مەن اڭساعان ارماننىڭ قۇلاعى كورىنە باستادى…
پرەزيدەنت ايتقان ەكى ماسەلە:
— اۋىل اكىمدەرىنىڭ وكىلەتتىكتەرىن كۇشەيتۋ كەرەك;
— مەملەكەتتىك قىزمەت جۇيەسىندەگى اۋىل اكىمدەرىنىڭ مارتەبەسى تۋرالى ماسەلەنى اينالىپ وتە المايمىز. بۇل – وتە وزەكتى دۇنيە. اتالعان ۇسىنىس بۇعان دەيىن دە بىرنەشە رەت كوتەرىلگەنىن، ءتىپتى، پرەزيدەنت اكىمشىلىگىنە ءتيىستى وتىنىشتەر تۇسكەنىن جاقسى بىلەمىن…
بۇل — مەملەكەت باسشىسى قاسىم-جومارت توقاەۆتىڭ اۋىل اكىمدەرىنىڭ ديالوگ-پلاتفورماسىندا سويلەگەن سوزىنەن الىنعان مەن ءۇشىن وتە ماڭىزدى ەكى ءتۇيىن.
ءيا، اۋىل اكىمدەرىنىڭ وكىلەتتىكتەرىن كۇشەيتۋ كەرەك!
بۇل — مەنىڭ سوڭعى ءۇش جىلدا تىنباي كورگەن تاقىرىبىمنىڭ بىرەۋى.
پرەزيدەنت اكىمشىلىگىنە تۇسكەن سول ءتيىستى وتىنىشتەردىڭ باسىم كوپ بولىگى مەنەن تۇسكەن بولۋى كەرەك.
ول حاتتاردا ايتىلعان اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ; اۋلدىق كەڭەس قۇرۋ; رەسپۋبليكالىق بيۋدجەتتى وبلىس پەن اۋدانعا ەمەس، تىكەلەي اۋىلعا بەرۋ تۋرالى ۇسىنىستار بىرنەشە مينيسترلىكتە تالقىلانعان دا بولاتىن…
مىنە، قۇدايعا شۇكىر، مەن اڭساعان سول ارماننىڭ ءمۇيىزى كورىنە باستادى. مەن كوتەرگەن ماسەلەگە قاسىم-جومارت كەمەلۇلى نازار اۋدىردى، «اۋىل اكىمدەرىنىڭ وكىلەتتىكتەرىن كۇشەيتۋ كەرەك!» دەپ، ۇكىمەتكە تاپسىرما بەرىپتى پرەزيدەنت.
ارينە، ويباي، مەملەكەت باسشىسى اۋىت مۇقيبەكتىڭ ۇسىنىسىمەن عانا اۋىل اكىمدەرىنىڭ وكىلەتتىكتەرىن كۇشەيتۋ تۋرالى شەشىم قابىلدادى دەۋدەن اۋلاقپىن.
بىراق، مەنىڭ ۇسىنىستارىمنىڭ بەلگىلى دارەجەدە ىقپىلى بولعانىنا ءوز باسىم سەنىمدىمىن!
تاعى ءبىر جاعىنان اشىق باق پەن الەۋمەتتىك جەلىلەردە ءدال وسىنداي ۇسىنىس بەرگەن جاندى كوزىم شالعان ەمەس…
سوندىقتان، مەن قاسىم-جومارت كەمەلۇلىنىڭ بۇل شەشىمىنە ءدان ريزامىن جانە ساتتىلىك تىلەيمىن!
سەبەبى، ەگەر، بۇل رەفورما ءدال مەن ويلاعانداي ەتىپ جاسالسا، ەڭ الدىمەن، مەملەكەتتەن بولىنگەن اقشانىڭ اۋىل حالقىنا جەتۋىن قامتاماسىز ەتەدى، ۋربانيزاتسيا تىيادى…
اۋىت مۇقيبەك
Abai.kz
