ءماجىلىس قازاقستان ۇكىمەتى مەن ءبىلىم، عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) اراسىنداعى قازاقستاندا 2-ساناتتاعى ورتالىق رەتىندە ورتالىق ازيا وڭىرلىك گلياتسيولوگيالىق ورتالىعىنىڭ مارتەبەسىن قايتا جالعاستىرۋ تۋرالى كەلىسىمدى راتيفيكاتسيالادى. قۇجاتقا 2025 جىلى 19 ماۋسىمدا استانا قالاسىندا قول قويىلعان بولاتىن.

كەلىسىم مۇزدىقتاردى، قار مەن ماڭگى توڭدى زەرتتەۋ، سونداي-اق ولاردىڭ كليماتتىڭ وزگەرۋى جاعدايىندا ايماقتىڭ سۋ رەسۋرستارىنا اسەرىن باعالاۋ سالاسىنداعى حالىقارالىق عىلىمي ىنتىماقتاستىقتى نىعايتۋعا باعىتتالعان.

بۇل قۇجاتقا سايكەس، ورتالىق ازيا وڭىرلىك گلياتسيولوگيالىق ورتالىعىنا سەگىز جىل مەرزىمگە 2-ساناتتاعى ورتالىق مارتەبەسى بەرىلەدى. ورتالىق ءوڭىردىڭ گلياتسيولوگياسى مەن سۋ رەسۋرستارىن عىلىمي تۇرعىدا زەرتتەۋ، ءبىلىم بەرۋ جانە ۇيلەستىرۋ قىزمەتىن جالعاستىرادى.

كەلىسىم اياسىندا قازاقستان ۇكىمەتىنىڭ، يۋنەسكو-نىڭ جانە ءوڭىر مەملەكەتتەرىنىڭ وكىلدەرىن قامتيتىن باسقارۋشىلار كەڭەسى قۇرىلماق. قازاقستان ورتالىق جۇمىسىن جىل سايىن كەمىندە 414 ملن تەڭگە كولەمىندە قارجىمەن، سونداي-اق عيماراتپەن، قاجەتتى جابدىقتارمەن جانە اكىمشىلىك قولداۋمەن قامتاماسىز ەتەدى.

بۇدان بولەك، كەلىسىم حالىقارالىق ساراپشىلار قاتىساتىن بىرلەسكەن جوبالار، سەمينارلار مەن وقىتۋ باعدارلامالارىن وتكىزۋگە جول اشادى. سونداي-اق عىلىمي دەرەكتەردى اشىق الماسۋعا جانە مۇزدىقتاردى مونيتورينگىلەۋ جانە ساقتاۋ سالاسىندا زاماناۋي تەحنولوگيالاردى ىلگەرىلەتۋگە مۇمكىندىك تۋادى.

Abai.kz