«AMANAT» پارتياسىندا «قارىزسىز قوعام» جوباسىن جۇزەگە اسىرۋ بارىسى قورىتىندىلاندى. ءۇش جىل بۇرىن پارتيا حالىقتىڭ قارجىلىق ساۋاتىن ارتتىرۋ جانە ازاماتتاردىڭ نەسيە جۇكتەمەسىن ازايتۋ باعىتىندا جۇيەلى جۇمىس جۇرگىزۋ ماقساتىندا بارلىق جاۋاپتى مەملەكەتتىك ورگانداردىڭ، بانكتەردىڭ جانە وزگە دە قارجى ۇيىمدارىنىڭ رەسۋرسىن ءبىر ارناعا توعىستىردى. جوبا تۇتاس ەل اۋماعىندا جۇزەگە اسىرىلدى. بيىل 860 مىڭعا جۋىق ەل ازاماتى وقۋدان ءوتىپ، ولارعا كاسىبي كومەك كورسەتىلدى.

ءسوز باسىندا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ «قارىزسىز قوعام» جوباسىنىڭ جۇيەلى جۇزەگە اسۋىنا ايانباي اتسالىسقان بارشا ازاماتقا العىسىن ءبىلدىرىپ، ونىڭ تۇرعىندارعا الەۋمەتتىك قولداۋ كورسەتۋدىڭ ءتيىمدى قۇرالىنا اينالعانىن اتاپ ءوتتى.

«بۇگىندە «AMANAT» پارتياسىنىڭ «قارىزسىز قوعام» جوباسى قانداي دامۋ جولىنان وتكەنىن كورىپ وتىرمىز. ول شاعىن عانا پارتيالىق باستامادان اۋقىمدى مەملەكەتتىك باعدارلاماعا اينالدى. پرەزيدەنتتىڭ، حالىقتىڭ قولداۋىنا يە بولدى. بۇل جوبا – ءتۇرلى جاعدايعا تاپ بولعان ادامدارعا كورسەتىلگەن ناقتى كومەك. ويتكەنى، شەشىمىن تاپقان ءار ماسەلەنىڭ ارتىندا مىڭداعان ادامنىڭ تاعدىرى تۇر. ەڭ باستىسى، ازاماتتاردىڭ ءۇمىتى ويانىپ، سەنىمى نىعايۋدا. جوبا سونىسىمەن قۇندى»، – دەدى ەرلان قوشانوۆ.

پارتيا توراعاسى بۇگىندە «قارىزسىز قوعام» جوباسى اۋقىمدى پىكىرلەستەر توبىن بىرىكتىرىپ، بۇل قادام ازاماتتارعا كەشەندى كومەك كورسەتۋدىڭ تۇتاس ەكوجۇيەسىن قۇرۋعا مۇمكىندىك بەرگەنىن اتاپ ءوتتى. سونداي-اق ولار ونلاين رەجيمدە دە جۇمىس ىستەيدى. پارتيا بازاسىندا رەسپۋبليكالىق كولل-ورتالىق ىسكە قوسىلىپ، وندا كۇن سايىن 180 زاڭگەر 5 مىڭعا جۋىق ءوتىنىش قابىلداۋدا. بۇعان قوسا، qogamfin.kz تسيفرلىق پلاتفورماسى قۇرىلىپ، WhatsApp جانە Telegram-دا AI-بوتتار جۇمىس ىستەۋدە. بيىلدان باستاپ اۋىلدىق جەرلەردە شالعاي ەلدى مەكەندەردەگى ازاماتتارمەن تىكەلەي كەزدەسۋ وتكىزەتىن ءموبيلدى توپتار جۇمىس ىستەي باستادى.

(سۋرەت:ءالي عالىم)

جوبا قىزمەتكەرلەرى ازاماتتارعا العاشقى ءوتىنىش بەرگەن ساتتەن باستاپ، ولار قيىن جاعدايدان تولىق شىققانعا دەيىن قولداۋ كورسەتەدى. ولار زاڭگەرلىك كەڭەس بەرەدى، پسيحولوگيالىق كومەك كورسەتەدى. سونداي-اق شوتتار مەن مۇلىكتەردى بۇعاتتان شىعارۋعا، قارىزداردى قايتا قۇرىلىمداۋعا، بەرەشەك بويىنشا تولەم جاساۋدىڭ قولايلى كەستەسىن قۇرۋعا، جاڭا داعدىلاردى ۇيرەتۋگە كومەكتەسەدى. بۇل شارالار مىڭداعان قازاقستاندىق وتباسىنىڭ داعدارىستان شىعىپ، ءومىردى قايتا باستاۋىنا مۇمكىندىك بەردى.

«قارىزسىز قوعام» جوباسى بەلسەندى دامىپ كەلەدى. بيىل ياندەكس، نايمي.كز جانە وزگە دە تسيفرلىق پلاتفورمالارمەن سەرىكتەستىك ورناتىلدى. تاكسي جۇرگىزۋشىلەرىنىڭ، جەتكىزۋ قىزمەتى ماماندارىنىڭ قۇقىعى مەن مۇددەسىن قورعاۋ بويىنشا كەشەندى جۇمىس جۇرگىزىلۋدە. بۇگىندە جوباعا پلاتفورما ارقىلى جۇمىسپەن قامتىلىپ، شوتتارى بۇعاتتالعان جانە وزگە دە كۇردەلى ماسەلەلەرگە تاپ بولعان 95 مىڭعا جۋىق ازامات جۇگىندى.

جوباعا ەلىمىزدىڭ جەتەكشى جوعارى وقۋ ورىندارىنىڭ زاڭ كلينيكالارى قوسىلدى. جوعارى كۋرس ستۋدەنتتەرى وقىتۋشىلاردىڭ جەتەكشىلىگىمەن ازاماتتارعا كەڭەس بەرىپ، قۇجاتتار ازىرلەۋگە كومەكتەسەدى جانە كۇردەلى جاعدايلاردى تالدايدى. كەيبىر وڭىرلەردە «قارىزسىز قوعام» جوباسى اياسىندا قارجىلىق ساۋاتتىلىق كۋرسىنان وتكەن ازاماتتار جۇمىسقا ورنالاستىرىلۋدا.

(سۋرەت:ءالي عالىم)

سونداي-اق ەرلان قوشانوۆ ماجىلىستەگى «AMANAT» پارتياسى فراكتسياسىنىڭ دەپۋتاتتارى بورىشتىق ماسەلەلەر تۋىنداماي تۇرىپ، ونى الدىن الۋ باعىتىندا جۇيەلى قۇقىقتىق شارالار قابىلداپ جاتقانىن اتاپ ءوتتى. وسىلايشا پرەزيدەنت تاپسىرماسىنا سايكەس، قارجىلىق قىزمەتتەردى تۇتىنۋشىلار قۇقىعىنىڭ قورعالۋىن كۇشەيتەتىن بىرقاتار زاڭ قابىلداندى. ولاردىڭ قاتارىندا – بەرەشەكتى وتەۋ مەرزىمى 90 كۇننەن اسىپ كەتكەن ازاماتتارعا جاڭا تۇتىنۋشىلىق نەسيە بەرۋگە تىيىم سالۋ، بانكتەن قارىز الۋ ءۇشىن جۇبايىنىڭ نەمەسە زايىبىنىڭ كەلىسىمىن الۋ تالابى، نەسيەدەن باس تارتۋعا مۇمكىندىك بەرەتىن 24 ساعاتتىق «سۋىتۋ مەرزىمى»  جانە وزگە دە نورمالار بار.

جۋىردا ءماجىلىس بانكتەر جانە بانك قىزمەتى تۋرالى جاڭا زاڭ قابىلدادى. وعان سايكەس، بانكتەر ازاماتتاردىڭ ءبىر مەزگىلدە بىرنەشە نەسيە راسىمدەۋ مۇمكىندىگىن شەكتەپ، ونىڭ شارتتارىن تولىق تۇسىندىرۋگە ءتيىس. سونىمەن قاتار پروبلەمالىق بەرەشەكتەردى سوتتان تىس رەتتەۋ قۇرالدارىن كەڭەيتۋ جۇمىسى جالعاسۋدا جانە قارىزدى كوللەكتورلارعا ساتۋعا تىيىم سالاتىن موراتوري مەرزىمى ۇزارتىلدى.

(سۋرەت:ءالي عالىم)

ءىس-شارا بارىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين «قارىزسىز قوعام» جوباسى ۇكىمەت پەن «AMANAT» پارتياسىنىڭ بىرلەسكەن جوسپارلى جۇمىسىنىڭ ناتيجەسى ەكەنىن اتاپ ءوتتى. بۇگىندە ول ازاماتتارعا قارجىلىق ساۋاتتىلىقتى ارتتىرۋدان باستاپ، بەرەشەكتى تاجىريبە جۇزىندە رەتتەۋگە دەيىنگى كەشەندى قولداۋ كورسەتەدى. ونىڭ ايتۋىنشا، جول كارتاسى، تسيفرلىق سەرۆيستەر جانە جاڭارتىلعان زاڭناما ارقىلى وتباسىلاردىڭ قارىز جۇكتەمەسىن ازايتۋعا جانە قارجىلىق تۇراقتىلىعىن كۇشەيتۋگە ناقتى جاعداي جاسالىپ وتىر.

قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا «قارىزسىز قوعام» جوباسى نەسيە بەرەشەگى ماسەلەسىن جۇيەلى تۇردە شەشۋدىڭ ناقتى قۇرالىنا اينالعانىن اتاپ ءوتتى. ونىڭ ايتۋىنشا، «AMANAT» پارتياسىنىڭ قولداۋىمەن جانە قارجى ۇيىمدارىنىڭ بەلسەندى قاتىسۋىمەن جوبا ناقتى ناتيجەلەرگە قول جەتكىزىپ، ازاماتتاردى قورعاۋدىڭ ءتيىمدى مودەلىن قالىپتاستىردى.

سونداي-اق وقۋ-اعارتۋ ءمينيسترى جۇلدىز سۇلەيمەنوۆا, «قارىزسىز قوعام» جوباسىنىڭ امباسسادورى، ءماجىلىس دەپۋتاتى داۋلەت مۇقاەۆ تا ءوز پىكىرلەرىن ءبىلدىردى.

(سۋەرت:ءالي عالىم)

سونىمەن قاتار ءىس-شاراعا بەينەكونفەرەنتسبايلانىس رەجيمى ارقىلى بارلىق ءوڭىر مەن رەسپۋبليكالىق ماڭىزى بار قالالار اكىمدەرىنىڭ ورىنباسارلارى، مەنتورلار، زاڭ كلينيكالارى، وڭىرلىك ۇيلەستىرۋشىلەر جانە جوباعا اتسالىسىپ جۇرگەن ازاماتتار قاتىستى.

كەزدەسۋ سوڭىندا «قارىزسىز قوعام» جوباسىنىڭ قاتىسۋشىلارىنا، سەرىكتەستەرى مەن ساراپشىلارىنا پارتيالىق ماراپاتتار مەن العىس حاتتار تابىستاۋ سالتاناتى ءوتتى.

Abai.kz