الماتى قالاسىندا اسكەري-پاتريوتتىق تاربيە بەرۋ باعىتىنداعى جۇمىس بىرىزدەندىرىلىپ، ءبىلىم بەرۋ ساياساتىنىڭ ماڭىزدى بولىگىنە اينالدى. قازىرگى تاڭدا شاھاردا 216 مەملەكەتتىك جانە 131 جەكە مەكتەپ بار. بارلىق وقۋ ورىندارىندا وقۋشىلاردىڭ بويىنا پاتريوتتىق قۇندىلىقتاردى ءسىڭىرۋ ەرەكشە نازاردا.

2022 جىلدان بەرى الماتىدا 50-دەن استام جاڭا ءبىلىم نىسانى سالىندى. سونىڭ ىشىندە 47 مەكتەپ وقۋشىلاردى قابىلداپ ۇلگەردى. قازىر قالا بويىنشا تاعى 47 نىساننىڭ قۇرىلىسى جانە جاڭارتۋ جۇمىستارى جالعاسۋدا:

– 7 بالاباقشا،

– 37 مەكتەپ (ونىڭ 21-ءى «جايلى مەكتەپ» جوباسى اياسىندا),

– 2 كوللەدج،

– «جانۇيا» مامانداندىرىلعان ينتەرناتى.

جاڭا عيماراتتاردىڭ بارلىعىندا العاشقى اسكەري دايىندىق ساباقتارىنا ارنالعان كابينەت، جاتتىعۋ بۇرىشى جانە پاتريوتتىق تاربيەگە باعىتتالعان ارنايى ينفراقۇرىلىم قاراستىرىلعان.

«العاشقى اسكەري جانە تەحنولوگيالىق دايارلىق» ءپانىنىڭ وتكىزىلۋ ساپاسىنا بايلانىستى مونيتورينگ جىل سايىن جۇرگىزىلەدى. سوڭعى تەكسەرىس 2025 جىلدىڭ 10 اقپانى مەن 30 ءساۋىرى ارالىعىندا ءوتتى. قالاداعى 216 مەكتەپتىڭ بارلىعى زەرتتەلدى (جوندەۋدەگى ءبىلىم وشاقتارىنان باسقا).

ال تەكسەرۋ ناتيجەسى بويىنشا ءااجتد ءپانى بار بارلىق مەكتەپتە قاجەتتى وقۋ كابينەتتەرى جابدىقتالعان. 10–11 سىنىپتارى جوق 7 مەكتەپتە ءپان جۇرگىزىلمەيدى.

ماماندار بۇل دەرەكتەردى الماتىداعى اسكەري-پاتريوتتىق جۇمىس جۇيەلى تۇردە جولعا قويىلعانىن كورسەتەتىن ماڭىزدى كورسەتكىش دەپ سانايدى. اسكەري-پاتريوتتىق ساباقتار تەك اسكەري نەگىزدەرمەن شەكتەلمەيدى. وقۋشىلارعا قازاق باتىرلارى مەن تاريحي تۇلعالاردىڭ ەرلىگى، ەل تاريحىنداعى شەشۋشى وقيعالار، مەملەكەتتىك رامىزدەردىڭ ءمانى، وتانعا ادالدىق پەن جاۋاپكەرشىلىك سياقتى قۇندىلىقتار كەڭىنەن تۇسىندىرىلەدى.

مەكتەپتەردە ارداگەرلەرمەن كەزدەسۋلەر وتكىزۋ، دەرەكتى فيلمدەر كورسەتۋ، اسكەري كلۋبتاردىڭ جۇمىسىن جانداندىرۋ داستۇرگە اينالعان. وقۋشىلاردىڭ قىزىعۋشىلىعىنا ساي جاڭا فورماتتاعى ءىس-شارالار دا كوبەيىپ كەلەدى.

مەملەكەت باسشىسى ق.توقاەۆ جاستار تاربيەسىندەگى ءپاتريوتيزمنىڭ ماڭىزىن اركەز اتاپ وتەدى. وسىعان سايكەس 2019 جىلى «جاس سارباز» جوباسى ىسكە قوسىلىپ، الماتى مەكتەپتەرىندە ارنايى سىنىپتار اشىلدى.

2025 جىلى ۇلتتىق گۆارديا باستاماسىمەن «جاس بۇركىت» سىنىپتارى قۇرىلىپ، بۇل باستاما ۇلى جەڭىستىڭ 80 جىلدىعىنا ارنالدى. مۇنداي سىنىپتاردا وقۋشىلار اسكەري تارتىپكە، دالا جاعدايىندا ءوزىن ۇستاۋعا، ورتاق جاۋاپكەرشىلىككە ۇيرەنەدى.

بەلسەندى نۇربولات اۋكەننىڭ پىكىرىنشە، الماتىداعى پاتريوتتىق تاربيە جۇمىسى ەلدەگى تۇراقتىلىق پەن قاۋىپسىزدىك ءۇشىن اسا ماڭىزدى:

«الماتى — ەلدىڭ رۋحاني ءارى ينتەللەكتۋالدىق ورتالىعى. مۇنداعى جاستاردىڭ كوزقاراسى بۇكىل قوعامعا اسەر ەتەدى. قازىرگىدەي كۇردەلى گەوساياسي كەزەڭدە پاتريوتتىق تاربيە — فورمالدى شارا ەمەس، ۇلتتىق قاۋىپسىزدىكتى كۇشەيتۋدىڭ نەگىزگى تەتىگى»، — دەيدى ول.

الماتى سوڭعى جىلدارى اسكەري-پاتريوتتىق تاربيەنى جاڭاشا دەڭگەيگە شىعارا الدى. ارنايى سىنىپتار اشىلىپ، جاڭا مەكتەپتەردە پاتريوتتىق باعىتقا ارنالعان كەڭىستىكتەر جاساقتالۋدا. بۇل جۇيەلى جۇمىس جاس بۋىندى وتانىن قورعاۋعا دايىن، جاۋاپتى ازامات رەتىندە تاربيەلەۋگە ىقپال ەتەدى. مۇنداي باستامالار قالانىڭ عانا ەمەس، ەل جاستارىنىڭ رۋحاني بەرىكتىگىن قالىپتاستىرۋدا ماڭىزدى ءرول اتقارادى.

Abai.kz