ءماجىلىستىڭ جالپى وتىرىسىندا دەپۋتات نۇرگۇل تاۋ ەڭبەك جانە حالىقتى الەۋمەتتىك قورعاۋ ءمينيسترىنىڭ مىندەتىن اتقارۋشى ۆيكتوريا شەگايعا موڭعوليادان قازاقستانعا كوشىپ كەلگەن ازاماتتاردىڭ ەڭبەك ءوتىلى مەن زەينەتاقى ەسەپتەۋ تارتىبىنە قاتىستى سۇراق قويدى.

ءسوز العان دەپۋتات قاراستىرىلىپ وتىرعان زاڭ جوباسىن قولدايتىنىن اتاپ ءوتتى. بۇل - ەكى ەل اراسىنداعى ىنتىماقتاستىقتى نىعايتۋعا باعىتتالعان ماڭىزدى قۇجات.

وسى كەلىسىمنىڭ ءۇشىنشى بابىنا سايكەس، زەينەتاقى تاعايىنداۋ تۇرعىلىقتى ەلدىڭ زاڭناماسىنا سايكەس جۇزەگە اسىرىلادى. وسىعان وراي، زەينەتاقى تاعايىنداۋ كەزىندە موڭعوليادا وتكەن ەڭبەك ءوتىلى قالاي ەسەپكە الىنادى؟ زەينەتاقىنى ەسەپتەۋ كەزىندە قانداي جالاقى ەسكەرىلەدى؟ ونى راستاۋ مەحانيزمى قانداي؟ - دەپ سۇرادى نۇرگۇل تاۋ.

ءمينيستردىڭ مىندەتىن اتقارۋشى ۆيكتوريا شەگاي ەڭبەك ءوتىلىن راستاۋ ەكى ەل اراسىندا اقپارات الماسۋ ءتارتىبى ارقىلى جۇرگىزىلەتىنىن ايتتى.

كەلىسىم قازاقستان مەن موڭعوليانىڭ قۇزىرلى ورگاندارى اراسىندا ەڭبەك ءوتىلىن راستاۋعا قاتىستى اقپارات الماسۋ ءتارتىبىن قاراستىرادى. وسىلايشا، موڭعوليا اۋماعىندا وندىرىلگەن ەڭبەك ءوتىلى قازاقستانعا تۇراقتى تۇرۋعا قونىس اۋدارعان ازاماتتار ءۇشىن 1998 جىلعا دەيىنگى كەزەڭ بويىنشا ەڭبەك كىتاپشالارى مەن وزگە دە راستايتىن قۇجاتتار نەگىزىندە ەسەپكە الىنادى. سونداي-اق وقىتۋ كەزەڭى مەن اسكەري قىزمەت مەرزىمى دە ەسكەرىلەدى، - دەدى ول.

شەگايدىڭ ايتۋىنشا، 1998 جىلدان كەيىنگى ەڭبەك ءوتىلى الەۋمەتتىك جارنالاردىڭ تولەنۋى ارقىلى راستالادى.

ال 1998 جىلدان كەيىن موڭعوليا اۋماعىندا جيناقتالعان ەڭبەك ءوتىلى ولاردىڭ موڭعوليانىڭ مەملەكەتتىك الەۋمەتتىك قورعاۋ قورىنا تولەگەن ساقتاندىرۋ جارنالارى ارقىلى راستالادى. بۇل اقپارات قازاقستانعا دا بەرىلەدى جانە ەڭبەك ءوتىلىن انىقتاۋدا قولدانىلادى، - دەپ ءتۇسىندىردى ءمينيستردىڭ مىندەتىن اتقارۋشى ماجىلىستە.

Abai.kz