رەسەيدىڭ «كولەڭكەلى فلوتى» 180 ملن باررەل مۇنايدى ساتا الماي تەڭىزدە ءجۇزىپ ءجۇر...

ورىس مۇنايىن ساتۋ بارعان سايىن قيىنداپ بارادى. اقش قازاندا قابىلداعان اۋقىمدى سانكتسيالاردان كەيىن رەسەيلىك شيكى مۇنايعا تۇراقتى ساتىپ الۋشى تابۋ قيىنعا سوعىپ وتىر.

Bloomberg-ءتىڭ جازۋىنشا، سونىڭ سالدارىنان رەسەيدىڭ «كولەڭكەلى فلوتىنداعى» مۇناي كولەمى كۇرت كوبەيگەن. نارىققا بىردەن شىعىپ كەتۋدىڭ ورنىنا، شيكىزات ايلاپ تەڭىزدە قالىپ، كەمەلەردىڭ ءوزى ءجۇزىپ جۇرگەن مۇناي قويماسىنا اينالىپ بارادى.

قاراشانىڭ سوڭىنا قاراي وسى فلوتتاعى تانكەرلەردە 180 ميلليون باررەلدەن استام مۇناي جينالعانى ايتىلدى.

اقش پرەزيدەنتى دونالد ترامپ رەسەي مۇنايىن يمپورتتاعانى ءۇشىن ۇندىستانعا قارسى باج سالىعىن كوتەرگەن ەدى. وسى قادامنان كەيىن رەسەيلىك مۇنايعا ارنالعان باعىتتار شاتاسا باستادى.

Bloomberg دەرەگىنشە، تانكەرلەر باستاپقىدا باراتىن پورتىن وزگەرتىپ، ءۇندىستاننىڭ باتىس جاعالاۋىنا نە تۇركياعا جەتپەي بۇرىلىپ كەتەتىن جايتتار كوبەيگەن. كەيبىرى ايلاققا كىرۋ كەزەگىن كۇتۋمەن تەڭىزدە ۇزاق ۋاقىت تۇرۋعا ءماجبۇر بولعان.

مۇنداي سحەما لوگيستيكاعا دا، قارجىعا دا اۋىر سالماق سالاتىنى ءسوزسىز. تانكەر نەعۇرلىم كوپ جۇرسە، ساقتاندىرۋ شىعىنى وسەدى، ەكيپاجعا تولەنەتىن اقشا ارتىپ، كەمە جالداۋ قۇنى دا قىمباتتايتىنى بەلگىلى.

بۇعان ەكولوگيالىق تاۋەكەل قوسىلادى، سەبەبى تەحنيكالىق جاعدايى ەسكى كەمەلەرگە مۇناي تولتىرىپ قويۋ جاعالاۋداعى ەلدەر ءۇشىن دە، تەڭىز ءۇشىن دە قاۋىپتى.

«لۋكويل» مەن «روسنەفت» كومپانيالارىنىڭ 34 ەنشىلەس كاسىپورىندارىنا اقش پەن ۇلىبريتانيا قازاندا شەكتەۋ ەنگىزدى. مۇنداعى سەبەپ ايقىن، ۋكرايناعا قارسى سوعىستى قارجىلاندىراتىن نەگىزگى كوزدىڭ ءبىرى وسى مۇناي تابىسى. ءىرى كومپانيالار سانكتسيالىق تىزىمگە ەنگەن سايىن رەسمي ترەيدەرلەر مەن بانكتەر مۇنداي مۇنايعا جولاماۋعا تىرىسادى.

ەكونوميكالىق تۇرعىدان قاراساق، تەڭىزدە جينالىپ قالعان 180 ميلليون باررەل مۇناي رەسەي ءۇشىن قاعاز جۇزىندەگى ەكسپورت كولەمى ساقتالىپ تۇرعانداي كورىنگەنىمەن، ناقتى اقشاعا اينالۋى قيىندىقپەن ىسكە اسۋدا.

نارىقتاعى جەڭىلدىك (ديسكونت) ۇلعايادى، ساتىپ الۋشى ازايعان سايىن ساتۋشى باعانى تۇسىرۋگە ءماجبۇر. ال سانكتسيا كۇشەيگەن سايىن، ءتىپتى تومەن باعا دا ماسەلەنى تولىق شەشە المايتىن كۇيگە تۇسەدى.

رەسەي ءۇشىن مۇناي ەكسپورتىنان تۇسكەن ءار كەشىككەن دوللار بيۋدجەت تاپشىلىعىن ۇلعايتىپ، سوعىس شىعىنىن جابۋدى قيىنداتا تۇسەدى.

نۇرلان جۇماقانوۆ

Abai.kz