الىندى.

كەزدەسۋ جۇمىسشى ماماندىقتار جىلىنىڭ قورىتىندىلارىن بەكىتىپ، قول جەتكىزىلگەن ناتيجەلەردى تۇراقتى تاجىريبەگە اينالدىرۋدى ماقسات ەتتى. ايتالىق، ماماندار دايارلاۋ مازمۇنىن جاڭارتۋدان باستاپ، كوللەدجدەردەگى قاۋىپسىزدىك پەن تاربيە جۇمىسىن كۇشەيتۋگە دەيىنگى قادامدار تالقىلاندى. تجكب جۇيەسىندە قالانىڭ ۇزاق مەرزىمدى باسەكەگە قابىلەتتىلىگىن ايقىندايتىن كاسىبي الەۋەت قالىپتاساتىنى اتاپ ءوتىلدى.

جيىن باسىندا ابزال نۇكەنوۆ كوللەدجدەردىڭ قالا ەكونوميكاسىنا قاجەتتى ماماندار دايارلاۋداعى ماڭىزدى ءرولىن اتاپ ءوتىپ، تجكب جۇيەسىنىڭ قازىرگى جاي-كۇيىنە جانە پرەزيدەنت جۇكتەگەن مىندەتتەرگە توقتالدى. سونىمەن قاتار ول WorldSkills Kazakhstan ۇلتتىق چەمپيوناتىندا الماتى قالاسىنىڭ اتىنان قاتىساتىن كوماندا مۇشەلەرىن قۇتتىقتاپ، ساتتىلىك تىلەدى.

سۋرەت: الماتى قالاسى اكىمدىگىنەن الىندى.

جيىندا «زاڭ جانە ءتارتىپ» تۇجىرىمداماسىن ىسكە اسىرۋ، جاستار اراسىندا قۇقىقتىق مادەنيەت پەن قۇقىقتىق سانانى قالىپتاستىرۋ، ازاماتتىق جانە قۇندىلىقتىق باعدارلاردى نىعايتۋ، كامەلەتكە تولماعانداردىڭ قۇقىقتارىن قورعاۋ جانە جاسوسپىرىمدەر اراسىنداعى قۇقىقبۇزۋشىلىقتىڭ الدىن الۋ ماسەلەلەرىنە ەرەكشە نازار اۋدارىلدى. وسىعان بايلانىستى پروكۋراتۋرا جانە پوليتسيا وكىلدەرى ستۋدەنتتەردىڭ قاۋىپسىزدىگىنە قاتىستى نەگىزگى تاۋەكەلدەردى، پروكۋرورلىق قاداعالاۋ شارالارىن جانە زاڭنامانى ساقتاۋ بويىنشا تجكب ۇيىمدارى باسشىلارىنىڭ جاۋاپكەرشىلىگىن ءتۇسىندىردى. سونداي-اق كوللەدجدەردىڭ يۋۆەنالدىق پوليتسيامەن، سۇيەمەلدەۋ قىزمەتتەرىمەن جانە «تاۋەكەل توبىنداعى» وتباسىلارمەن جۇمىسىن كۇشەيتىپ، الدىن الۋ شارالارىن جۇيەلى جۇرگىزۋدى ۇسىندى.

ءبىلىم ساپاسىن قامتاماسىز ەتۋ دەپارتامەنتى (بسقە) 2025 جىلعى تجكب ۇيىمدارىنا جۇرگىزىلگەن باقىلاۋ-قاداعالاۋ جۇمىستارىنىڭ قورتىندىسىن تانىستىرىپ، پروبلەمالىق باعىتتاردى جانە ءبىلىم بەرۋ پروتسەسىنىڭ ساپاسىن ارتتىرۋ مەن مەملەكەتتىك ستاندارتتاردىڭ ورىندالۋىن قامتاماسىز ەتۋگە قاتىستى كەلەسى قادامداردى اتاپ ءوتتى.

سۋرەت: الماتى قالاسى اكىمدىگىنەن الىندى.

بيزنەس پەن ءبىلىمنىڭ ارىپتەستىگىنە ارنالعان بولىمدە «اتامەكەن» وڭىرلىك كاسىپكەرلەر پالاتاسى كوللەدجدەر مەن جۇمىس بەرۋشىلەر اراسىنداعى ىنتىماقتاستىقتى كەڭەيتۋگە قاتىستى ۇسىنىستارىن ورتاعا سالدى. سونىڭ قاتارىندا دۋالدى وقىتۋدى دامىتۋ، بيزنەس وكىلدەرىنىڭ ماتەريالدىق-تەحنيكالىق بازانى جاڭارتۋعا قاتىسۋى، وقۋ باعدارلامالارىن ەڭبەك نارىعىنىڭ ناقتى سۇرانىستارىنا بەيىمدەۋ، زاماناۋي ءوندىرىس پەن قىزمەت كورسەتۋ سالاسىنىڭ تالاپتارىنا دايىن ماماندار دايارلاۋ سىندى ۇسىنىستار جاسالدى. سونىمەن بىرگە، جەرگىلىكتى كاسىپورىندارمەن بىرلەسە وتىرىپ ارنايى كەڭەس قۇرۋ جانە كوكتەمنەن باستاپ حاكاتون فورماتىندا شارالار ۇيىمداستىراتىلاتىندىعى ايتىلدى.

الماتى قالاسى ءبىلىم باسقارماسىنىڭ باسشىسى سايران سايفەدەنوۆ پرەزيدەنتتىڭ باستاماسى مەن جۇمىسشى ماماندىقتار جىلىنىڭ وتكىزىلۋىنىڭ ارقاسىندا كوللەدجدەر مەن جالپى تجكب جۇيەسىنە جاڭا دەڭگەيدە تالاپ قويىلعانىن اتاپ ءوتتى: ەندى جاي عانا تۇلەك ەمەس، باسەكەگە قابىلەتتى، يكەمدى، ءتارتىپتى ماماندار دايارلاۋ كۇتىلەدى. الداعى كەزەڭنىڭ باسىمدىقتارى رەتىندە ستۋدەنتتەرمەن تاربيە جانە الدىن الۋ جۇمىستارىن كۇشەيتۋ، قاۋىپسىزدىك ماسەلەلەرى بويىنشا ۆەدومستۆوارالىق ءوزارا ءىس-قيمىلدى دامىتۋ، ءبىلىم بەرۋ باعدارلامالارىنىڭ ساپاسىن ارتتىرۋ، الەۋمەتتىك جانە يندۋستريالىق ارىپتەستىكتى نىعايتۋ بەلگىلەندى.

سۋرەت: الماتى قالاسى اكىمدىگىنەن الىندى.

جيىن قورىتىندىسى بويىنشا تجكب جۇيەسىندە كادر دايارلاۋ، كوللەدجدەردەگى قاۋىپسىزدىك پەن قۇقىق ءتارتىبىن قامتاماسىز ەتۋ، تاربيە جۇمىسىن نىعايتۋ، مەملەكەتتىك ورگاندار جانە بيزنەس قاۋىمداستىعىمەن ىنتىماقتاستىقتى دامىتۋ، سونداي-اق بارلىق ستۋدەنتتەر ءۇشىن قولايلى، قاۋىپسىز جانە قولداۋشى ءبىلىم بەرۋ ورتاسىن قالىپتاستىرۋعا باعىتتالعان شارالار كەشەنىن قامتيتىن رەزوليۋتسيا قابىلداندى.

الماتىدا جۇمىسشى ماماندىقتار جىلى اياقتالعان اتاۋلى كەزەڭ ەمەس، كەرىسىنشە تەحنيكالىق جانە كاسىپتىك ءبىلىم جۇيەسىن، مەگاپوليستىڭ ۇزاق مەرزىمدى كادرلىق ساياساتىن قالىپتاستىرۋدىڭ جاڭا باستاۋى رەتىندە قاراستىرىلۋدا.

Abai.kz